Read Pochuri Naga JEREMIA 49 Bible Online

JEREMIA 49 - Pochuri Naga bible

JEREMIA 49

¹ Amon kenüh. VÜWA nüh hakümjie küza veh: Israel tü atsa nyimpari münyie ülo? Ma tü awurhuwa münyie ülo? Thinü mokenüh Milkom tü Gad mümka lo, thi ma nyiri tü nyujiri vü müpeh lo?

²Jükenüh atsothori tü tsetsa wiethuoh, ta VÜWA nüh küza veh, Amonri Rabbah sie saluo na küsa arie küüfükülo jikhi hi nüh küs vü; jüma tü küüzoküja kümsike küsü sam naveh, thi jüma anyuri tü anyih vi nü tsom naveh; jüti sanü Israel ma mümka nüh pehküvehri mümka nüh sa n veh, ta VÜWA nüh küza veh.

³Rera luo, O Heshbon, küpakenühnyunü Ai tü kümsüja kümthuoh kenüh! Kriezhu luo, O Rabbah atsa vüvühri! Atsahkieh vi küzhu luo, külu luo, thi awuze vi nü nohri mpa nohri kürhie luo! küpakenühnyunü Milkom tü aküsi sateküwa vü wa wie naküveh kenüh, ma navüri thi ma sieküpehri sie nü.

⁴Noh tü mokenüh noh kükhra kenüh kuoti veh ti. Noh kükhra tü kuorhietewathuoh, O kütsotü küzüla tsavühwa. Noh tü noh künyirhie vü alehno taji, “Thawa nüh hi prü na lo?” ta küza veh.

⁵Hi tü noh vü kümzhoh viru nti sa vehthuoh, ta thopahiri VÜWA Saküüwuowa nüh küza veh, noh zhephruri aveh vünüh, thi nohri tü voriem naveh, aveh nga alü vünüh showa naveh, nyi küsü nga nüh zhüteküwari küsazhuh münyie nüh sanaveh.

⁶Thitü asevü thuoüji hi nüh Amonra müngu satsüle naveh, ta VÜWA nüh küza veh.

⁷ Edom kenüh VÜWA nüh hakümjie küza veh; Teman vü kümtsa pehmveh wie thuoh ülo? Azhüküzhüri nüh zhühphiekütsü pokahm wiethuoh ülo? Mari kümtsa tü ramwiethuoh ülo?

⁸Jote luo, asevü sühle luo, kükie luo, Dedan vü arhieri! küpakenühnyunü hi nüh Esau rügivü kümsü viru na küveh kenüh, hi nüh ma vü kümnomnakütsü tsotho vü.

⁹Mükütüküzü rhelivi külazhuhri nüh noh vü ru thuoüji, mari tü amahse müsa tüm naveh ülo? Mükütüküzü rühukütsari arüza vü ru thuoüji, mari wie nga mari küvingüwa mpa prüvi naveh.

¹⁰Thitü eh kenüh thuoüji, hi nüh Esau tü fo kürütsomtü wiethuoh, hi nüh ma küüthi tü müsate nüh samtüthuoh thi ma tü ma mpa nüh ma müküzhüwura nüh samthuoh. Ma tsatori thi ma küshukürari, thi ma zhephruri tü zoriem thuoh; thi ma nga münyiethuoh.

¹¹Noh mürari sam luo, hi nüh mari kürho sanaveh ünüh; thi noh tü nyivühri tü hi vü alehküünoluo,

¹²küpakenühnyunü VÜWA nüh hakümjie küza veh: Mükütüküzü ahuowa müküzhulehri nga zhu wie nathuoh, noh tü kümnomna mütsü nüh küsawa ülo? Noh tü samkümnomna tü külewa nyu; noh tü jüma zhu wie naveh,

¹³küpakenühnyunü hi mpa nüh küshiem wiethuoh nü, Bozra tü kümzhoh thi kümsamnyi jakümsüküm zanyo küsü sam naveh, thi kümzü zanyo küsü sam wie na thuoh; thi ma anyu aveh tü jakümsü küpeh huo sam naveh, ta VÜWA nüh küza.

¹⁴Hi tü VÜWA vünüh azhühthewa künarathuoh, thi zhüleküvüri tü akuoküjira azavü küzem tüthuoh: Nohri mpa nüh sezhuh nü ra ma sie saluo luo, thi arie küsa kenüh sühraluo, ta küza,

¹⁵küpakenühnyunü hi nüh noh tü akuoküjira azhüvü aküzahwa küsana küveh kenüh, anyiri nüh küürüm naveh.

¹⁶Noh nüh kümzhohwa küchü nü, thi noh luoveh kürhiezarhiechi nüh noh müram thuoh, noh alokrü küpie vü ürhowa, thawa nüh küzhiho kümsie küüjetewa. Noh nüh noh phra tü aluo mphrathake müsiewa wie nga, jüla nüh hi nüh viterum naveh, ta VÜWA nüh küzaveh.

¹⁷Edom tü kümzhoh zanyo küsü küsam naveh, jüma kükashukariri aveh tü sakümzhoh khe naveh, thi ma kümsü aveh kenüh eshih ta sanaveh.

