Read Pochuri Naga JEREMIA 30 Bible Online

JEREMIA 30 - Pochuri Naga bible

JEREMIA 30

¹Jeremia vü VÜWA zhü küru:

²VÜWA, Israel Saküüwuowa nüh hakümjie küza veh. Hi nüh noh vü azhü küüza aveh lasipha küsü lovü rhuke luo.

³Hi nüh eh nyi ri Israel thi Judah müngu satsüle na küsa rülori tü tetsethuoh wie thuoh ta VÜWA nüh küza, hi nüh mari sie nü maküzhukürari vü kütsü azhihwa vü sheleru naveh, thi mari nüh jüma mükapeh naveh, ta VÜWA nüh küza.

⁴VÜWA nüh Israel thi Judah kenüh azhü hamari küza:

⁵VÜWA nüh hakümjie küza veh: kükrü jikhi, kümzhoh, thi luovehkürüzi mükünyie jikhi hi nüh künarathuoh.

⁶Khinyi küna nü noluo, nyimpari tü atsawuo ra naveh ülo? Thinü mokenüh hitü nyimpari aveh tü kre vüri atsaküna kümjie ma keri küzo vü pake vehlo? Mokenüh anyieh aveh tü süzhi tewa thuoh lo?

⁷O! jüma rülo tü jisheh jükümjie küsa mü nyie; jüma tü Jacob kenüh amüsheküna tsotho küsü; tü ma tü jüma vünüh küloletsü naveh.

⁸Jüma rülo vü hi nüh ma ku vünüh thsohkhuonyiwa zoshimtü naveh, thi ma küphehri zothuomtü nü anyitheri nüh ma vi asiepe küsawalewa nyuthuoh.

⁹Thitü mari tü VÜWA mari Saküüwuowa thi hi nüh makeri’a nüh vishutsü na küsawa kajiwa David kütsü sanaveh.

¹⁰Thitü noh kenüh thuoüji mükrü tümluo, eh siepewa Jacob, thi luoveh mzah tümluo, O Israel, ta VÜWA nüh küza; küpakenühnyunü hi nüh kületsuo vünüh külole na küveh kenüh, thi noh tsatori wa tü aküsi saküveh vünüh külole na küveh kenüh. Jacob tü sheleru nü kürüzi ngu nü zota peh naveh, thi nyi küsü nga ma saküükrüwa nyu thuoh,

¹¹küpakenühnyunü hi nüh noh külole nti noh sietse veh; hi nüh noh, thathari vü saküvorie küze nüh akuoküji jümari tü hi nüh asehkhe sam tü naveh, thitü noh thuoüji hi nüh asehkhe sa kütsüwa nyu. Hi nüh noh tü akete sanü phrasosie naveh, hi nüh noh tü kümnomna mtsü nüh küsawa nyu,

¹²küpakenühnyunü VÜWA nüh hakümjie küza küveh kenüh: Noh kümsamnawa samkükurathuoh, noh khümawa tü khosheh küm thuoh kenüh.

¹³Noh kürho tü nyi küsü mga nüh kümsamna na küsa münyie luo, noh kükhüma kenüh anazi münyie luo, noh kenüh saküümhie münyie luo.

¹⁴Noh külori aveh tü noh kümamthuoh, mari tü noh kenüh zanyoküsü nga müüshethuoh; küpakenühnyunü hi nüh noh vü tü mükünyongü küsü ake nüh noh tohtsü kümthuoh kenüh, mükünongüra nomküümze vi nü kümnomna tsümthuoh, noh künakhie tü jiküm kenüh, noh kükhiemuori tü müküchierhü ra.

¹⁵Noh tü mokenüh noh kümsamna kenüh alievü zie zhu veh lo? Noh küna tü samkükurathuoh, küpakenühnyunü noh künakhie tü jile thi noh kükhiemuo tü müküchierhü rathuo ake nüh, hi nüh noh vü azanyo hamari samthuoh.

¹⁶Kükenüh noh kümrhühri tü mürhühriem na thuoh, thi noh mükülori tü mari aveh reviteküwa vü tewa nathuoh; noh prüküviri nüh prüvim naveh, noh retsa küvehri nüh retsanaveh,

¹⁷küpakenühnyunü hi nüh noh sazüh tü sakümhietsü le na küvehkenüh, thi noh kümsamnara tü hi nüh sakümhie tsü naveh, ta VÜWA nüh küza, küpakenühnyunü mari nüh noh tü külemieri küsa ta küji kenüh: “Jümatü Zion; nyi küsü nga ma vü luoveh mküthsewa,” ta küsakenüh.

¹⁸VÜWA nüh hakümjie küza veh: Hi nüh Jacob juhthsüzheh müngu satsüle naveh, thi ma kürho peri vü rüthaküna peh naveh; anyujiwa tü ma zhih rügivü nüh sale naveh, thi kajiwa zhe tü ma küpepe vü sale naveh.

¹⁹Jümari vünüh kümnakütsü za reihi runaveh thi loküzhe küsa jikhi ri nga künarana. Hi nüh mari hozake satsünaveh, thi mari tü küzülowa nyu; hi nüh mari tü küchiekürheri satsü naveh, thi mari tü kütazüwanyu.

²⁰Ma tsari tü khanavüri kümjie sanaveh, eh tüvü ma mzawa tü sashu naveh; thi hi nüh mari kümrüri kümnomna tsünaveh;

²¹Mari kajitsawa tü mari mpa mari kümhieh vünüh sa wie naveh, mari takrüri tü mari aza vünüh ru naveh; hi nüh ma sie shenyiru naveh, thi ma tü hi küütuoh naveh, küpakenühnyunü hi kütuoh küru thawa nüh müshezih na lo? ta VÜWAnüh küza.

²²Thi nohri tü eh nyiri sanaveh, thi hi tü nohri Saküüwuowa sanaveh.

²³Noluo, tsohmrhü küsa VÜWA tü! Rükümtho kuoshuwa thuoh, nyiazamrhü küsü; jüma tü kümsüküsasa tü rügi vü nüh wurie naveh.

²⁴VÜWA rüküshu kükrükhre tü ma küshelewanyu ma luoveh vü kümshewa müjie küsaju küju nü. Arülo asevü nüh nohri tü jüma thsümshira naveh.