Read Pochuri Naga JEREMIA 34 Bible Online

JEREMIA 34 - Pochuri Naga bible

JEREMIA 34

¹ Babilon kajiwa Nebukhadnezzar thi ma thopahiri aveh thi azhih vü kajiperi aveh thi ma kükhu vü küpeh aveh nüh Jerusalem thi ma nyujiri aveh sie saluo küveh vü, VÜWA vünüh Jeremia vü azhü hama ru:

²VÜWA, Israel Saküüwuowa nüh hakümjie küza veh: Judah kajiwa Zedekiah vü wa nü küza luo: VÜWA nüh hakümjie küza veh: Hi nüh anyuji hama vi Babilon kajiwa ake vü thsem nathuoh, thi ma anyih vi nü tsom na thuoh,

³Thi noh wienga ma ke vünüh küterawa nyu nü noh revehm wie nü ma ke vü thsem naveh; noh tü Babilon kajiwa sie anotha thi atso künguto luo sanaveh; thi noh tü Babilon vü wa naveh.

⁴Tü VÜWA zhü künaluo, O Judah kajiwa Zedekiah! VÜWA nüh noh kenüh hakümjie küza veh: Noh tü anyuchuwa vünüh küsüwa nyu;

⁵noh tü luoveh kürüzi vünüh sü naveh. Noh lanyiri thi kajiri noh tüvü rhoküruri kenüh küüngukümie kütso üta mari nüh noh kenüh küüngu kümie tso nü rümuo taji, “He, VÜWA tü,” ta sanaveh. Küpakenühnyunü hi nüh küza kümthuoh kenüh, ta VÜWA nüh küza.

⁶Thinü setsaküthsüwa Jeremia nüh azhü hamari aveh Jerusalem vünüh Judah kajiwa Zedekiah vü küza,

⁷Babilon kajiwa nüh Jerusalem thi Judah nyuji kükhe küsa Lakhish thi Azeka ti siesaluo, küpakenühnyunü hamari tü Judah nyuji shieku sanü kükhe küsari kenüh.

⁸Kajiwa Zedekiah nüh Jerusalem nyiri aveh sie kütsathuozhü küsü sanü mari küphrazhu küzhüchü küsa ase vü nüh Jeremia vü VÜWA zhü küru,

⁹aveh wie nga mari Ibrira tükhari, nyimpa nga nyimza nga küshum luo, jüta küsa vünüh nyi küsü nga Judea küpari vi atükha vü müsanüh sana küvehthuoh kenüh.

¹⁰Thi nüh mari aveh nga, aküjiri aveh, thi anyiri aveh kütsathuozhü küsa lovü küturi aveh thuoüji mari tükhari nyimpari nga nyimzari nga küüshu nathuoh ti sa, jüta küsa vünüh mari tü atükha müsale nüh sana küveh thuoh kenüh; mari tü azhü küna nü küshu khehm.

¹¹Thitü asevü thuoüji mari tü kürele na kheh nü mari nüh küze kümri tükha nyimpari nga nyimzari nga vishuletewa kheh, thi atükha kükhu vü sieteru le.

¹²VÜWA vünüh Jeremia vü ma zhü küru:

¹³VÜWA, Israel Saküüwuowa nüh hakümjie küza: Hi nüh noh lanyiri tü Egypt zhih vü tükha küsa zheh vü nüh siezhu küru vü hi mpa nüh mari sie kütsathuozhü küsü sataji,

¹⁴ “Mahvi türü kürüzhu nohri nyi küsüsü wie nga Ebriri nohri vü zhu nü mahvi türo nohri kütsü sateküruri küshumünji mümhie,” ti küza. Thitü noh lanyiri tü eh zhümküna nyutü mari khüna hi vü mükümrheke.

¹⁵Nohri wie nga münüthe luovehkhaphrü nü eh notha vü mowa nü mühie nüh sataji küsü nüh küsü vü kürüzi küngura küphratezhü zhüchüh taji eh nyo vünüh küji azhewa eh tüvü nüh kütsathuo zhü küsü sasa;

¹⁶thitü kümngu üta müzhe taji nohri nüh küze kümri tükha nyimpari nga thi nyimzari nga vile nü eh nyo mari sie sheleru nü nohri nüh mari sie sheleru nü tükha kükhu vü thsem le thuoh.

¹⁷Jükenüh VÜWA nüh hakümjie küza veh: Nohri nüh noh zhephru thi noh jüri vü satsü nü jaküze taji eh zhü müvi nüh sakümthuoh kenüh hi nüh jaküüze küsü satsü naveh, jüma thuoüji, anyuchuwa vü, sahna kükho vü thi kümkhuoji vü küze naveh. Hi nüh nohri tü azhih vü kajipe aveh vü küümzhoh phakem naveh.

¹⁸Thi eh kütsathuozhü küphrüri thi mari nüh eh tüvü nüh kütsathuozhü saküsa rühleri kümzheri thuoüji mari nüh mieshüzah kütethuo künyi sanü jümasü azhie vü tseküwa kümjie satsü naveh:

¹⁹Judah küjiri, Jerusalem küjiri, kütsüküünari, anavüri, thi azhih jüla anyiri aveh thari nüh mieshüzah tethuoküsa künyi azhie lovü tsewa nüh,

²⁰jümari thuoüji mari mükünongüri thi mari kürho phaküvehri vü tsüm naveh. Mari kümotü amürhü vü amüwari thi azhih vü samwara shie küsam naveh.

²¹Thi Judah kajiwa Zedekiah thi ma küjiri thuoüji hi nüh mari mükünongüri thi mari kürholi phakütseri vü tsüm naveh, Nohri vünüh viteküwa Babilon kajiwa nyilari vü tsüm naveh.

²²Hi nüh azhütsüm na sa vehthuoh, hi nüh anyuji hala mari sieru le naveh; mari nüh jüma sie saluo nü vitewa naveh, thi tsom naveh. Judah anyu thuoüji mükürhie nüh hi nüh jaküüzom naveh, ta VÜWA nüh küza.