Read Pochuri Naga JEREMIA 4 Bible Online

JEREMIA 4 - Pochuri Naga bible

JEREMIA 4

¹“Mükütüküzü noh nüh sühle nta thuoüji, O Israel, ta VÜWA nüh küza, hi vü müsühle üji mümhie, mükütüküzü noh nüh eh tsatü vü nüh noh kükre vijam thuoüji, thi mükütseletseza thuoüji,

²thi mükütüküzü noh nüh küshie thuoüji, VÜWA nüh rhoküveh üta, küzhütsa vünüh, kümsho vünüh, thi künyitsa vünüh, jüta thuoüji akuoküjiri tü mari mpa nüh ma vü nüh tsia naveh, thi ma vünüh mari tü tholathovü naveh,”

³ küpakenühnyunü VÜWA nüh Judah nyiri vü thi Jerusalem vü arhieri vü: noh zhito khahu müküsari khahu luo, thi rüzhü za vü müzhukhe tümluo.

⁴Nohri mpa nüh VÜWA vü ahu tsiluo, nohri luoveh ahu thsopowa vijam luo, O Judah nyiri thi Jerusalem vü arhieri; eh rükümtho anyih kümjie müjie shuküwa vünüh, thi nyi küsü nga pemkünera nüh sanü müjie kütso vünüh, nohri nüh kümsü küsa kenüh, ta küza.

⁵Judah vü küzazhuluo, thi Jerusalem vü zhüchüh taji küza luo, azhih jüla aveh vü tütü khu küze luo; zie kümsie nü küza luo, “Sehzhu luo, thi kürü nü ashieku nyujiri vü wa ünüh ashiekunyujiri vü wa ünüh raluo,” ti küza!

⁶Zion wuovü amüke khake luo, küloji kenüh te luo, müpeh tümluo, küpakenühnyunü hi nüh zhietü wuovü nüh kümsü vikütse kenüh, thi küzoriezosa aküji vikütse kenüh.

⁷Amiewuo küsü tü ma küremoke vünüh kuotsezhu wa thuoh, akuoküjiri küzoriewa küsü shuwathuoh; noh zhih jaküümsü na küsa kenüh ma pe vünüh tsezhu wa thuoh; noh nyujiri tü mürhie nüh feriem nathuoh.

⁸Hama kenüh noh tü atsakie vi tseke luo, rümuo thi reraluo; küpakenühnyunü VÜWA aheküze rüküshu tü hiri vünüh sühletemküwa kenüh, ti küza.

⁹“Jüma rülo vü, ta VÜWA nüh küza, luovehküji tü kajiwa thi kajitsari vü müpeh ra nüh sam nathuoh; anavüri tü azühnge thi setsaküthsüri tü ngothe mthuoh”

¹⁰Jüti küsa vü hi nüh, O, VÜWA Saküüwuowa, noh tü anyi hamari thi Jerusalem müram taji, jüma tü noh kenüh mühie naveh, ta küza taji, anyuchuwa tü mari kürho tsatsa vü jie veh thuoh, ta küza.

¹¹Jüma tsotho vü anyi hamari vü thi Jerusalem vü, areza vü azhiekümsie kümtse vünüh amürhü aküsa küsü eh nyira tsavüriwuovü mürhüwathuoh, hekümtse nyutü sakütse nta küsa kenüh nyu,

¹²Amürhü aküpro küsü eh kenüh tse veh. Mari rügi vü ashih küphratewa tü hi nüh.

¹³Halie, ma tü akülu kümjie vünüh tse, ma rawuhkheka tü nyiazamrhü kümjie; ma rawuhri tü aluo mnyieh vü nüh müphiam we, hiri amngukümseri, küpakenühnyunü hiri tü ferie kümthuoh kenüh!

¹⁴O Jerusalem, kümsüküsa vünüh noh luoveh phrühjam luo, jüta küsa vünüh noh tü külolera na küveh kenüh. Noh nüh kümüsü kümhie tü küthake noh lovü küüpeh nti lo?

¹⁵Küpakenühnyunü akhi küsü Dan vünüh küzazhu veh thuoh, thi Efram küzhi vünüh kümsü zhü ziaveh thuoh.

