Read Pochuri Naga JEREMIA 31 Bible Online

JEREMIA 31 - Pochuri Naga bible

JEREMIA 31

¹Jüma tsotho vü hi tü Israel tharuori aveh Saküüwuowa sanaveh, thi mari tü eh nyiri sanaveh, ta VÜWA nüh küza.

²VÜWA nüh hakümjie küza veh: Anyi thawa nüh anyuchuwa nüh rhoraveh ünüh reza vü külozhinyura veh; Israel nüh kümnyie kenüh küphah vü,

³VÜWA nüh kületsuo vünüh ma vü küngu. Hi nüh küsükürho küümze vi noh kümzeh thuoh; jükenüh hi nüh eh küzhütsa-künyitsa noh vü mükütuo wie.

⁴Hi nüh noh tü satsa le naveh, thi noh tü sara wie naveh, O mükürü sawa Israel. Noh tü noh sie thokhriza vi le na thuoh, thi loküzhe kütsih vü wa na thuoh.

⁵Samaria küzhi vü noh tü rhelivirhu shie le na thuoh; thi ma vi tsa lozhe na thuoh,

⁶küpakenühnyunü ariehuori nüh küji rülo runa Efraim ho vünüh. “Raluo, kürü Zion vü khru ünüh, VÜWA hiri Saküüwuowa vü,” ta ji naveh,

⁷küpakenühnyunü VÜWA nüh hakümjie küza veh: Jacob kenüh alowie nü azah sa kümsie luo thi akuoküjira lehvü kenüh zie kümsie luo; zhüchüluo, küsiake tsüluo, thi “Külole luo, O VÜWA, noh nyiri, Israel kümtori,” ti küza.

⁸Noluo, hi nüh mari tü zhietü zhih vünüh sieru naveh, thi azhih kületsuotsatsa vünüh küüsehzhuh naveh, mari azavü küüjuri thi jiküji, atsaküsieri thi atsa wuonaküsari nga, ti ariekhuo küji küsü hala sheleru naveh.

⁹Mari tü krie nü ru naveh, thi küünyi vünüh hi nüh mari küjo shelewa naveh, hi nüh mari tü akutso juhri vü küütse naveh, lekhuji kümsho vü mari tü kümshü wa nyu; küpakenühnyunü hi tü Israel apa küsü sakümthuoh kenüh, Efraim tü eh tsa küwuokhuwa.

¹⁰VÜWA zhü künaluo, O akuoh küjiri, thi kületsuo vü nga; “Thawa nüh Israel saküporie nüh ma nüh sa zhuh lenaveh, thi ma tü nyihzhükühuori küsü nüh nyihnyihriekhuo küsa üta sanaveh,” ti küza,

¹¹küpakenühnyunü VÜWA nüh Jacob thuotsü kümthuoh kenüh, thi ma kenüh ake kükhratsatsa vünüh ma rhesam thuoh.

¹²Mari tü ru nü Zion kümsie vü nüh azah sa zie naveh, thi mari tü VÜWA kümhie vü nüh wieke naveh, atsuo rügi vü, akhah rügi vü, thi vüjuh rügi vü thi nyihnyihza riekhuo thi mieshümiesa riekhuo vü; mari kürho tü ajuhküzü phari küsü kümhieh sanaveh, thi mari tü piketü kümnomnale nyu thuoh.

¹³Jüta thuoüji nyimza kürünguri tü akütsih vü nyierakhruo naveh, thi nyimpa rünguori nga thi kükhruo ri nga lozhe naveh. Hi nüh mari külorü tü sa küülozhele naveh, hi nüh mari luoveh sakürüzi tsü naveh, luoveh küna wa mari vü küwie tsü naveh.

¹⁴Hi nüh küwale vünüh anavüra kürholi saküütsazhu naveh, thi eh kümhie wa vi nü eh nyiri tü alora naveh, ta VÜWA nüh küza.

¹⁵ VÜWA nüh hakümjie küza veh: Rama vü ajikhi küsü küna rathuoh, kürümuo thi riehu shu nü kükrie. Rachel tü ma tsari kenüh krie veh; ma tsari kenüh ma tü luoveh samkürüzira nta, küpakenühnyunü mari tü mükünyie thuoh kenüh

¹⁶VÜWA nüh hakümjie küza veh: Akükrie vünüh noh jikhi lem luo, thi noh notha vünüh rüthsü müküshu tümluo; küpakenühnyunü noh küüroh kenüh ajisuo küsü pehküveh kenüh, ta VÜWA nüh küza: mari tü mükünongüra zhih vünüh shele ru naveh;

¹⁷thuotüvü kenüh noh kenüh küluozhe pehveh, noh tsari tü mari mpa mari kuohji suo vü shele ru naveh, ta VÜWAnüh küza.

¹⁸Efraim nüh krie küveh hi nüh küna ra: “Noh nüh hi sosie thuoh, thi hi tü sosie thuoh, hi tü mieshüzah mküsosie küsü kümjie sa. Hi sieru le luo, hi küürum le luo, küpakenühnyunü noh tü VÜWA eh Saküüwuowa küsa kenüh,

¹⁹küpakenühnyunü hi nüh süle te küwa ase vünüh hi tü khaphrü ra; thi hi tü sosietsü küm sevü nüh hi nüh eh thüchi khakefe; hi tü zükrüke thuoh, thi hi tü luovehza te wa, küpakenühnyunü eh küviza küzükrüwa vükütse kenüh,” ti küza.

