Read Pochuri Naga JEREMIA 5 Bible Online

JEREMIA 5 - Pochuri Naga bible

JEREMIA 5

¹Jerusalem aleri vü zhüwa zhüru ti saluo, noküze nü msheluo! Anyi ngu na ünü nyu nüh ma nyulari vü phaluo, kümsho küsari thi küzhütsa küphari; hi nüh nojatsüna küsa kenüh.

²Mari nüh, “VÜWA rhoküveh üta,” ta wie ketünga, mari tü akürie vünüh küshie shieh.

³O VÜWA, noh notha tü küzhütsa kenüh mümüve ülo? noh nüh mari kürhiem thuoh, thitü mari tü amüsheküna müsa; noh nüh mari pokahthuoh, thitü mari tü saküümsho ma mthuoh. Mari tü mari anyieh alokrü nyieh vünüh saküomthuoh; mari tü kükhaphrüle ma mthuoh.

⁴Thi nüh hi nüh, “Hamari tü kümkhuori mpa, mari tü ase münyie luo; mari Saküüwuowa khonyo müküthsü kenüh.

⁵Hi tü atü aküjiri vü wa naveh, thi mari tü VÜWA leh thsüküveh kenüh, mari Saküüwuowa khonyo thsüküveh kenüh,” ti küza. Thitü mari aveh küzarike vünüh thsohkhuonyiwa zokhuomthuoh, thi aliri zothuomthuoh.

⁶Jükenüh aküze vünüh amiewuo küsü nüh mari zothem na thuoh, rezanyihnyih nüh küpohu vünüh mari zoriem naveh. Amie tü wa nüh mari nyujiri no peh veh thuoh, jümari vünüh shuküwari aveh thuoüji mürhühriem naveh; küpakenühnyunü mari nüh küphrürie tü zhi sheh küm kenüh, mari kütsotü müküüto tü jishehm wiethuoh.

⁷Hi nüh mokümjie noh nojanalo! Noh tsari nüh hi kulem thuoh, thi nyiaza mükürujuri vünüh küshi mthuoh. Hi nüh mari vo saküüpro vünüh satsüthuoh, mari nüh küphroküphrie mthuoh, thi küüphroküphriera zheh vü tewakhethuoh.

⁸Mari tü rawuh vo kümngu nüh avo samhie tsü, mari nyi küsüsü wie nga mari zhephru wa vünüh nolokhu.

⁹Zanyo hamari kenüh hi tü mari müküümnomna tüm naveh ülo? ta VÜWA nüh küza, thi hakümjie küsa kenüh hi tü hi mpa nüh akuoküji vü nga ashewi müsanüh sanaveh ülo?

¹⁰Ma rhelivi küzhike vü khru nü zoriem luo, thitü mürhe the kheh tümluo; ma tsuonari rhi jam luo, küpakenühnyunü mari tü VÜWA zhi mükünyu kenüh,

¹¹küpakenühnyunü Israel zhehlo thi Judah zhehlo tü hi vü kütsotü münyie nüh sajiem wie thuo, ta VÜWA nüh küza.

¹²Mari nüh rie nü VÜWA phrahtem thuoh, thi, “Ma tü zanyo küsü nga küsawa nyu; kümsü küsü nga hiri vü küruwa nyu, nyutü hiri tü anyuchuwa nyutü kümkhuoji künguwa nyu.

¹³Setsaküthsüri tü amürhü sam nathuoh; anyuchuwa tü mari vü pehm veh. Hakümjie vünüh mari vü sam naveh,” ta küza!

¹⁴Jükenüh VÜWA, kükhratsara Saküüwuowa nüh hakümjie küza veh, halie, hi nüh azhü hama küzakümthuoh kenüh, halie, hi nüh eh zhü tü noh po lovü anyih samtü naveh, thi anyi hamari tü athsoh samtü taji anyih nüh mari tsoküüra naveh.

