Read Pochuri Naga JEREMIA 32 Bible Online

JEREMIA 32 - Pochuri Naga bible

JEREMIA 32

¹ Judah kajiwa Zedekiah mahvi arawa VÜWA vünüh Jeremia vü azhü küru, jüma tü Nebukhadnezzar mahvi türatüzeawa.

²Jüma tsotho vü Babilon kajiwa thopahiri tü Jerusalem wu veh, thi setsaküthsüwa Jeremia tü Judah kajiwa ariekühuo zheh lovü rekheke sa veh,

³Judah kajiwa Zedekiah nüh rekhuokem. Zedekiah nüh, “Noh mokenüh setsaküthsüzhü phra taji: VÜWA nüh hakümjie küza veh: Hi nüh anyuji hama vi nü Babilon kajiwa ke vü thsemna thuoh, thi ma nüh jüma vim na thuoh;

⁴Judah kajiwa Zedekiah tü Khaldeara ke vünüh mürie küwa wa nyuthuoh, ma tü Babilon kajiwa ake vü tsü tsam wie na thuoh, jüti sanü künyito nyito ma sie azhü jüle thi anotha künguto sanü ma mütu na thuoh;

⁵ma nüh Zedekiah sie Babilon vü tewa nü hi nüh wa ma müjie küno küju nü ma jüla peh na thuoh; ta VÜWA nüh küza; nohri tü Khaldeari sie saluo wie ketünga müchara nüh sa naveh ülo?” ta küza.

⁶Jeremia nüh, VÜWA zhü tü hi vü ru:

⁷Noh püza atsa Hanamel noh vü ru na sa veh, thi ma nüh, “Anathoth vü eh zhuh pehküveh wa sü luo, awuhle vü nüh rhesanü küsü wa tü noh zhi wiethuoh,” ti küza.

⁸Thinü eh zhü Hanamel tü hi vü riehuori nüh huote küveh alo vü VÜWA zhü müzhe nü turu taji hi vü, “Benjamin azhih vü Anathoth vü pehküveh eh zhuhwa süluo, küpakenühnyunü awuleh vünüh kümkara thi kürhe sara tü noh zhi wiethuoh; noh mpa nüh süvi luo,” ti küza. Jüti küza vü jüma tü VÜWA zhüthuo ta küsa hi nüh thsüra.

⁹Jüti sanü hi nüh eh zhü Hanamel vünüh Anathoth vü azhuh wa süra, thi hi nüh amewa tü rakasa, türatürü küte nü na vübtsü.

¹⁰Phrazhu küsawa hi nüh tsüke thi tsükiem nü apovüwa vi, jü ti sanü amewa tü küto nü tsüm.

¹¹Jüti sanü hi nüh süküm küüroh tsükieküm wa awuleh vünüh kürathuoh zhü saküsawa thi lasi saküsawa vi,

¹²thi hi nüh povü küüroh wa tü eh zhü Hanamel; aküsü küroh sakütsü kütsüke povü küsari, thi ariekühuori alovü shupehküveh Judahri aveh tüvü nüh Mahseia atsa Neia atsa Barukh vü tsüm.

¹³Ma türi vünüh hi nüh Barukh vü azhüzho tsü taji,

¹⁴Kükhratsawa VÜWA, Israel Saküüwuowa nüh hakümjie küza veh: Povü küüroh hamari, tsükie povü küroh süküm nga thi müküsate hama nga ti atsotho hothake sa na küsa kenüh vi nü zhikütü lovü thsesaluo.

¹⁵Küpakenühnyunü akuoküjira VÜWA, Israel Saküüwuowa nüh hakümjie küüza kenüh: Azhehri, azhuhri, thi rhelivizhuhri tü azhih hala nüh sülehu na küveh kenüh.

¹⁶Süküm povü küürohri hi nüh Neria atsa Barukh vü tsüküm sevü VÜWA vü kükhuo sataji:

¹⁷O VÜWA Saküüwuowa! Atülü thi azhih, noh kükhra aküji thi noh piethsuo küüze vünüh küsawa tü noh nüh! Noh kenüh zanyoküsü nga kükhole nyu

¹⁸Noh tü mükükhaphrükhale küümze awule anyienyievü kütsatsati, thitü mari sevü nüh ma tsara thüchi vü avühra künakhie thuotsü leleti, O küji thi kümzho Saküüwuowa ma nyo tü akuoküjira VÜWA lie,

¹⁹noh küzhüphie jisheh thi küüroh nga müzho; ma notha tü anyi ra lekhuji aveh vü ko nü noveh, mari lehkhuji aveh müzhe nü thi mari nüh küüroh aviri müzhe nü ajisuo tsü.

²⁰Noh nüh Egypt zhih vü athsoshiri thi aküngori kütsa, thi nosü küju nga Israel vü thi anyi aveh vü kütsa veh, thi noh mpa nüh anyo küsü sanü mükütuo nüh nosü küju nga tse veh.

²¹Noh nüh noh nyi Israelri Egypt zhih vünüh athsoshiri thi aküngori vi nü, thi ake kükhra, thi apie thsuoküze nü, thi küümzhohphake vünüh sieru;

²²thi noh nüh azhih hama ma lanyiri vü tsü nta küüshie wa, tünüjuh thi awejuh liküveh azhihwa vi mari tsü;

²³thi mari tü ta nü jüma mükate. Thitü mari tü noh jikhi müküna nyutü noh khonyo mümzhe; noh nüh sa üta azhükütsü aveh, mari tü zanyoküsü nga müsa. Jükenüh noh nüh kümsü hamari aveh hiri vü küüru samthuoh.