²⁰Efraim tü eh küümze atsa ülo? Ma tü hi nüh nokülo atsa ülo? Hi nüh küzakele ma phra müsü naveh ünüh, hi tü ma müsheke peh huo. Jükenüh hi tü ma kenüh zota müpehra nüh sam; hi tü ma vü noküümze pehtsa wie naveh, ta VÜWA nüh küza.

²¹Noh kenüh aleh küsari saluo, noh mpa noh tü küjokütsü tovüri saluo; kümhie ta aleri müshenoluo, noh nüh lehkhuji khiemawa vünüh wa nüh. Shüle luo, O mükürüsawa Israel, noh nyujiri vü sühleraluo.

²²Küthakele noh tü küpuoküpe tse na lo, O müküzhütsa nyitsa atsa vühwa? küpakenühnyunü VÜWA nüh azhih rügi vü zanyo kürüthe küsüsaküje saküveh thuoh kenüh: nyimpari kümkie tera nyimzari küsü saküjemthuoh.

²³Kuohjira VÜWA, Israel Saküüwuowa nüh hakümjie küza veh: Hi nüh mari müngu saleküm vü mari tü Judah azhih vü thi ma nyujirivü anyuchu hamari küsükeri vile naveh: “VÜWA nüh noh tsiakütsüwa saluo, O künyitsa ape, O kümtse howa,”

²⁴Judah thi ma anyu aveh tü kürü rho naveh, azhuh küürohtsari nga thi mari nyihnyihrisie nü küzhukütseri aveh kürü rho naveh.

²⁵Münoke kütseri hi nüh alosaküra naveh, thi anyojiküturi aveh hi nüh sakürherhotsü naveh.

²⁶Hi nüh jüla nüh süra nü noküze, thinü eh küzeh tü loküm sa.

²⁷A rülori tü tsetsa wiethuoh, hi nüh Israel thi Judah zhehlori vü anyira tsü thi samwa atsü zhuh na küsa arülowa tü tetsetsawiethuoh.

²⁸Hi nüh mari mütajam nti, zoshim nti, vehjam nti, zoriem nti, thi kümsü viru nti mari vü noküveh üta hi nüh mari sale nti thi shiela nti no veh, ta VÜWA nüh küza.

²⁹Jüma rülo vü mari tü: “Avühri nüh rhelivi aküsuo tsathuoh, thi atsara aha tü mükre veh thuoh,” ta küza.

³⁰Thitü aveh nga papa kükhiemuo kenüh sü naveh; rhelivi aküsuo kütsari aveh aha tü mükre wie naveh.

³¹ Hi nüh Israel thi Judah zhehlori sie kütsathuo zhü kürüthe sanaküsa rülori tü tsatsa wiethuoh, ta VÜWA nüh küza.

³²Jümatü hi nüh ake nüh Egypt zhih vünüh siezhu küru vü kütsathuo zhü ma pari vü thü sa kümjie küsawa nyu, hi nüh kütsathuohzhü küzokhuowa kümjie küsawa nyu.

³³ Thitü jüma rülo vü hi nüh Israel zhehlori sie nü kütsathuohzhüküsa hama thuoüji, hi nüh eh khonyo mari lovü thse naveh, hi nüh mari luoveh lovü hi nüh jüma rhüke naveh; jüti sanüh hi tümari Saküüwuowa sanaveh, thi mari tü eh nyiri sanaveh.

³⁴ “VÜWA thsüluo,” ta mari küsü nüh küsü küsosie wa nyu, nyutü küüzaluowa nyu, küpakenühnyunü mari aveh tü küzah vünüh aküji küju hi thsü naveh; hi nüh mari künakhie nojamtü naveh, thi mari kükhiemuo kümsheke le wa nyuthuoh kenüh, ta VÜWA nüh küza.

³⁵VÜWA nüh hakümjie küza veh, Thawa nüh arünyi tsü nü arülo vü küüwie lo thi asa thi awutsiri saküjeke nü arüza vü küüwie lo, thawa nüh juhküjiwa küke nü ma küüshüh wa tü akhisa kükhu lo, ma nyi tü VÜWA:

³⁶Mükütüküzü amahnyo saküpeke küsa hamari tü küsuokürho ehtüvü nüh münyie nüh sam nta thuoüji, Israel küshuküra tü akuoküji sana küsa eh tüvü nüh küsuokürholem wie na thuoh.

³⁷VÜWA nüh hakümjie küza veh: Mükütüküzü atülü anyiehwa tü küte ra thuoüji, thi azhih kükhu vü ajupewa tü phahzura thuoüji, Israel nüh saküm aveh kenüh hi nüh ma küshuküra aveh kulejam naveh, ta VÜWA nüh küza.

³⁸VÜWA kenüh Hananel khajie vünüh Ajuke kheri küjie anyujiwa salena küsa rülori tü tetsa wie thuoh, ta VÜWA nüh küza.

³⁹Thi küüte küsa kürhieh tü jüma nyiehvü nü kümsho Gareb küzhihoküju wa nü shele Goa vü ru naveh.

⁴⁰Aküsü kümora anyuo aveh thi awejiri, thi azhuh aveh wa nü Wadi Kidron kütso küju, zhieshu wuovü Rawuh kheri jühke küju. VÜWAvü küümtse naveh. Jümatü piketü müluzhu rathuoh nyutü vijarathuoh.