Read Pochuri Naga JEREMIA 28 Bible Online

JEREMIA 28 - Pochuri Naga bible

JEREMIA 28

¹Jüma mahvi vü, Judah kajiwa Zedekiah kükajiwa küsate vü, mahvi amüzüawa asa müngaawa vü, Gibeon vünüh küruwa Azzur atsa setsaküthsüwa Hanania nüh VÜWA zheh vü anavüri thi anyiri aveh atsatü vünüh hi vü,

²“Kümsietsa VÜWA, Israel Saküüwuowa nüh hakümjie küza veh: Hi nüh Babilon kajiwa thsohkhuonyi zokhuomtü thuoh.

³Babilon kajiwa Nebukhadnezzar nüh azhie hala nüh küfüküju Babilonvü vü teküwari aveh mahvi künyi azhievü nüh hi nüh azhie hala viteru le naveh.

⁴Hi nüh Jehoiakim Judahwa atsa kajiwa Jekoniah, thi Judah vünüh sieteküwari aveh nga azhie hala sieteru le naveh, küpakenühnyunü hi nüh Babilon kajiwa thsohkhuonyi zoshim na küveh thuoh kenüh, taVÜWA nüh küza, ti küza.”

⁵Jüti küsvü VÜWA zheh vü tsieküveh anavüri thi anyiri aveh atüvü nüh setsaküthsüwa Jeremia nüh setsaküthsüwa Hanania vü küza;

⁶setsaküthsüwa Jeremia nüh, “Jüti sa luo! VÜWA nüh jütiküsawa saluo; noh nüh setsaküthsü azhü küphrawa tü VÜWA nüh küsajuwa sanü VÜWA zheh vü küfüküjuri Babilon vü viteküwari thi sieteküwari aveh azhie hala visheleküruwa saluo.

⁷Thitü azhü hama hi nüh noh nüh thi anyiri aveh nüh küünara vünüh küza küvehwa khinyi künaluo.

⁸Khanari setsaküthsüri hisü ehtüri vü küpelari nüh arie, kümkhuoji, thi sahna kükho ti nyuji hozake vü thi kajipe aküji hozake vü setsaküthsü phratsü.

⁹Setsaküthsüwa kükathuozhü setsaküphra kenüh thuoüji, mükütüzü ma setsazhüwa tü rutsa thuoüji VÜWA nüh setsaküthsü jüma tü kürutsa wie thuoh,” ti küza.

¹⁰Thinü setsaküthsüwa Hanania nüh setsaküthsüwa Jeremia aku vünüh thsohkhuo nyi wa vinü zoshim tü.

¹¹Thi Hanania tü anyiri aveh tsatü vünüh, “VÜWA nüh hakümjie küza veh: Hakümjie hi nüh mahvi künyi azhievü nüh Babilon kajiwa Nebukhadnezzar thsohkhuo nyiwa akuoh küjiri aveh aku vünüh zoshimtü naveh,” ti küza. Hakümjie sanü setsaküthsü wa Jeremia tü te wa.

¹²Setsaküthsüwa Hanania nüh setsaküthsüwa Jeremia aku vünüh thsohkhuonyiwa zoshiküm tsotho pike sevü, VÜWA zhü tü Jeremia vüru:

¹³wa nü hakümjie küza luo, VÜWA nüh hakümjie küza veh: Noh nü thsohkhuonyiwa küzoshi thuoüji jüma müthoh vünüh mürükhuonyi thse naküsa wie thuoh!

¹⁴küpakenühnyunü akuoküjira VÜWA, Israel Saküüwuowa nüh hakümjie küza veh. Hi nüh amürükhuo nyi akuoküji hamara ku lovü küthsethuoüji mari tü Babilon kajiwa Nebukhadnezzar akütsü küüsa ntiküsa kenüh wiethuoh, thi mari tü sa wie naveh; hi nüh samwariwie nga vi ma tsüm thuoh.

¹⁵Thinü setsaküthsüwa Hanania vü, “Künaluo, Hanania, VÜWA tünoh müküze, tü noh nüh anyi hamari tü akürie alehsaküno-mthuoh.

¹⁶Jükenüh VÜWA nüh hakümjie küza veh: Hi nüh azhihwa nyieh vünüh noh küzem na thuo. Hama mahvi azhievü nüh noh tü süm nathuoh, küpakenühnyunü noh nüh VÜWA sie küproluo kümthuoh kenüh,” ti küza.

¹⁷Jüma mahvi, asa türüawa setsaküthsüwa Hanania tü süm.