¹⁵Halie, hi nüh kületsuo vünüh noh vü akuoküji küsü vitse veh, O Israel zhehlori, ta VÜWA nüh küza. Jümatü küüzhikera kuohji küsü, jümari tü atükhura kuohji küsü, noh nüh mari azhü müküthsü kuohji küsü, nyutü mari nüh mowa küza veh ünüh noh tü müküthsü kümshira küsü.

¹⁶Mari shüchuku tü rüku küpie kümjie, mari aveh tü anyi kükhrari kheh.

¹⁷Mari nüh noh nüh kümawie thi noh shie tsa khehmtü naveh; mari nüh noh tsa nyimpari thi nyimzari tsa khehmtü naveh; mari nüh noh rheliviri thi mieshürüliri tsa khehmtü naveh; mari nüh noh rheliviri thi noh müpari tsa khemtü naveh; noh nüh noh nyuji sakümzho küsa no nüh alehno küvehri anyuchu wa vi nü zoriem naveh, ta küza.

¹⁸Thinü jüma rülo vü nga, ta VÜWA nüh küza, hi nüh nohri küzorie sehkhe küsaji wa nyutü.

¹⁹Thi noh nyiri nüh, “Mokenüh VÜWA hiri Saküüwuowa tü zanyo hamari aveh hiri vü sam thuoh lo?” ta küüza vü noh nüh mari vü, “Nohri nüh hi kulem thi nohri zhih vü nohri nüh aliera nyiaza kütsü sam, jükenüh azhih noh zhi mükünyie vü nohri tü anyithera kütsü ranaveh, ti küza luo,” ti küza.

²⁰Jacob zhelori vü hama küzazhu luo, Judah vü jüma zhüchüh luo:

²¹ “Hama künaluo, O zanyomküthsü thi asemkünyie nyiri, notha pe tü mükünguri, khüna pe tü müküünara ri.

²² Nohri tü hi mükrü ülo? ta VÜWA nüh küza; Nohri tü eh tü vü kheta müküshü ülo? Hi nüh juhküji kenüh ashünyi tü arüh üta samtüthuoh, jüma mükükari nüh tsotho aveh ruophomthuoh; ma mpa nüh küshüh nü chüru wie nga, jümari tü müzoriera, mari nüh kütuoru wie nga, mari tü jüma kari müwa ra.

²³Thitü anyi hamari tü müzike thi azhü mküvi luovehri khe; mari tü anato vü sühlemthuoh thi tewathuoh

²⁴Mari tü luoveh lovü nüh, VÜWA hiri Saküüwuowa krü ünüh raluo, mazale vü atsoh kütsüwa, marakhu atsoh thi thsehthe atsoh, thi kümawie kenüh zhieri küteke nü hiri kenüh küsawa, ta müküza.

²⁵Nohri künakhieri nüh hamari saküüsüh le küzemthuoh, thi nohri kükhiemuori nüh nohri vünüh kümhie khete küpehmthuo,

²⁶küpakenühnyunü kümsüküsari tü eh nyiri azhie vü ngu veh; mari tü mümakütieri nüh tsake nü huoküveh üta huopeveh. Mari tü apiehjü sahke sanü anyiri tieveh.

²⁷Akhuo lovü amüwa tü aroküshi nüh pro; jükenüh mari tü ji thi nyirhiem thuoh,

²⁸mari tü thü, thi lielie ta thuoh. Mari tü kümsüküsa küürohküli küsa kenüh arüto müthsü; mari tü kütsarhie sana küsa kenüh apa mkünyieri kenüh kümsho vi lesa müsa, thi mari tü küthotsara wuhleri mütotetü.

²⁹Zanyo hamari kenüh hi tü mari samüküümnomna tüm naveh ülo? ta VÜWA” nüh küza, thi hakümjie küsa kenüh hi tü hi mpa nüh akuoküji küsü vü nga ashewi müsanüh sanaveh ülo? ta küza.

³⁰Kükrüküngo zanyo samthuoh azhih jüla.

³¹Setsaküthsüri tü akürie setsaküthsüzhü phrahte, thi anavüri tü mari mpa mari kükato vü nüh kete; eh nyiri tü jüma küsa lom, thitü asekhe teküru vü noh tü mowasana lo?