Read Pochuri Naga JEREMIA 27 Bible Online

JEREMIA 27 - Pochuri Naga bible

JEREMIA 27

¹Jasia Judahwa atsa kajiwa Zedekiah küsate vü VÜWA vü nüh azhü hama Jeremia vü ru.

²VÜWA nüh hakümjie küza veh. Noh mpa nüh akhuonyih thi athsoshi vü nüh thsohkhuonyi küsü saluo, thi jümasü vi nüh noh kevü thse luo.

³Jerusalem vü kajiwa Zedekiah vü küru refü ke vü azhü vi nü Edom kajiwa, Moab kajiwa, Ammonri kajiwa, Tyre kajiwa, thi Sidon kajiwa küze luo.

⁴Mari nüh azhüzho hama vi mari vüri kenüh tsü luo: Akuohjira VÜWA, Israel Saküüwuowa nüh hakümjie küza veh: Nohri nüh hama vi nohri vüri vü küza naveh:

⁵Hi nüh eh kükhra küji thi eh pie thsuoküüze vünüh hi nüh azhihwa tü sa, azhih rügi vü anyiri thi asamwari sa, thi hi nüh jümari vi thathari lo veh ünüh tsü.

⁶Khinyi thuoüji hi nüh azhih hamari aveh vi eh siepewa Babilon kajiwa Nebukhadnezzar vü tsümthuoh, thi hi nüh ato vü samwari wienga ma kütsü sa üti ma vü tsümthuoh.

⁷Mampa ma zhih müjie küshura küju nü akuoküji aveh ma, ma tsa thi ma zhüri kütsü sanaveh, jütisanü akuoküjiri hozake thi kajiri küji hozake ma nüh mari tükha küsanaveh.

⁸Thitü mükütüküzü akuoküji küsü nüh nyutü kaji küsü nüh kaji hama, Babilon Nebukhadnezzar kütsü müsa thuoüji, thi ma kuowa Babilon kajiwa thsohkhuonyi kükhu vü mthse ti thuoüji hi nüh ma ke vünüh müjie küzoriekhe küju nü hi nüh anyuchu wa vi kümkhuojih vi thi asahna kükho vi mari tsüna.

⁹Nohri tü jükenüh, nohri setsaküthsüri, nohri matsazhüküphrari, nohri amohküsari, nohri nyiaza zhüküphrari, nyutü nohri tü makürhori azhü müküna wie tüm luo, mari nüh nohri vü, “Nohri tü Babilon kajiwa kütsü küsawa nyu,” ta küza veh,

¹⁰küpakenühnyunü mari nüh akürie setsazhü phraküveh kenüh, jüma zhühzhu thuoüji nohri tü nohri azhih vünüh kületsuo vü viwa jam naveh; hi nüh nohri zhezhujam naveh thi nohri tü pokahm naveh.

¹¹Thitü akuoküji küsüküsü ma ku viteru Babilon kajiwa thsohkhuonyi lovü thse thi ma kütsü sa, ti thuoüji, hi nü ma zhih vü zota sam naveh, ma zhih vü jüla küüroh tsa thi jüla küürho ti sanaveh, ta VÜWA nüh küza.

¹²Hi nüh Judah kajiwa Zedekiah vü nga jükümjie vünüh küza thuoh: Noh kuvi ru Babilon kajiwa thsohkhuonyi lovü thse nü ma thi ma nyira kütsü sataji rholuo.

¹³VÜWA nüh küüza üta akuoküji küsüküsü nga Babilon kajiwa kütsü müsa thuoüji anyuchuwa vünüh, kümkhuoji vünüh thi sanakükho vünüh sü naveh ta küsa üta mokenüh noh thi noh nyiri tü sü na lo?

¹⁴Setsaküthsüri thari nüh Babilon kajiwa kütsü müsa tüm üta küza veh ünüh jümara zhü müküna tümluo, küpakenühnyunü mari tü nohri vü setsaküthsü akürie nohri vü küza küveh kenüh.

¹⁵Hi nüh mari müküze, thitü mari tü zhüja nü eh nyo vünüh setsazhü phra küveh wie, ma zhühzhuwa thuoüji nohri thi setsaküthsüri thari nüh nohri vü phrate veh ünüh hi nüh nohri zhejam naveh, thi pohkam naveh, ta Vüwa nüh küza.

¹⁶Jükenüh hi nüh anavüri thi anyi hamari aveh vü küzathuoh, ta VÜWA nüh küza: Setsaküthsüra zhü thari nüh nohri vü setsaküthsüzhü phra veh ünüh müküna tüm luo, mari nüh, “VÜWA zheh vü küfüküjuri tü shita Babilon vü vishele teru na thuoh,” ta küza veh, küpakenühnyunü mari tü rie nü setsazhü phraküveh kenüh.

¹⁷Mari zhü müküna tüm luo; Babilon kajiwa kütsü sanü rholuo. Mokenüh anyuji hama tü jaküüzo na lo?

¹⁸Mükütüküzü mari nüh setsaküthsüri thuoüji, thi VÜWA zhü tü mari vü peh tsa veh üji, mari tü VÜWA vü küjüleluo, küfüküju VÜWA zheh vü küpehri, Judah kajiwa zheh vü küpehri, thi Jerusalem vü küpehri tü Babilon vü mküüze nta küsa kenüh,

¹⁹küpakenühnyunü akuoküjira VÜWA nüh alokhuori kenüh, juhküjiwa kenüh, kütokepewa kenüh, thi küfüküju anyuji hamawa vü saküvehri kenüh hakümjie küza veh,

²⁰Babilon kajiwa Nebukhadnezzar nüh vimküwa, ma nüh Jerusalem vünüh Babilon vü viteküwa Jehoiakim atsa Judah kajiwa Jekoniah, thi Judah thi Jerusalem sierhüri aveh,

²¹VÜWA zheh vü, Judah kajiwa zheh vü, thi Jerusalem vü ti saküveh wa kenüh thopahiri VÜWA Israel Saküüwuowa nüh hakümjie küza:

²²Mari tü Babilon vü sietewa nü hi nüh mari vü eh luoveh müjieküthse küju nü mari tü jüla peh naveh. Jüti sanüh mari sieshuhru nü mari tü azhie hala küsale sa naveh, ta VÜWA nüh küza.