Read Pochuri Naga JEREMIA 51 Bible Online

JEREMIA 51 - Pochuri Naga bible

JEREMIA 51

¹VÜWA nüh hakümjie küza veh: Hi tü Babilon thi Lebgamai kenüh hi nüh küzoriezosa mürhü küsü kükezgutsü naveh;

²thi hi nüh Babilon vü araheri küze naveh, thi mari nüh ma he naveh. Küsüro rülo vü awuowuo vünüh ma sie saluo küru vü hi nüh ma sakürütsom tü naveh.

³Lawih küviwa tü ma lawih müküüheh tümluo, thi ma tü ma riethsümnyi küsazhewa vü nü ma mpa nüh müküülieke tümluo. Ma küvizari müküükhe tümluo; ma nyilari zorie kümkhehm luo.

⁴Mari tü rehthem nü Khaldeara zhih vü külu zehm naveh, thi ma lerari vü müsamnam nathuo.

⁵Israel thi Judah thuoüji thopahiri VÜWA mari Saküüwuowa nüh müjie kule, ma mpa nüh Israel Kümtsewa tüvü müküleh pro wie ketünga.

⁶Babilon azavü nüh te luo, nohri küsüküsü nga noh kürho külo le luo! Ma müküleh kenüh müpokah tümluo, küpakenühnyunü atsotho hamatü VÜWA nüh amüthoh küsa tsotho küsathuoh kenüh; ma tü ma vü sakütsülehwa satsü veh.

⁷ Babilon tü VÜWA ke vü suna huo küsü sa, azhih aveh sakümshe kheh; akuoküjiri tü ma khah vünüh müshe kheh, jükenüh akuoküjiri tü zhetewa kheh.

⁸Zhürüluo Babilon tü külu nü küloriekhehmthuoh; ma kenüh rietsiluo! ma khüma kenüh jürezhi viraluo; ma tü sakümhiera mühieveh ünüh.

⁹ Hiri nüh Babilon sakümhie nti kükhra thsethuoh, thitü ma samkümhiera nüh sam. Ma kulem luo, thi hiri mpa papara nyuji vü tewa ünüh raluo; küpakenühnyunü ma shih tü kuo atülü juvehthuoh thi atülü küju wie nga müsie kümthuoh kenüh.

¹⁰VÜWA nüh hiri tü awuhle vizhu mtü thuoh; raluo, hiri Zion vünüh VÜWA hiri Saküüwuowa küüroh phra shu ünüh.

¹¹Ashüchuri küzahküürike luo! Ashüchuku saküpro luo! VÜWA nüh Medes kajiri sietse saküüngahmthuoh, küpakenühnyunü Babilon kenüh ma zhünyo thuoüji jüma zorie na küsa kenüh wie, jüma tü VÜWA nüh amüthoh küsa, ma kükhurüzhe kenüh amüthoh küsa.

¹²Babilon azieri vü küüte küsü vishu luo; künote sakükhraluo; kühuoteriri sakütoke luo; aküwuri küche luo; küpakenühnyunü VÜWA nüh arhieri kenüh ma nüh mowa phrahte nüh rüzhemthuoh thi sakümthuoh kenüh.

¹³ Nohri ajuh kümzhori vü kürhori, künyirhieri vü künyirhie, noh sehkhe tü rupeh vehthuoh, noh kürho alo tü tethuomthuoh.

¹⁴Kümsietsa VÜWA nüh ma mpa küshiemthuoh: ashukrie zhüzhü ta küsa kümjie hi nüh ariekhuo vi noh saküpro mtü naveh, thi mari tü noh nyiehvü kükhrara jikhi zie naveh.

¹⁵Ma kükhra vi nü azhih küsawa tü ma, ma kümahtsa vünüh azhihnyie küvishuwatü ma nüh, thi ma küthsükümshi vünüh atülüri shohküüta.

