Read Pochuri Naga JEREMIA 48 Bible Online

JEREMIA 48 - Pochuri Naga bible

JEREMIA 48

¹ Moab kenüh. Kümsietsa VÜWA, Israel Saküüwuowa nüh hakümjie küza veh: Ehzah Nebo kenüh, jüma tü jakümsümthuoh nü! Kiriathaim tü küzükrü vü thsemthuoh, jüma tü vitewathuoh; ashiekuwa tü küzükrü vü thsemthuoh thi zokhuoriemthuoh;

²Moab küthorawa tü münyiethuoh. Mari nüh Heshbon vü ma kenüh küsü rüzhe: Raluo, akuoküji küsa vünüh hiri ma tethuom ünüh, ta sa. Noh nga, O Madmen tü küüzoh vü viru sam naveh; anyuchuwa tü noh zhe naveh.

³Künaluo! Horonaim vünüh kükrie khi, “Küzorie aküji,” ti sa!

⁴“Moab tü zoriemthuoh,” ti sa! Ma tsa aküzahri tü krie zhu teru.

⁵Luhit tekükhru kenüh khielota krie nü tsekhru; Horonaim tekükhru kenüh amüshe kümnomna amüsheküna kükrie künara.

⁶Te luo! Nohri mpa külole luo! Shünyiza vü reza rawuhzah kümjie saluo!

⁷Azhütsa, noh nüh shiekukümzho thi künyirhieri alehküno kenüh, noh nga vitewa na thuoh; Khemosh tü resieteküwa vü tsezhu tewa na thuoh, ma navüri thi ma sieküpehri sie nü.

⁸Küzoriewa tü anyu küsüsü vü ru naveh, thi anyu küsü nga mümrie ra; anyuowa tü pokahm naveh, thi kütakewa tü zoriem naveh, VÜWA nüh küzaküm üta.

⁹Moab kenüh amütsü athuo sasaluo, küpakenühnyunü ma tü külu tsam na küveh kenüh; ma nyujiri küzoküzam na küvehthuoh kenüh, jümari vü kümrhie müpeh nüh sam na thuoh.

¹⁰VÜWA zhuh küroh phe kütsewa vü tü kümzü; thi azüh küüthüvünüh anyuchuwa asevü küvikelewa tü kümzü.

¹¹Moab tü ma küviza vünüh kürüzi wiethuoh, akhah kümjie ma küütsehkeri vü peh; ma tü aküfü küsü vünüh aküfü küsü mürütso wiethuoh, nyutü ma tü resieteküwari vü müwa; jükenüh ma rheküüngu tü peh wie thi ma rhe tü müzorie.

¹²Jükenüh atsotho tü tsetsa wie thuoh, hi nüh küüshori küze nü maküüsho naveh, ma küfü saküürütso, thi ma füjiri fekhuorie mtünaveh, ta VÜWA nüh küza.

¹³Israel zhehlori nüh mari küüzhezhü Bethel vü küpeh kenüh küzükrüra kümjie Moab tü Khemosh kenüh zükrü naveh.

¹⁴Nohri mokümjie, “Hiri nü küsarari thi arieküsa kükhrari,” ta küzara na lo?

¹⁵Moab thi ma nyujiri küzoriewa tü teshuru pehvehthuoh, thi ma küviza kürükatsari nüh kürhiethe nta kuowa thuoh, ta kajiwa nüh küza, ma nyo thuoüji thopahiri VÜWA.

¹⁶Moab kümsü tü shenyisheke pehvehthuoh thi ma lokürü tü mütsatso nüh tetsethuoh.

¹⁷Ma vü shükheke luo, nohri ma zhephruri, thi ma nyo küthsüri aveh; “Mokümjie kajikütsüh akükhrawa tü zoshimthuoh lo, Kütholathovü kütsühwa tü,” ta küza.

¹⁸Kütholathovü vünüh teturu luo, thi azhito küsa rügi vü shupeh luo, kükajipe vü küüpeh küsa Dibon tsa vühwa! küpakenühnyunü Moab küzoriewa tü noh sie saluo nta teshuhru pehküvehthuoh kenüh; ma nüh noh shiehkuri zoriemthuoh.

¹⁹Lehkhuji kütuohvü tsie nü nopeh luo, Aroer vü arhieri! Nyimpari nüh jotekütse thi nyimzari nüh mürie tekütse künaluo, “mowa sam lo?” ti künaluo.

²⁰Moab thuoüji küzükrü vü thsemthuoh, küpakenühnyunü jüma tü zokhuorie kümthuoh kenüh; rera thi krie luo! Arnon vünüh jüma küza luo, Moab thuoüji jakümsüm thuoh ünüh, ti küza luo.

²¹Ashih tü küzhihokütake zhih vü, Holon, Jaza, Mefat,

²²Dibon, Nebo thi Bet-diblathaim vü,

²³Kiriathaim, Betgamul, thi Betmeon vü,

²⁴Kerio, Bozra, thi Moab nyujiri kületsuo thi küshenyi aveh vü rupehvehthuoh.

²⁵Moab rütsü rehshimthuoh, thi ma pie tü zoshimthuoh, ta VÜWA nüh küza.