¹⁶Ma tsa ta küsa akhuojiri vü hamna tsü luo; Jerusalem vü küthsütsüluo, “Azhih kületsuo vünüh kümkiesheri tsethuoh; Judah nyujiwa vü zie nü tse thuoh.

¹⁷Azhuh kühuori kümjie mari tü awuowuo ma mükieshemthuoh, küpakenühnyunü ma nüh hi sie wuluoküm kenüh, ta VÜWA nüh küza.

¹⁸Noh lehkhujiri thi noh nüh küsari tü noh rügi vü virumthuoh. Hamatü noh küpoka thi jüma tü kham; jüma tü noh mpa noh luoveh vü juvehthuoh.”

¹⁹Eh müsheküna, eh müsheküna hi tü a küna vünüh kürümthuoh! O, luoveh azieri! Eh luoveh tü tietie ta khashehm wiethuoh; hi tü zota müpera wiethuoh, küpakenühnyunü hi tütü khi küünara kenüh, arie kümjimluo.

²⁰Amngu kümsü asevü amngukümsü, azhih ajüh tü kümsü jamthuoh. Zhürüluo eh juhthsüzheri tü zorie mthuoh, eh küzieteri pikezie vünüh.

²¹Hi tü arie mükükhetera küthake ngupeh nalo, thi tütü khi küna peh na lo?

²²“küpakenühnyunü eh nyiri tü zanyo mthsü nüh samthuoh, mari tü hi müthsü nüh sam,” mari tü küzhehphro atsari, mari tü küthsükümshi münyie nüh sam, mari tü kümsü küsa mütsam, thitü mokümjie kümhie sanaveh ünüh mari tü müthsü.

²³Hi nüh azhih vü noküze, thi halie, jüma tü kürütso thi küzorie mpa; atülüri vü noküze, thinü jümari tü aküwie münyie nüh sam.

²⁴Hi nüh aküzhiri rürih vü noküze, thuo ünüh halie, jümari tü küzhüh tse veh, thi küzhihori aveh tü kelekeza veh.

²⁵Hi nüh noküze, thi nü halie, nyi küsü nga münyie luo, thi amürhü vü amüwari aveh tü prütewa kheh.

²⁶Hi nüh noküze, thinü halie, thsovi khielota küpe azhihwa tü shünyiza sam, thi ma nyujiri aveh tü VÜWA tüvü ma he arüküshu atü vü ferie khehm thuoh,

²⁷küpakenühnyunü VÜWA hakümjie küza veh; “Azhih ajü tü küüzom na thuoh; tü hi nüh asehkhe küüsajawa nyu.

²⁸Hama kenüh azhihwa tü krienaveh, thi atülüri kümsie vü tü nyimnaveh; küpakenühnyunü hi nüh phrahte kümthuoh kenüh, hi nüh kürathuo mthuoh; hi tü küüpelewa nyu, nyutü asevü küsühlewa nyu,” ta küza.

²⁹Rawuhnyiri thi lawiküvira zhüküünga nüh anyuji aveh tü prütewa khehthuoh; mari tü küremoke lovü tetuthuoh; mari tü alokrüri azhie vü müritewa thuoh; nyujiri aveh kulemthuoh, thi nyi küsü nga kürho sam veh thuoh.

³⁰Thi noh, O kuleja kümwa, noh nüh kümru vi thsümünyi saküveh tü noh tü ma zhünyo mowa lo, noh nüh suna süriesüvo vi noh mpa noh küte kü veh, noh nüh noh notha thseküüji küveh? Momaküsa vünüh noh mpa noh saküzü küveh wie. Noh külori tü noh mamthuoh; mari tü noh kürho phahveh thuoh,

³¹küpakenühnyunü hi tü krevüri atsaküna küzie üta küna ra, krevüri küsü nüh ma tsa apokhuwa wuo kütsa amüsheküna üta, Zion tsavühri küzie tü arütho sazhile veh, make thsuo zhu taji, Hi amngukümsewa! Hi tü küfetheri atüvü nojitemthuoh, ta VÜWA nüh küza.