¹⁶Ma nüh ma jikhi küphrahteshu vü atülüri vü ajuhra jikhi sa peh, ma nüh azhih küpoteri vünüh atsozü sa küüshu. Atsokürü kenüh ma nüh atsorie sa, thi ma zanyoküsazheh vünüh ma nüh amürhü vizhuru ruti.

¹⁷Aveh nga zhehphrom thi zanyoküthsü münyie luo; amürüküsari aveh tü mari anguori nüh küzükrü vü thsemthuoh; küpakenühnyunü mari atsori tü akürie küsa kenüh, thi mari vü tü arütho mütü.

¹⁸Jümari tü mamemükünyie, mükünyu saküm küüroh küsü; mari vü kümnomnakütsü tsotho vü mari tü pokahm naveh.

¹⁹Hakümjie mükünyuwa thuoüji VÜWA Jacob suopewa, küpakenühnyunü ma wie nüh zanyo aveh küsazhu kenüh, thi Israel tü kaküvi akuohwa; thopahiri VÜWA tü ma nyo. VÜWA Tsüvü

²⁰Noh tü eh rie wiekhuh, eh riepe vü senyusevi: hi nüh noh sie nü akuoh küjiri ferie veh; noh sie nü hi nüh kajiri zorie veh;

²¹noh sie nü hi nüh arawuh thi ma rügivü küpehri ferieja naveh; noh sie nü hi nüh rügivü rawuhkhekari thi jüma rügivü küpehri ferieja naveh;

²²noh sie nü hi nüh nyimpari thi nyimzari ferieja naveh; noh sie nü hi nüh krepari nga thi vizanguori nga ferieja naveh; noh sie nü hi nüh vizari thi rülari ferieja naveh;

²³noh sie nü hi nüh nyihzhükühuori thi ma nyihzhü riekhuo ferieja na aveh; noh sie nü hi nüh azhuhküürohri thi ma rüzhuri ferieja naveh; noh sie nü hi nüh kümkhrüri thi ma soshihri nga ferieja naveh.

²⁴Hi nüh Babilon thi Khaldea vü arhieri aveh vü mari nüh Zion vünüh müküleh küsa aveh nohri notha atütsatsa vünüh hi nüh satsüle naveh, ta VÜWA nüh küza veh.

²⁵Hi tü noh sie ruoluo veh, O zorieküveh aküzhiwa, jüma tü azhih ajü zorie veh; hi nüh eh pie thsuozhu nü noh vü thse naveh, thi apothuori vünüh noh küpri küze naveh, thi aküzhi kütsozhu küsü satsü naveh, ta VÜWA nüh küza veh.

²⁶Ajühke kenüh thi ajupewa kenüh noh vünüh aloh küsü nga küviwa nyu, thitü noh tü müsüja küpeh huo sam naveh, ta VÜWA nüh küza veh.

²⁷Azhihwa vü küüte küsü vizhu luo, akuoküjiri azavü atütü khu luo; ma sie arie sana küsa kenüh akuoküjiri küche luo, kajiperi ma vü jike luo, Ararat, Minni, thi Ashkenaz; ma vü arienyiküji küsü kücheketsüluo, kütoke kriemari kümjie arawuhri tü sieshuhru luo.

²⁸Ma sie arie sana küsa kenüh akuoküjiri küche luo, Medes kajiri, mari kümkhrüri thi asoshihri sie nü, thi mari kükhu vü kükete azhih aveh.

²⁹Azhihwa tü khekheta küshühveh thi küremthuoh, küpakenühnyunü VÜWA nüh Babilon kütsiepe zhühtsükümthuoh kenüh, Babilon azhih tü küüzoja küsü küsana küsa kenüh, müküürhiethuoh nüh küsana küsa kenüh

³⁰Babilon arieküsari tü küsaluowa jamthuoh, mari tü mari shiehku lovü pehtewa thuoh; mari kükhra tü müsara nüh samthuoh, mari tü nyimzari jemthuoh; ma zhehri tü anyih zhukemthuoh, ma rüpethsohri tü zoshimthuoh.

