Read Pochuri Naga JEREMIA 50 Bible Online

JEREMIA 50 - Pochuri Naga bible

JEREMIA 50

¹ Babilon kenüh, Khaldeari azhih kenüh setsaküthsüwa Jeremia nüh VÜWA zhü küphra:

²Akuohjiri azavü phrashu nü zhüchüh luo, küphruothsü khake nü zhüchüh luo, jüma müküthi tüm nü, Babilon thuoüji vitewathuoh, Bel tü küzükrü vü thsemthuoh, Merodak tü luovehzamthuoh. Matsori tü küzükrü vü thsemthuo, ma nguori tü luoveh zamthuoh: ti küza luo,

³küpakenühnyunü zhietü kuohji küsü vünüh ma sie saluo nta tsethuoh; jüma nüh ma zhih tü saküüzojam na thuoh, thi nyi küsü nga nüh jüma lovü kürhowa nyuthuoh; anyiri nga thi samwa nga tewa na thuoh.

⁴Jüma rülo vü thi jüma tsotho vü Israel nyiri tü ru naveh, mari nga thi Judah nyiri nga ti kürü nü ru naveh; mari tü kriemngu nü VÜWA mari Saküüwuowa phahru naveh.

⁵Mari tü Zion vü küwa aleh küna naveh, mari anyieh jüwuovü küprüke taji, thi mari mpa nüh ru nü VÜWA vü asehkhe mükünyie piketü mükümara kütsathuozhü sie küperü naveh, ta VÜWA nüh küza.

⁶Eh nyiri tü nyihzhü küümie kümjie sam; mari kühuori nüh mari küjozih mtüthuoh, mari leh aküzhi vü sie kürholeke wa taji; mari tü aküzhi vünüh küzhiho vü tewathuoh, mari tü mari kürhope kümamthuoh.

⁷Mari künguri aveh nüh mari shohriemthuoh, thi mari mükünongüri nüh, “Hiri tü müküleh nyu, küpakenühnyunü mari nüh VÜWA, küzhütsa kümrhuope VÜWA, mari anyira küluozhewa vü khiemuoküm kenüh,” ta küza.

⁸Babilon vünüh te luo, thi Khaldeari vünüh tsezhutewaluo, thi nyisüvo nüh ma tüvü kütse wa küjokütse kümjie saluo,

⁹küpakenühnyunü hi nüh zhietü azhih vünüh akuoküjiri arefü küsü küke nü Babilon vü sieru nü mari nüh ma vü lieke naveh; jüla nüh ma tü vitewa naveh. Mari shüchuri tü arie vü kümtsari kümjie ake kürütso shele müru rhuo.

¹⁰Khaldea tü müzhühvütewa naveh; ma kümzhühvüri aveh tü aloküra sara naveh, ta VÜWA nüh küza veh.

¹¹Noh nüh nyierakhruo thi lozhe wie ketünga, O eh ka müzhüvüte küwari, Noh nüh aphrato vü mieshüwie kümjie phepheta jo wie ketünga, thi rawuhvori kümjie khu wie ketünga.

¹²Noh zah tü müküüzara zükrü naveh, thi noh küwuowa tü saküzükrüm nathuoh. Halie, ma tü akuoküjiri asekhewa sanathuoh, reza, azhih küüweh, thi shünyiza küsü sam na thuoh.

¹³VÜWA rükümthowa kenüh ma tü mürhorathuoh, thitü ma tü jaküüzojum na thuoh; Babilon tseshukari küwari aveh tü azüngeke naveh, thi ma kümsamna aveh kenüh eshih ta sanaveh.

¹⁴Babilon poteposhu aveh vü noh pe küche vi luo, nohri alawih kühehri aveh; ma müjü luo, shüchu küsü nga müküükhe tümluo, küpakenühnyunü ma nüh VÜWA vü khiemuo küm kenüh.

¹⁵Awuowuo vünüh ma vü ajikhi zie kümsie luo, “Ma tü ake khrokemthuoh; ma shiehkuri tü pum thuoh, ma zieri tü zophuomthuoh,” ta küza, küpakenühnyunü hama tü VÜWA nüh ma vü amüthoh küsa, ma nüh küsa üta ma vü satsüluo.

