Read Pochuri Naga JEREMIA 3 Bible Online

JEREMIA 3 - Pochuri Naga bible

JEREMIA 3

¹“Mükütüküzu nyi küsü nüh ma vüvüh kürüsuom nü ma tü ma vünüh tewa taji küpara vüvüh satewa thuoüji ma tü ma vü shele ru naveh ülo? Jüma zhih tü samükümne tüm naveh ülo? Noh tü noh külori hozake sie nü khiemuo mthuoh; thinü noh tü hi vü shele ru nti ülo? ta VÜWA nüh küza.

²Noh notha toke nü kümsie kümtse vü noluo? No tü khiela nü kükhiemuo küüro msalo Noh tü Arabri nü thuola nü rühu nta kühuo kümjie lehkhuji nato vü noh tü shupeh nü külovühri huopeh Noh küüphroküphrie küüro vünüh azhih wa sakümnemthuoh.

³Jükenüh atsorhü tü müküze nüh samthuoh, thi tüthse tsoh tü müruthuoh; tü noh tü küüphroküphrie nokha pehm wie, noh tü zü krüna küsa münyie wie.

⁴Noh tü khintü tsatsa hi müji ülo, Eh Pa, noh tü eh küviza afüwa

⁵ma tü küsuokürho arüshu naveh ülo, ma tü sehkhe küju rümtho naveh ülo? Halie, noh nüh küzamthuoh, thitü noh nüh küsara kümsü aveh samthuoh,” ta küza.

⁶ Kajiwa Josiah rülo vü VÜWA nüh hi vü; “Ma nüh mowa sanüh küzhütsanyitsa mükünyiewa, Israel, ma nüh mokümjie küzhiho aveh vü thi athsoh kümzhi kükhu aveh vü wa nü küüphroküphrie küüro sanüh noh tü nguthuoh ülo?

⁷Thi hi nüh, ‘Ma nüh hamari aveh saküm sevü nüh ma tü hi vü shelera naveh,’ thitü ma tü müsüle, thi ma tsevü aküriewa Judah nüh jüma ngu.

⁸Müküzhütsa nyitsa wa Israel küüphroküphrieri aveh kenüh ma nüh ngu, hi nüh Kürüsuo küphrake vi ma tsü nü ma kümzem; tü ma tse vü akürie wa Judah tü mükrü nüh sam, thi ma nga wa nü nyi küphroküphrie mü,

⁹küüphroküphrie küsa tü ma kenüh müshekürüzi she, azhihwa sakümnemthuoh, aloh thi athsoh vi küüphroküphrie sanü.

¹⁰Tü hama aveh vünü ma tsevü Judah mükülehwa tü ma luoveh ajü vi nü hi vü sühle müru, thitü aküthse vünüh wie, ta VÜWA nüh küza”.

¹¹Thi VÜWA hi vü, Israel müküzhütsanyitsa wa tü ma mpa nüh Judah aküriewa nyievü nüh künakhie küzüla kütsamthuoh.

¹²Wa nü zhietü wuovü azhü hamari zhüchüh taji Sühle luo; müküzhütsanyitsawa Israel, ti küza luo, ta VÜWA nüh küza. Hi tü arüküshu vünüh noh vü künowa nyu, küpakenühnyunü hi tü noh kümüze kümü kenüh, ta VÜWA nüh küza; Hi tü küsuokürho arüküshuwa nyu.

¹³Noh nakhiemthuoh ta küsa thsüluo, noh tü VÜWA noh Saküüwuowa zhü müküna nüh samü ta küsa, thi athsoh kümzhi kükhie aveh vü anyithera za vü noh küütsori sariem thi noh tü eh jikhi müvi samü ta küsa VÜWA nüh küza

¹⁴Sühle luo, O müküzhütsa nyitsa atsari, ta VÜWA nüh küza; küpakenühnyunü hi tü nohri avüwa küsa kenüh; hi nüh noh vinaveh, anyuji küsü vü nüh küsü thi tharuo küsü vünüh künyi, ti vi nü hi nüh nohri sie Zion vü ru naveh.

¹⁵Thi hi nüh eh kümngu kümjie küsa vünüh nyihzhükühuo nohri tsü naveh, ma nüh zanyoküthsü thi kümshi vi noh ri avo sanaveh.

¹⁶Thi jüma rülo vü azhih jüla nohri anyi zhiteküru vü mari tü, “VÜWA kütsathuo akuwa,” ta küüzalewa nyuthuo, ta VÜWA nüh küza. Jümatü aluoveh lovü küruwa nyuthuoh, nyutü kümshekewa nyuthuoh, nyutü aküpeh küthsü wa nyuthuoh; thi jüma küsa lewa nyuthuoh, ta VÜWA nü küza.

¹⁷Jüma tsotho vü Jerusalem tü VÜWA kükajipe ta ji nü akuoküjiri aveh tü jümawa vü Jerusalem vü VÜWA shütü vü sehzhu naveh, thi mari tü müzike wie thuoh nüh mari mpa mari luoveh kümsü kümzhe lewa nyuthuoh

¹⁸Jüma rülo vü Judah zhelo tü Israel zhelo vü sarü naveh, thi mari kürü nü zhih vü nüh hi nüh noh pari vü aküvi küsü sa üti kütsüwa vü ru naveh.

¹⁹“Hi nüh kümshe mokümjie noh tü eh tsara aza vü küpe naveh ünüh, thi azhih akülo küsü vi noh tsü naveh ünüh, akuoküji aveh vü küzütsa akaküvi küsü. Thi noh nüh hi vü eh pa, ta hi ji na ti müshe, thi eh sekünyi vünüh sühleteküwa wa nyu ti müshe.

²⁰Azhütsa, kütsotü mükünyie vünüh küsü nüh ma vüpa jaküm üta, jüüta noh tü hi vü kütsotü münyie nüh sateru, O Israel zhehlowa, ta VÜWA nüh küza.”

²¹Akhi küsü azhie kümsie kümtse vü künara veh thuoh, Israel tsari kükrie thi kükhuo küpakenühnyunü mari nüh lehkhuji mkünyu vü teküwathuoh kenüh, mari tü VÜWA mari Saküüwuowa kümamthuoh.

²²“Sühle luo, O kütsotü küzhüla atsari, hi nüh nohri kütsotü küzüla sakütsü naveh,” Halie, hiri tü noh vü tse veh; küpakenühnyunü noh tü VÜWA hiri Saküüwuowa küsa kenüh

²³Ahori tü saküürüza küsü tsa wie thuoh, aküzhiri rügi vü nüh mükünyu kükhurüh küsari. VÜWA hiri Saküüwuowa vü Israel küülolera pehtsa veh.

²⁴“Thitü hiri vizara küzükrü küüro nüh ehpari nüh küüroh kho nü saküru, mari nyihnyih thi mari mieshümiesa, ma tsa nyimpari thi ma tsa nyimzari, shoh küporiemthuo.

²⁵Hiri tü hiri küzükrü vünüh, zeh ünüh raluo, thi hiri müküchiekürhe nüh hiri küzhute ünüh raluo; küpakenühnyunü hiri tü VÜWA hiri Saküüwuowa vü khiemuo kümthuoh kenüh, hiri nga thi hiri pari nga, hiri küviza vünüh nosü küju nga; thi hiri tü VÜWA hiri Saküüwuowa jikhi müvi nüh sam.”