¹⁸ Sodom thi Gomorrah thi masü zhephruri khakümlele üta, nyi küsü nga jüla kürhowa nyu, nyutü nyiküsü nga jüma lovü küpehwa nyu, ta VÜWA nüh küza veh.

¹⁹Amiewuo küsü nüh Jordan are masasaküpeh kümrhuope vü kütse kümjie, hi nüh jüla nüh zhürüluo Edom zhejam naveh; thi hi nüh thawa rüka naveh ünüh jüla chiekem naveh. Küpakenühnyunü thawa nü hi kümjie lo? Thawa nüh hi nyiera na lo? Nyihzhü kühuori thawa eh tüvü tsiena lo?

²⁰Jükenüh VÜWA nüh Edom kenüh kürüzhe saküm thi Teman arhieri kenüh azhünyo vizhu küm künaluo: Nyinyizah küüzhühwa tü netewa tsawie naveh; mari kürhope tü kürule vü azüh ngeke tsawie naveh.

²¹Mari küülu akhi kenüh azhihwa tü khekheta küshüh naveh; mari kükrie khi tü Kümrujuh Küji vü künakera naveh.

²²Noküze luo, ma tü kuo nü aluomü kümjie the turu naveh ünüh, thi Bozra a nyiehvü ma küsa küüta naveh, thi jüma rülo vü Edom arieküsari luoveh tü krevühri atsaküwuo küna luoveh kümjie sanaveh.

²³ Damaska kenüh: Hamath thi Arpad tü rüza rüpuo mthuoh, küpakenühnyunü masü nüh azhüle kümsü küünara kenüh; masü tü akükrü vünüh ramthuo, masü tü juhküjiwa kümjie küthumthuoh thi müküzoh rathuoh.

²⁴Damaska tü thachumthuoh, ma tü jote nta sühle, thitü ngosetu nüh ma revi, müsheküna thi luovehküna nüh ma küjetemthuoh, krevühri atsa küwuo küna üta.

²⁵Mokümjie küthola nyujiwa tü kulemthuoh ünüh, nyierakükhruo anyuwa tü!

²⁶Jükenüh ma vizari tü aluo vü külu naveh, thi jüma rülo vü ma rienyiri aveh tü zoriem naveh, ta VÜWA nüh küza veh.

²⁷Thi hi nüh Damaska azievü anyih zhuketü naveh, thi jüma nüh Benhadad azheh kümzhori zorietsü naveh.

²⁸Babilon kajiwa Nebukhadnezzar nüh chaküm Kedar thi Hazor kajiperi kenüh. VÜWA nüh hakümjie küza veh: Süraluo, tsezhuwa nü Kedar sie saluo luo! Zhieshura nyi zoriem luo!

²⁹Mari juhthsüzheh thi mari nyihnyihri vi luo, mari küzietethsüri thi mari zanyo aveh vi luo, mari utri sietewa nü noh zhiri saluo, thi zie taji, “Kümzhoh tü azhie aveh vü pehm thuo,” ta zie naveh.

³⁰Te luo, kületsuo vü tewa luo, thi azhie kürükuthuokeri vü küthi luo, O Hazor vü kürhori! küpakenühnyunü Babilon kajiwa Nebukhadnezzar nüh noh vü kürüzhe küsü samthuoh thi azhünyo küsü vizhumthuoh, ta VÜWA nüh küza veh.

³¹Süraluo, akuoküji rüzi nü pehküvehri atüvü waluo, mütsaza nüh rhoküvehri, akheri nyutü arüpe mükünyieri, ma mpa rhoküvehri zhewaluo, ta VÜWA nüh küza veh.

³²Mari utri tü müzhütewa nathuoh, mari mieshümiesara azari zoriem na thuoh. Lü sekümri, hi nüh awuowuovü nüh mari vü kümsü viru naveh, ta VÜWA nüh küza veh.

³³Hazor tü rezanyihnyih nüh küvükeluo nü küpeh küsam nathuoh, ma tü küsü kürho aküja sam nathuoh; nyiküsü nga jüla kürhowa nyu, nyutü nyi küsü nga jüma lovü küpeh wa nyu.

³⁴Judah kajiwa Zedekiah kükajite vü Elam kenüh VÜWA zhü setsaküthsüwa Jeremia vü küru.

³⁵Athopahiri VÜWA nüh hakümjie küza veh: Hi nüh Elam lawih, ma küvipe aküji mari kükhrawa zoshim nathuoh;

³⁶thi hi nüh Elam rügi vü atülü jühke müzü vünüh amürhü müzü viru naveh, jüti sanü hi nüh mari tü amürhü hamari aveh vü zhuhrie küzem naveh, thi akuoküji küsü vü nga Elam vünüh zhezhukümri tü müru nüh küsawa nyu.

³⁷Hi nüh Elam tü mari mükünongüra tüvü nüh, thi mari kürholi phahkütseri atüvü nüh saküükhrih naveh; hi nüh mari vü eh haküze arüküshu kümsü viru naveh. Hi nüh mari müjie saküürakheh nü mari asevü anyuchuwa küze naveh;

³⁸thi hi nüh eh kükajipe Elam vü sakütokenaveh, thi mari kajiwa thi aküjiri zoriem naveh, ta VÜWA nüh küza veh.

³⁹Thitü arülo asevü thuoüji hi nüh Elam müngu satsüle naveh, ta VÜWA nüh küza veh.