Read Pochuri Naga JEREMIA 40 Bible Online

JEREMIA 40 - Pochuri Naga bible

JEREMIA 40

¹Rieh huo zhezhiwa Nebuzaradan nüh Rama vünüh Jeremia küzeküm sevü, ma nüh vü amürükie nüh ma khete nü sieteküwa Jerusalem thi Judah aküsiri aveh Babilon vü revi teküwari sie nü teküwa asevü nüh VÜWA zhü Jeremia vü küru.

²Rieh huo zhezhiwa nüh Jeremia sie taji, VÜWA noh Saküüwuowa nüh kümsü hama vi nü azhie hama sakükrümthuo;

³thi VÜWA nüh hama viruthuoh, ma nüh küüza üta sa thuoh, küpakenühnyunü nohri aveh tü ma vü khiemuomthuoh thi ma jikhi müvi nüh sakümthuoh kenüh. Jükenüh zanyo hama tü nohri vü rumthuoh.

⁴Khinyi noluo, hi nüh nosü noh kevü mürükie vünüh küshuvehthuoh ünüh. Mükütüküzü noh nüh hi vü Babilon vü nyiru nta thuoüji raluo, hi nüh kümhieta noh no naveh ünüh; thitü mükütüküzü noh nüh hi vü Babilon vü müru ngü thuoüji, mosie “nüh müru tümluo. Noluo, azhih ajü tü noh tüvü pehveh, tinü khie wuovü wa üji mhie naveh, nyutü kato naveh ünüh waluo.

⁵Mükütüküzü noh nüh peh nta thuoüji Shafan azhü Ahikam atsa Gedalia vü shele tewaluo, Babilon kajiwa nüh Judah anyu vü kümkhrüwa sa üta chiekemthuoh, ma vü anyiri azavü peh luo; nyutü khiewuovü wa üji kükato müshe veh ünüh waluo,” ti küza. Jüti sanü rieh huo zhezhiwa nüh kütsaküzhu keluo tsü thi akütse küsü tsü.

⁶Jüsevü Jeremia tü Mizpa vü Ahikam atsa Gedalia vü tewa nü azhih jüla anyi kükhe küsara za vü nyipeh tewa.

⁷ Jüti küsa vü nyuji alievü kütse arienyira sierhüri thi mari riekhuori nüh Babilon kajiwa nüh Ahikam atsa Gedalia tü azhih jüla kümkhrüwa vü chieke, thi ma vü nyimpari nga thi nyimzari nga, thi atsari nga, Babilon reviteküwa vü sietem küwa azhih jüla kümkhuori tü ma vü phrake khehmthuoh ta küünara vü,

⁸anyi hamari Mizpa vü Gedalia vü wa: Nethaniah atsa Ishmael, Karea atsa Johanan, Tanhumet atsa Seraia, Netofatri Efai atsari, Makatri atsa Jezania, mari thi mari nyiri, ti wa.

⁹Shafan azhü Ahikam atsa Gedalia tü mari vü mari nyiri vü küshie taji, “Khaldeari kütsü sana küsa mükrü tüm luo. Azhih jüla peh luo thi Babilon kajiwa kütsü sa ti thuoüji nohkeri nüh mhiera naveh ünüh.

¹⁰Eh kenüh thuoüji hi nü Mizpa vü peh nü thari nüh hiri vü ru naveh ünüh nohri kenüh Khaldeara tüvü peh veh thuoh; thitü nohri kenüh thuoüji nohri sieteküwa anyu vünüh akhah, müzhü thsoviri thi vüjuh vizhuh nü nohri küfüri lovü vizhuh sanü rho luo,” ti küza.

¹¹Jüti küsa Judeari Moad vü thi Amonri aza aveh vü thi Edom thi azhih küpari nga ti Babilon kajiwa nüh kümto küsü Judah samthuoh ta küsa thi Shafan azhü Ahikam atsa Gedalia tü mari anyieh vü kümkhrüwa chiekemthuoh ta künara kheh,

¹²thinü Judahri aveh tü mari zheküvohrie küm azhieri vü nüh Judah azhih, Mizpa Gedalia vü sheleteru; jüti sanü mari tü akhah thi müzhü thsoviri tü küüsheküsha vünüh vizhuh khe.

¹³Karea atsa Johanan thi arienyira asierhüri aveh nyuji alievü küpehri tü Mizpa vü Gedalia vü ru,

¹⁴thi ma vü, “Amonra kajiwa Baalis nüh kürholi vi üta Nethaniah atsa Ishmael küzeküm noh tü thsü veh ünüh nyu lo?” ti küna. Thitü Ahikam atsa Gedalia tü mari mütsotü nüh sam.

¹⁵Thinü Karea atsa Johanan nüh küüzhe vünüh Mizpa vü küpeh Gedalia vü küza taji, “Münathetü hi küze nü Nethaniah atsa Ishmael küüzothem jie, nyi küsü nga küthsüwa nyu nüh. Mokenüh ma tü noh kürholi küvi na lo, jüüta thuoüji Judeari noh mükieshe nü rho küvehri tü vohriem nathuoh, thi Judah kümtori tü müpohkah nüh sam naveh ülo?” ti küza.

¹⁶Thitü Ahikam atsa Gedalia nüh Karea atsa Johanan vü, Noh tü zanyo hama müsara, küpakenühnyunü noh tü Ishmael zhüku rie nü küza veh ünüh, ti küza.