Read Pochuri Naga JEREMIA 41 Bible Online

JEREMIA 41 - Pochuri Naga bible

JEREMIA 41

¹ Asa türüawa, Elishama azhü Nethaniah atsa Ishmael tharuo kürhietsie, kaji lehvü aküjiri küsü tü anyi türake sie nü Ahikam atsa Gedalia vü Mizpa vü ru. Mari tü Mizpa vü kürü nü lohse tsa,

²Nethaniah atsa Ishmael thi ma sie kütse nyi türakeri ti süra nü anyuchuwa vi Shafan azhü Ahikam atsa Gedalia rehküzeh nü zothem, küpakenühnyunü Babilon kajiwa nüh ma tü azhih jüla kümkhrüwa küüsa küchieke kenüh.

³Ishmael nüh Mizpa vü Judeari Gedalia vü nyi küpehri aveh zothe kheh kümsa, thi Khaldea arienyiri nüh jüla pehtewa.

⁴Gedalia küfethe rülo vü, nyi küsü nga müjie küthsü atüvü,

⁵Shekhem, Shilo thi Samaria vünüh anyi zerake, mari khüne sevü, mari thsümnyi krih, thi mari sümo tü tsiphie naveh, ti sanü VÜWA kükhurüzheh vü atha, thi asierhe kükhurü tsü nti vüru.

⁶Thinü Nethaniah atsa Ishmael tü mari mütu nti Mizpa vünüh tsezhuru. Ma nüh mari kümtu vü ma nüh mari vü, “Ahikam atsa Gedalia vü raluo,” ti küza.

⁷Mari tü ru anyuji azhila vü ju ünü Nethaniah atsa Ishmael thi ma sie pehküvehri nüh mari müwiethe khehm nü ajeku lovü khajake khehm.

⁸Thitü mari azhievü anyi türakeri nüh Ishmael vü, “Hiri müfethe tümluo, küpakenühnyunü hiri tü hiemtha, khuozhi kürümie, vüjuh thi awejuh küvizhuh atovü küthi sa veh ünüh,” ti küza. Jükenüh ma tü küzhim nü mari riehkhuori sie müfethe nüh sam.

⁹Ishmael nüh anyi fethe nü mari kümo khaküjake ajekuwa tü aküjitsatsa, Kajiwa Asa nüh Israel Kajiwa kenüh kütote sa; Nethaniah atsa Ishmael nüh ma nüh küfethera kümo vi ajeku jüma saküprom.

¹⁰Jüti sanü Ishmael nüh Mizpa vü anyi küpari aveh thuoüji aküsi vü sietewa, kajiwa tsavühri thi Mizpa vü küsa anyiri aveh, rieh huo zhezhiwa Nebuzaradan nüh Ahikam atsa Gedalia vü phrakekümri aveh sietewa. Nethaniah atsa Ishmael nüh mari aküsi vü sietewa nü Amonri kari nti sietewa.

¹¹Thitü Karea atsa Johanan thi ma sie pehküveh ariera sierhü aveh nüh Nethamia atsa Ishmael nüh khonyo vüriekümri aveh küünara vü,

¹²mari tü mari nyiri aveh sie nü Nethaniah atsa Ishmael sie saluo nti wa. Mari tü Gibeon vü küpeh ajuhkhre aküjiwa vünüh ma vü ru.

¹³Jüti küsa vü Ishmael sie kütse anyiri aveh nüh Karea atsa Johanan thi ma siekütse ariera sierhüri aveh küngu vü mari tü alowiekheh.

¹⁴Jüti sanü Ishmael nüh Mizpa vünüh anyiri aveh aküsi vü sieteküwari tü küprüle nü shele teru taji Karea atsa Johanan vü teru kheh.

¹⁵Thitü Nethaniah atsa Ishmael thuoüji nyi tüze sie nü Johanan vünüh mürie taji Amonri vü tewa.

¹⁶Jüti sanü Karea atsa Johanan thi ariera sierhüri aveh tü Nethaniah atsa Ishmael nüh Mizpa vünüh aküsi vü sietekütse, ma nüh Ahikam atsa Gedalia fetheküm sevü nüh, arienyiri, nyimzari, atsari, thi müjazakümri Gibeon vünüh Johanan nüh sieshele ru.

¹⁷Mari tü Egypt vü wa nti müshe nü tseshu ru taji Bethlehem kütuoh vü Geruth Chimham vü pehtewa,

¹⁸küpakenühnyunü Khaldeari kenüh; mari tü mari krüküm kenüh, küpakenühnyunü Nethaniah atsa Ishmael nüh Ahikam atsa Gedalia Babilon kajiwa nüh ma vi wa nü azhih kümkhrü küsa wa fethe küm kenüh.