²⁶Ma sakümshem luo, küpakenühnyunü ma nüh ma mpa VÜWA vü saküüji kenüh; Moab tü ma küüwuo vü küünyi luo; ma nga riesa küükhriküsü samnathuoh.

²⁷Israel tü ma mpa nüh kürühutsara azavü remwa wie ketünga ma tü noh keri nüh riesa küükhri küsü samthuoh; thitü noh nüh ma zhükuküphrahte vü noh tü noh lü küze!

²⁸Anyuwari jam nü alokrü vü rholuo, O Moab vü kürhori! Mükhrietü nüh alopie küsü nyakuo nato vü aphra küsa kümjie saluo.

²⁹Hiri nüh Moab kürhiezarhiechi künara thuoh, ma tü rhieza shehm, ma sakümsiele kenüh ma kürhiezarhiechi, thi ma kükuotikuoshi kenüh, thi ma luoveh kükuoti kenüh.

³⁰Hi mpa wie nga nüh ma müküükhekünyi thsü, ma kükuotiri tü akürie, ma nüh küürohküsari tü akürie, ta VÜWA nüh küza.

³¹Jükenüh hi tü Moab kenüh rera veh; Moab aveh kenüh hi tü krie; Kirher nyiri kenüh hi nüh külu.

³²Jazer kenüh kükrie nyiehvü nüh hi nüh noh kenüh krie, O Sibma rhelivirhu Noh tsuonari tü juhküji zhi kari, Jazer küju wa; noh müzhü thsohviri thi noh rhelivi küzoriewa tü tsuotsakemthuoh.

³³Moab azhih avi khielota küpe vünüh aloküwie thi aloküzhe tü vitewathuoh; Hi nüh akhah kütsüzhupe vünüh akhah khemthuoh; nyi küsü nga loküzhe khi sanü rütsemvehthuoh; zie küvehwa tü loküzhe aküzie nyu.

³⁴Heshbon thi Elealeh tü kriezhuru; Jahaz küju nga mari jikhi ziephra, Zoar vünüh Horonaim thi Eglat-shelishiya küju küpakenühnyunü Nirim ajuhri wienga küzoh kümthuoh kenüh.

³⁵Thi hi nüh Moab vü azhie kümsieri vü küsahthuori thi mari nyiazari vü kükhurü küsari vü asehkhewa viru naveh.

³⁶Jükenüh eh luoveh tü Moab kenüh thi Khirherri kenüh pilechu kümjie rümuo veh; küpakenühnyunü mari nüh künyirhie künyierari tü pokahkümthuoh kenüh,

³⁷küpakenühnyunü alü aveh tü semthuoh thi akhane aveh tü sejamthuoh; ake aveh tü kütsiphieke pehm, thi aküshih vü atsakie külehteküm kenüh.

³⁸Moab luomuo rügivü aveh thi aluori vü kürümuo küchie nüh zanyoküsü nga münyie luo; küpakenühnyunü aküfü nyi küsü nga müküvingü zokhuo küm kümjie hi nüh Moab zokhuo kümthuoh kenüh.

³⁹Mokümjie jüma tü zokhuom lo! Mokümjie mari rera lo! Mokümjie Moab küzükrü vünüh ma seru tü kürele lo! Jükümjie vünüh Moab tü ma zhephruri aveh vü müküchie thi kümzhoh küsü sam thuoh.

⁴⁰VÜWA nüh hakümjie küza veh: Noluo, ma tü aluo mkümjie the turu naveh ünüh, thi Moab vü ma küsa shohta naveh ünüh;

⁴¹nyujiri tü vitewa naveh thi ashiekuri tü revim naveh. Moab arieküsara luoveh tü jüma rülo vü, nyimzari atsa küwuo küna luoveh kümjie sam naveh.

⁴²Anyiri üta Moab zoriem naveh, küpakenühnyunü ma tü ma mpa nüh ma saküji nü VÜWA küsaluo kenüh.

⁴³Kümzhoh azhikrie, apie jü ti noh tüvü huo veh, O Moab vü arhieri! ta VÜWA nüh küzaveh.

⁴⁴Kümzhoh vünüh joküteri aveh azhikrie lovü küluke naveh thi azhikrie vünüh müriküshuru aveh thuoüji apiehjü vünüh küza naveh, küpakenühnyunü hi nüh hamari aveh tü mari vü kümnomna kütsü mahvi vü zanyo hamari Moab vü viru naküveh kenüh, ta VÜWA nüh küza veh.

⁴⁵Hesbon rüzhekükhe vü zhüteküwari tü ngatü nü pehtewathuoh; küpakenühnyunü Heshbon vünüh anyih küsü kuoshute küwa thuoh kenüh, Sihon zheh vünüh anyihzhu küsü kuoshuwa thuoh; jüma tü Moab atie zoriemthuoh, anyira küüzhükürüh lokrieh.

⁴⁶Noh vü kümzü waluo, O Moab! Khemosh nyiri tü pokahmthuo, küpakenühnyunü noh tsari nyimpari, thi noh tsa nyimzari tü viteküwakhehthuoh kenüh.

⁴⁷Thitü rülo sehkhe vü thuoüji hi nüh Moab müngu tü satsü le naveh. Moab ashih tü hama küju.