Read Pochuri Naga JEREMIA 29 Bible Online

JEREMIA 29 - Pochuri Naga bible

JEREMIA 29

¹ Rhüzhüle azhü hamari tü setsaküthsüwa Jeremia nüh rhü taji Nebukhadnezzar nüh Jerusalem vünüh Babilon vü resieteküwa, azhie vü kükhruori pehküvehri vü, anavüri vü, setsaküthsüri vü, thi anyiri aveh vü küüze.

²Hamatü kajiwa Jekoniah, thi kajivüwa zah, ashizheh vü küjiri, Judah thi Jerusalem sierhüri, asieküthsüri, thi amürüküsari ti Jerusalem vünüh teküwa asevü nüh.

³Rhüzhüle wa tü Shafan atsa Elasa thi Hilkiah atsa Gemaria, kajiwa Zedekiah nüh Babilon vü Babilon kajiwa Nebukhadnezzar vü küüze künyi. Jüla rhüküsa:

⁴Kükhratsawa VÜWA, Israel Saküüwuowa nüh hakümjie küza veh: Aküsi sateküwa hi nüh Jerusalem vünüh Babilon vü küze kümri aveh vü.

⁵Azheh sakheh nü jümari vü rholuo; aphari sanü jüla nüh küperi tsaluo.

⁶Vüvüh vi nü atsa nyimpari nga thi nyimzari nga peh luo, noh tsara vüvüh vi tsüluo, thi noh tsa vühri sakümnyu luo, jüta küsa vünüh mari tü atsa nyimpari thi nyimzari pehra naveh; saküzhi luo thi zülatemwa tüm.

⁷Thitü hi nüh nohri reviküze kümwa nyuhi kenüh kümhie phah luo, thi jüma kenüh VÜWA vü kükhuo saluo, küpakenühnyunü jüma nüh kümhiera kenüh nohri nga mühiera na küveh kenüh,

⁸küpakenühnyunü thopahiri VÜWA, Israel Saküüwuowa nüh hakümjie küza veh: Nohri azhie vü peh küveh setsaküthsüri thi mahtsa zhü küphrari nü nohri müküüm ramizhi tümluo, thi ma ri nüh amoh kümoh müküna tümluo,

⁹küpakenühnyunü mari tü eh nyo vünüh rie nü noh ri vü setsaküthsüzhü phraküveh wie; hi nüh mari müküze, ta VÜWA nüh küza,

¹⁰ küpakenühnyunü VÜWA nüh hakümjie küza veh: Babilon mahvi rürake juküm sevü mpa wie nüh hi nüh nohri vü küzhuru naveh, thi hi nüh eh küphrazhu saju nü nohri sie azhih hala ru le naveh,

¹¹küpakenühnyunü hi nüh nokenüh kürüpeh küveh hi nüh thsüto veh, kümsü nyunü noh kenüh kürüzhe kümhie, noh tüvü küluozhe küsü tsü nti.

¹²Noh nüh hi ji thi rie nü hi vü kükhuo sa thuoüji, hi nüh noh künatsü naveh.

¹³Noh nüh hi küphah vü hi nga no veh; mükütüküzü noh nüh noh luoveh aveh vi hi phah thuoüji,

¹⁴noh tü hi küüphahra naveh, ta VÜWA nüh küza, thi hi nüh noh müngu satsüle naveh, thi azhie khiekhiela zheja nüh thi akuoküji khiekhiela zheja nüh, jümari aveh vünüh noh vi zhuh le naveh, thi khiekhiela nüh nohri reküzem nüh hi nüh nohri jüla sieru le naveh,

¹⁵küpakenühnyunü nohri nüh, “VÜWA nüh hiri kenüh Babilon vü setsaküthsüri vizhu savehthuoh,” ta küüza kenüh,

¹⁶David kükajipe rügi vü shupehküveh kajiwa kenüh, thi anyuji hala rhopehküvehri, rekü wa vü nyi müküwa noh wari kenüh VÜWA nüh hakümjie küza veh:

¹⁷Kükhratsawa VÜWA nüh hakümjie küza veh, hi tü mari vünüh anyuchuwa, kümkhuoji, thi sahna kükho lejamtü nathuoh, thi hi nüh mari tü ampah pri nü mükütsara kümjie samtü na thuoh.