¹⁶Mahtsüküzhuhwa, thi kümahwie tsotho vü ahira küjehwa nga ti Babilon vünüh vijam luo; küpakenühnyunü küzorie nyuchuwa kenüh mari aveh tü mari mpa mari nyiri vü sheleteru na küveh kenüh, thi mari aveh nga mari mpa mari zhih vü jotewa naveh.

¹⁷Israel thuoüji amiewuori nüh zheja nü zhekütse kümjie wiethuoh. Apowa Assiria kajiwa nüh zoriethuoh, thi khinyi thuoüji Babilon kajiwa Nebukhadnezzar nüh ma rüri mükreh khemthouh.

¹⁸Jükenüh thopahiri VÜWA, Israel Saküüwuowa nüh hakümjie küza veh: Hi nüh Assiria kajiwa vü kümnomnakütsü üta hi nüh Babilon kajiwa thi ma zhih vü kümnomna tsü na saveh thuoh.

¹⁹Hi nüh Israel tü ma vü sieru salem nathuoh, thi mari tü Karmel rügivü, thi Bashan vü, thi Efraim küzhihori vü Gilid vünüh ti mari avo ngutsa nathuoh, thi mari avokürüma alosaküram na thuoh.

²⁰Jüma rülo vü thi jüma tsotho vü, Israel künakhie phahnaveh, thitü küsü nga küpehwa nyu; thi Judah kükhiemuori phah naveh thitü küsü nga küphahra wa nyu; küpakenühnyunü kümto kükhe küsari hi nüh nojatsüm na küveh kenüh.

²¹Merathaim azhih vü tse khru luo; khru nü ma sie saluo luo, thi Pekod vü arhieri prü luo thi mari asehkhewa küju zorie kümkhem tüluo, hi nüh noh vü azhükütsü aveh sa kheh luo, ta VÜWA nüh küza veh.

²²Arieküsa jikhi tü azhihwa vü pehveh thi küzoriezosa tü azhih vü pehvehthuo!

²³Mokümjie azhihwa ajü atsüvü tü zoshi thi zokhuomthuoh ünüh! Mokümjie Babilon tü akuoküjiri azavü kümzhoh küsü samthuoh ünüh.

²⁴Noh tü noh mpa nüh küjurü sakhe sanü noh mpa nüh küzamthuoh ünüh, O Babilon, thitü noh tü jüma müthsü nüh samthuoh; noh tü phahzhu nü revimthuoh, küpakenühnyunü noh nüh VÜWA künyie kenüh.

²⁵VÜWA nüh ma rietsokrüku samtüthuoh, thi ma rükümtho senyuseviri vizhumthuoh, küpakenühnyunü thopahiri VÜWA Saküüwuowa nüh Khaldeara zhih vü küroh saküm pehküveh kenüh.

²⁶Ajüke müzü aveh vünüh ma vü ra kheh luo; ma luori saluo; atsuo kümproke kümjie ma sakümjuke luo, thi zorie kümkhem luo; ma zhi zanyo küsü nga müküüpeke tümluo.

²⁷Ma vozahri aveh fethemtüluo, jümari tü küfethepe vü küzem luo. Mari kenüh ehzah mari rülo tü teru pehvehthuoh, mari vü kümnomnakütsü tsotho tü teru pehvehthuo!

²⁸Künaluo! zhüzhuteküwari thi münyipehküvehri tü Babilon azhih vünüh kütseri tü Zion vü VÜWA hiri Saküüwuowa müthoh küsa, makükhurüpe müthoh küsa phrahshu nta tse veh.

²⁹ Babilon sie saluo na küsa kenüh lawihküviri jizhuh luo, lawih kühehri aveh. Kürünape sanü ma mükiele luo. Ma nüh küsari müzhe nü thuotsüle luo; ma nüh küsa khemti ma vü satsü luo, küpakenühnyunü ma nüh kuotikuoshi wie nü VÜWA, Israel Kümtsewa saküsaluo kümthuoh kenüh.

³⁰Jükenüh ma küvizari ta ma lerari vü tsuotsam naveh, thi jüma rülo vü ma rienyi aveh zoriehm naveh, ta VÜWA nüh küza veh.