²⁴Noluo, anyujiwa vi nta ma vü aküwuri tse thuoh, thi anyujiwa tü anyuchuwa, kümtuwa tü mari sie saluo küveh Khaldeara ke vü tsüm thuoh. Noh mpa nüh küngula, noh nüh mowa küza nüh jüma tü samthuoh.

²⁵Thitü, noh tü, O VÜWA Saküüwuowa nüh hi vü, “Ame vi azhuh wa sü nü apovü vi luo,” ta küza. Ma mpa nüh anyujiwa tü Khaldeara ke vü thsemthuoh wie ketünga.

²⁶VÜWA zhü tü Jeremia vü ru taji:

²⁷Noluo, hi tü VÜWA, anyiri kürho aveh Saküüwuowa mowa eh kenüh kho veh lo?

²⁸ Jükenüh, VÜWA nüh hakümjie küza veh: Hi nüh anyuji hamasü Khaldeara ke vü thi Babilon Kajiwa Nebukhadnezzar ake vü thsem nti sa vehthuoh, thi ma nüh jüma tü vi wie na thuoh.

²⁹Anyuji hama sie saluo küveh Khaldeari tü ru nü anyih zhuke taji tsom naveh, azheh aluomuo khiema vünüh Baal vü kükhurü sa thi nyiaza küpari vü kükhurü küshoke nü eh rü sakümtho,

³⁰küpakenühnyunü Israel thi Judah nyiri tü zanyo küpa küsa nyunü mari kürünguo vünüh eh notha vü kümsü sakütse wie; Israel nyiri tü zanyo küpa küsa nyie nü mari ake nüh küsa ri vi eh rü saküshu, ta VÜWA nüh küza.

³¹Anyuji hama nüh eh rüküshu thi eh rükümtho saküüluo tü ma küsate vünüh nosü küju wie, jüti sanü eh notha küngu vünüh viküja nta sa küveh wiethuoh,

³²küpakenühnyunü Israel nyiri thi Judah nyiri nüh kümsü küsa kenüh wie, mari nga, mari kajiri thi mari küjiri, mari navüri thi mari setsaküthsüri, Judah satsari thi Jerusalem vü arhie ri aveh khe wie.

³³Mari tü hi vü mari nyieh müküprüke nüh kümse küprükem thuoh; hi nüh mari sosie huoru wie ketünga mari tü küüna wa nyu thi saküümsho küvi wa nyu.

³⁴ Mari nüh mari kükre vi azheh eh nyo saküvehwa vü sakesanü jüma sakümnem thuoh.

³⁵ Hi nüh mari vü azhü mütsü wie ketünga, nyutü akükre hama müsaji mümhie ta sanü Judah saküükhiemuo eh müshe lovü müturu ketünga mari nüh Molek vü ma tsa nyimpari thi nyimzari vi khurü nta Hinnom atsa anyuo vü Baal azhie kümsieri sake.

³⁶Khinyi jükenüh VÜWA, Israel Saküüwuowa nüh küza veh, anyuji hamawa kenüh noh nüh, “Jümatü Babilon Kajiwa ke vü anyuchuwa vünüh, kümkhuoji vünüh thi sahnakükho vünüh thsemthuoh,” ta küza.

³⁷Noluo, hi nüh eh rüküshu vünüh thi eh rükümtho vü nüh thi ehlo mküzhe aküji vünüh mari zhejaküm azhih aveh vünüh hi nüh mari sazhuh na thuoh; hi nüh mari sie azhih hala ru le naveh, thi hi nüh mari kütote vünüh saküüpeh naveh.

³⁸Mari tü eh nyiri sanaveh, thi hi tü mari apa sanaveh.

³⁹Hi nüh mari tü luoveh küsü thi lehkhuji küsü küüsanü tsotho aveh hi küükrü naveh, makeri’a nüh nga thi ma seri vü ma tsari kenüh nga ti kümhie satsü naveh.

⁴⁰Hi nüh mari sie nü küsükürho kütsathuozhü küsü sasanaveh, mari vü kümhie küsa vünüh asevü kütsekelewa nyuthuoh; thi mari luoveh lovü eh kükrü thsemtü naveh, jüüta thuoüji mari tü hi vünüh kürele teküwa nyuthuoh.

⁴¹Hi nüh mari vü kümhie küsa nyierakhruo naveh, thi hi nüh eh luoveh aveh thi eh kürholi aveh vi nü zhütsa nyitsa taji azhih hala mari shie naveh,

⁴²küpakenühnyunü VÜWA nüh hakümjie küza veh: Hi nüh anyi hamari atüvü kümsü aküji aveh vi küru üta, hi nüh mari vü amüngu kümhie aveh, hi nüh khinyi küphrahzhu kümjie viru naveh,

⁴³Nohri nüh küüzo jamthuoh anyiri, nyutü samwa nüh rhom veh thuoh; Khaldeara ke vü tsümthuoh ta küza küveh azhih hama azhuhri tü sünaveh.

⁴⁴Azhuhri tü ame nüh sü naveh, thi saküsari tü Benjamin azhih vü, Jerusalem azhie aveh vü Judah nyujiri vü, küzhiho nyujiri vü, Shefela azhih vü nga, thi Negeb azhih vü nga kütsüke thi kütsükie thi apovü vi kheh naveh; küpakenühnyunü hi nüh mari müngu satsüle na küveh kenüh, ta VÜWA nüh küza.