¹⁸Hi nüh anyuchuwa, kümkhuoji, thi sanakükho vi mari küka naveh, jüti sanü mari tü azhih vü kajiperi aveh vü saküümzho phakeri satsü naveh, hi nüh mari zhe küja akuoküjiri aveh aza vü kümzü zanyo küsü, küümzhohphake, thi eh shih to küsa, satsü naveh,

¹⁹küpakenühnyunü mari tü eh zhü vü mütsake, ta VÜWA nüh küza, hi nüh setsaküthsü eh sieperi mtsatso nüh nohri vü küze, thitü mari tü müküna, ta VÜWA nüh küza.

²⁰Thitü khinyi thuoüji, nohri reteküwari aveh, hi nüh Jerusalem vü nüh Babilon nü küzekümri VÜWA zhü künaluo:

²¹Kükhratsawa VÜWA Israel Saküüwuowa nüh küüza zhü Ahab Kolaia atsa thi Maaseiah atsa Zedekiah vü, eh nyo akürie vünüh vi nü setsaküthsüzhü phra küveh künyi kenüh hakümjie küza veh. Hi nüh masü tü Babilon kajiwa Nebukhadnezzar akevü thsem na thuoh, thi nohri notha vünüh ma nüh masü rethem nathuoh.

²²Masü makeri nüh Babilon vü küpehri aveh nüh kümzü hama vinü phratena: “Babilon kajiwa nüh anyih vünüh rükümü Zedekiah thi Ahab masü kümjie VÜWA nüh küsam luo,” ta küza naveh,

²³küpakenühnyunü masü nüh Israel vü küzhe küüro sakümthuoh kenüh thi masü zhephrura vüvüh sie küüphroküphrie samthuoh, thi hi nüh masü vü azhü mkütsü aküriezhü eh nyo vünüh phrahtem thuoh; hi nüh thsüveh thi apovüwa wie thuoh, ta VÜWA nüh küza.

²⁴Shemaia Nehelamwa vü.

²⁵Kükhratsawa VÜWA, Israel Saküüwuowa nüh hakümjie küza veh: Noh nüh noh mpa noh nyo vünüh zhüle lasiri vi nü Jerusalem vü küpeh anyiri aveh vü, Maaseiah atsa Zefania levüwa vü, thi anavüri aveh nü tsü taji,

²⁶levüwa Jehoiada müthoh vünüh VÜWA nüh noh vi anavü küsamthuoh, jüti sanü VÜWA zheh vü küürohri peh nü ma mpa nüh zhe taji setsaküthsüri ta sakütseri vi matü rete nü küphetem luo, ti küza.

²⁷Thinü noh tü mokenüh Jeremia Anathoth noh müthoh vünüh setsaküthsüri ta sakütsewa müshüke lo?

²⁸Küpakenühnyunü ma nüh hiri Babilon vü küzetsa taji, “Jüla peh suom nathuoh, tinü azheh sanü jümari vü rholuo, thi aphari sa jü mari vi küpe tsaluo,” ti küza.

²⁹Anavüwa Zefania nüh setsaküthsüwa Jeremia nüh küünara vünüh rhüzhüle hama chie.

³⁰Thinü VÜWA zhü tü Jeremia vü ru:

³¹Reteküwari vü, Shemaia Nehelamwa kenüh VÜWA nüh hakümjie küza veh: Hi nüh Shemaia tü müküze wie ketünga ma nüh noh setsaküthsüzhü phra nü noh tü akürie küsü alehküüno mthuoh,

³²jükenüh VÜWA nüh hakümjie küza veh: Hi nüh Shemaia Nehelamwa thi ma küshukürari kümnomna tsünaveh; ma tü anyi hamari aza vü nyi küsü nga rhoküveh künguwa nyu, thi hi nüh kümhie eh nyuri vü sana saküveh küngurawa nyu, küpakenühnyunü ma nüh VÜWA sie küwuluo zhü phrakümthuoh kenüh, ta VÜWA nüh küza.