³¹Aküzhüri küsü nüh küpawa mütu nta zhütse veh, thi azhühvüri küsü nüh küpawa mütu nta tse veh, Babilon kajiwa vü ma nyujiwa tü apote küsü vünüh apote küsü küju vimthuoh ünüh ti küza nta:

³²akekari tü revimthuoh, thi anyih vi anyihpuori tsomthuoh, thi arienyiri tü ngosetu vü pehmthuoh,

³³küpakenühnyunü thopahiri VÜWA, Israel Saküüwuowa nüh hakümjie küza küveh kenüh: Atsavühwa Babilon tü hiemtha kürütse nyinyaküm tsotho vü kümjie wiethuoh; tü tsotho pike sevü kümahwie tsotho teru nathuoh.

³⁴“Babilon kajiwa Nebukhadnezzar nüh hi shohriemthuoh, ma nüh hi kürenyamthuoh; ma nüh hi tü aku kürü tso küsü samtüthuoh, ma nüh hi tü asuomie küsü kümjie hi müzhumthuoh; ma nüh eh kümhieri vi ma vo saküpromthuoh, ma nüh hi müshüjamthuoh.

³⁵Eh rüzhü asawa tü Babilon rügivü amüthoh küsam luo,” Zion vü arhieri nüh jüüta küza naveh. “Eh züh tü Khaldea vü arhieri amüthoh küsaluo,” ta Jerusalem nüh küza naveh.

³⁶Jükenüh VÜWA nüh hakümjie küza veh: Hi nüh noh kenüh tote naveh thi noh kenüh amüthoh vitsü naveh. Hi nüh ma juhküji saküngetsü naveh thi ma küwuzhu saküüwehtsü naveh;

³⁷thi Babilon tü ferie küümproke küsü sam nathuoh, rezanyihnyih kütüku küsü sam nathuoh, kümzhoh thi ashih ta küsa zanyo küsü sam na thuoh, mürhie nüh sam nathuoh.

³⁸Mari tü amiewuowa kümjie kürü rümuo nathuoh; mari tü amiewuo tsari küjieh khu nathuoh.

³⁹Mari tü zhukem thuoüji, hi nüh mari küzhu vikesana thuoh thi mari saküümshe na thuoh, mari müjie külozheloku küju nü jüti sanü müküütuo aküzeh zeh taji piketü müsühra nüh sa nathuoh, ta VÜWA nüh küza.

⁴⁰Nyihzhüzah thi nyihzhüvo thi nyihsüvo rehthe nta viküturu kümjie hi nüh mari vituru naveh,

⁴¹Mokümjie Sheshak vi tewathuoh lo, azhih ajü kürhiezarhiechiwa tü revitewa thuoh lo! Mokümjie Babilon tü aluohjiri azavü kümzhoh zanyo küsü samthuoh lo!

⁴²Ma juh küjiwa tü Babilon anyiehvü tewa thuoh ma tü küüshüh küüluo nüh külüwute mthuoh.

⁴³Ma nyujiri tü kümzhoh zanyo küsü, azhih küüwekuoki, thi shünyiza küsü samthuoh, nyi küsü nga mükürho azhih küsü, thi anyitsari küsü nga müküütse shukari samthuoh.

⁴⁴Babilon vü Bel hi nüh kümnomnatsü naveh, jüti sanü ma nüh mowa müzhuthuoh ünüh küükizhuja naveh. Akuohjiri tü ma vü küliwa nyu lethuoh; Babilon azie tü puomthuoh.

⁴⁵Ma vünüh shutewaluo, eh nyiri! Noh kürho külole luo, nohri küsüküsü nga, VÜWA rüküshu kükrükhre vünüh!