³¹Hi tü noh sie kürükhrüluo veh, O kükuotikuoshi wa, küpakenühnyunü noh rülo tü rupeh küveh thuoh kenüh, hi nüh noh vü kümnomnatsüm nathuoh, ta VÜWA nüh küza veh.

³²Kükuotikuoshiwa tü müshü nü külum naveh, nyi küsü nga ma küsike münyie nüh sam naveh, thi hi nüh ma nyujiri vü anyih khrüketü naveh; thi jüma nüh azanyo ma mükieshe küveh aveh zoriem naveh.

³³Kümsietsa VÜWA nüh hakümjie küza veh: Israel nyiri tü mürümthuoh, jükümjie Judah nyiri nga mürümthuoh; masü küreri aveh tü küjehphokemthuoh thi mari müküze nta thuoh.

³⁴Mari kürhehsawa tü khram, thopahiri VÜWA tü ma nyo. Ma nüh makeri’a nüh khuo wie naveh, jüta küsa vünüh ma nüh azhihwa vü kümnyie tsüra naveh, thi hi Babilon arhieri vü thuoüji kümnyie münyie luo.

³⁵Khaldeari vü, Babilon arhieri vü, thi ma küjiri vü thi ma zanyoküthsüri vü pehvehthuoh! Ta VÜWA nüh küza veh.

³⁶Mahtsazhü küphrari vü anyuchuwa, jüüta thuoüji mari tü zhem na thuoh! Arieküsari vü anyuchuwa, jüüta thuoüji mari tü zoriem na thuoh!

³⁷Ma rawuhri vü thi ma rawuhkhekari vü anyuchuwa, thi ma zhievü aliera riekhuori aveh vü, jüüta thuoüji mari tü nyimzari sam na thuoh! Ma künyirhiekuri aveh vü anyuchuwa, jüüta thuoüji mari tü prüvim na thuoh!

³⁸Ma juh vü küüwehkuoki, jüüta thuoüji küweh kuokim nathuoh! küpakenühnyunü jüma tü atsorhe azhih küsa kenüh, thi mari tü anguori rügi vünüh zhetewawa ti küsa kenüh.

³⁹ Jükenüh Babilon vü rezasamwari tü atsuokrihri sie rho nathuoh, thi ma vü suokruomwari rhiem nathuoh; ma tü anyiri müsa ra lethuoh, nyutü awuhle aveh nüh mürhierathuoh.

⁴⁰ Saküüwuowa nüh Sodom thi Gomorrah thi masü zhephruri khaja kümvü nyi küsü nga jüla kürhowa nyuthuoh, nyutü ma lovü küsü nga tuküpehwa nyuthuoh.

⁴¹Noluo, zhietü vünüh anyiri tse; akuoküji kümzho küsü thi kajiri hozake azhih kületsuotsatsa anyokhieri vünüh küngah nü tse veh.

⁴²Mari tü lawih thi avi küjehke veh, mari tü kutehkurü thi noküümze münyie luo. Mari jikhi tü ajuhküüshükhi kümjie; mari tü rawuh rügivü shupeh, arie kenüh arieküsari kümjie lieke, noh vü sie saluo nta, O Babilon tsavühri!

⁴³Babilon kajiwa nüh mari zhühthe küna ra, thi ma ke tü momasanüh satewa; amüsheküna nüh retem, krevühri atsa küwuo küna kümjie na.

⁴⁴Are müzhiküpeh huo vü Jordan aküzezemü vünüh amiewuowa tse zhu kütse üta, hi nüh ma vünüh zhürüluo mari zhejam naveh; jütisanü hi nüh thawa rüka naveh ünüh jüla chiekesam naveh. Küpakenühnyunü thawa nü hi kümjie lo? Thawa nüh hi nyiera na lo? Nyihzhükühuo thawa nüh eh tüvü tsiera na lo?

⁴⁵Jükenüh VÜWA nüh Babilon vü kürüzhe saküsa, thi Khaldeari kenüh ma nüh azhünyo vizhu küsa küna luo: anyihnyih küüzhü aküzahri tü nete wa tsa wie na thuoh; mari kürhope tü azühngeketsa wie naveh.

⁴⁶Babilon reküvi ajikhi küünara vü azhihwa tü khekheta sa wie nathuoh, thi ma kükrie tü akuoh küjiri azavü küna ra naveh.