Read Pochuri Naga JEREMIA 35 Bible Online

JEREMIA 35 - Pochuri Naga bible

JEREMIA 35

¹Josiah atsa Judah kajiwa Jehoiakim rülo vü VÜWA zhü Jeremia vü küru

²Rekhabri azheh vü wa nü mari vü küza taji VÜWA zheh awiepa küsü vü sieru luo; thi akhah vi mari tsü küüzhu luo.

³Jükenüh hi nüh Habazzinia azhü Jeremia atsa Jaazania thi ma nüri, thi ma tsari aveh thi Rekhabra zhehlori aveh sietewa.

⁴Hi nüh mari tü Saküüwuowa anyi Igdalia atsa Hanan atsara wiepa VÜWA zheh vü sieru, jüma tü aküjira wiepa kütuoh vü, Shallum atsa Maaseiah, akhepie kühuowa vü sie ru

⁵Jüti sanü hi nüh Rekhabra atü vü ake akhah küpro thi ahuo ti sanü mari vü, “Zhu luo,” ti küza.

⁶Thitü mari nüh, “Hiri nü akhah küzhuwa nyu, küpakenühnyunü hiri anyi Rekhab atsa Jonadab nüh hiri vü azhü tsü taji, ‘Nohri tü piketü akhah küzhuwa nyu, nohri thi noh tsari nga;

⁷nyutü nohri tü azheh küsü wie nga müsa ra, nyutü mahtsü müzhuhra; nyutü rhelivi müshiera, nyutü küsü wie nga müpeh tüm, tü noh rülori aveh ajuhthsüzheh lovü rho luo, jüta küsa vünüh nohri nüh rhoküveh azhih vünüh arülo hozake rhora na küveh kenüh,’ ti küza.

⁸Hiri anyi Rekhab atsa Jonadab nüh hiri vü azhühkho kütsü, hiri kürho ajü hiri nga hiri vüvühri nga, hiri tsari nga hiri tsavühri nga akhah küsanga müzu tüm üta küsa hiri tü künam thuoh,

⁹thitü rho na küsa kenüh azheh müsa tümluo. Hiri tü rheluvizhuh nga, azhuhtsa nga thi atsü nga münyie;

¹⁰thitü hiri tü juhthsüzheh lovü rho nü hiri anyi Jonadab nüh hiri vü azhü kütsü küna thi aveh sa kheh.

¹¹Thitü Babilon kajiwa Nebukhadnezzar nüh shuhru nü azhihwa sie küsaluo vü hiri nüh, ‘Raluo, hiri Khaldeara thopahiri thi Aramera thopahiri kükrü kenüh Jerusalem vü tewa ünüh,’ ti küza. Jükenüh hiri tü Jerusalem vü rho veh,” ti küza.

¹²Thi nüh VÜWA zhü tü Jeremia vü ru:

¹³Kükhratsawa VÜWA, Israel Saküüwuowa nüh hakümjie küza: Wa nü Judah nyiri thi Jerusalem vü arhieri vü küza luo, Nohri tü eh zhü küünawa nyu ülo? ta VÜWA nüh küza veh.

¹⁴Rekhab atsa Jonadab nüh ma küshukürari vü akhah küsü nga müzhu tüm üta azhü kütsüwa: viwa ra tsa; thi mari tü nosü küju nga müzhu wie, küpakenühnyunü mari nüh mari anyi nüh azhü kütsü küvi kenüh. Thitü hi nüh nohri vü küza küpehwuoh vü eh zhü müvi nta.

¹⁵Hi nüh mükütuo nüh eh siepe setsaküthsüri aveh nohri vü küze taji, “Nohri nyi küsüsü nga nohri kümsü lehkhuji vünüh sühle nü nohri nüh mari saküveh nyiazara se nyi müwa tüm, jüta thuoüji nohri tü hi nüh nohri vü thi noh nyiri kütsüwa zhih vü rho naveh,” ti küza. Thitü nohri nüh nohri küna mükümrheke nyutü eh zhü müvi nüh sam.

¹⁶Rekhab atsa Jonadab küshukürari tü mari anyi nüh azhükütsü viwara, thitü anyi hamari nü eh zhü müvi.

¹⁷Jükenüh, VÜWA, akuoküjira Saküüwuowa, Israel Saküüwuowa nüh hakümjie küza veh: Hi nüh Judah vü thi Jerusalem vü arhieri aveh vü hi nüh mari vü phrahte zhu küsa sahnakükho aveh viru naveh; küpakenühnyunü hi nüh mari vü küza thuoh tü mari nüh müküna kenüh, hi nüh mari jithuoh tü mari nüh mükühu.

¹⁸Thitü Rekhabra zhelori vü thuoüji Jeremia nüh: Kükhratsawa VÜWA, Israel Saküüwuowa nüh hakümjie küza veh: Nohri nüh nohri anyi Jonadab nüh azhüküsü küvi kenüh, thi ma nüh küsosiezhüri aveh kümzhera kenüh, thi ma nüh azhükütsü aveh küsathuoh a kenüh,

¹⁹akuoküjira VÜWA hakümjie küza veh: Rekhab atsa Jonadab küshurawa tü tsotho aveh eh tüvü tsie na küsa küzülo wa nyu.