⁴⁶Luovehsüphake nyutü mükrüphake tümluo azhih jüla azhühvieri küünara vü, mahvi küsü vü küzhühvie küsü ru veh, amahvi jüma nyiehvü küpa rule veh, azhih jüma vü küvürie azhühvie thi takrü küsü nüh takrü küsü sie saluo naveh.

⁴⁷Hi nüh Babilon atsori vü kümnomna küsa rülori tsetsa wiethuoh; ma zhih ajü tü küzükrü vü vithsem naveh, thi ma nyi rehthekümri aveh tü ma zhila vü tsuotsake naveh.

⁴⁸Jüti sanü atülüri thi azhihwa, thi jümasü lovü küpehri aveh tü, loküzhe kenüh Babilon rügivü zie naveh; küpakenühnyunü küzoriewa tü zhietü vünüh mari vü ru na küveh kenüh, ta VÜWA nüh küza veh.

⁴⁹ Babilon tü Israel kürehthe kenüh mütsuotsaji mümhie wie thuoh, azhih aveh kürehthe küülu tü Babilon kenüh wie.

⁵⁰Nohri anyuchuwa vünüh kürhorari, waluo, müküzhike tümluo! kületsuo vünüh VÜWA müsheluo, thi Jerusalem tü noh müshe vü küüturu luo:

⁵¹Hiri tü küzükrü vü thsemthuoh, küpakenühnyunü hiri tü kümsamnyi küünara kenüh, müküchiekürhe nüh hiri nyieh tiehtemthuoh, küpakenühnyunü anyilieri tü VÜWA zheh kümtse azhieri lovü küturuthuoh kenüh.

⁵²Jükenüh atsothori watü tetsetsa wiethuoh, hi nüh ma nguori vü kümnomnatsü na küsa, thi ma zhih aveh vü kümsamnari tü lüchih naveh, ta VÜWA nüh küza veh.

⁵³Ma mpa nüh Babilon tü atülü vü kükuoleh wie nga, thi ma nüh ma kümzho kümsiewa sakükhra leh wie nga, hi vünüh küzorieri ma vü ru wie naveh.

⁵⁴Künaluo! Babilon vünüh jikhi küsü! Khaldea zhih vünüh kütohnya aküji küsü!

⁵⁵küpakenühnyunü VÜWA nüh Babilon tü kümsüja sa küvehthuoh kenüh, thi ma jikhi küzie khi saküüzoh vehthuo, mari küüshüh tü ajuh kükhra küüshühkhi kümjie, mari jikhi tü khule veh;

⁵⁶küpakenühnyunü küzoriewa tü ma rügi vü tse küveh thuoh kenüh, Babilon rügivü tse; ma rieküsari tü vitewathuoh, mari lawihri tü zoshimthuoh; küpakenühnyunü VÜWA tü noshekütsü Saküüwuowa küsa kenüh, ma tü aküpro vünüh thuotsüle naveh.

⁵⁷Hi nüh ma küjiri thi ma zanyoküthsüri saküümshe naveh, ma kümkhrüri nga, ma soshihri, thi ma rieküsari nga ti; mari tü zehküpeh huo zeh nü piketü küsüralewanyu, ta Kajiwa nüh küza veh, ma nyo thuoüji thopahiri VÜWA.

⁵⁸Kümsietsa VÜWA nüh hakümjie küza veh: Babilon azie kümzawa tü azhito asa vünüh samtü naveh, thi ma kheri kümsieri tü anyih nüh vitsomtü naveh. Zanyoküsü nga müküngu vünüh anyiri tü mari müpa nüh akükhra münyie nüh samthuoh, thi akuoküjiri tü anyih kenüh mpa nüh thasümthuoh.

⁵⁹Maseia azhü Neria atsa Seraia nüh Judah kajiwa Zedekiah sie nü Babilon vü küwa vü, ma kükaji mahvi müzüawa vü setsaküthsüwa Jeremia nüh ma vü azhükütsü. Seraia tü zanyo kühuotewa sa.

⁶⁰Jeremia nüh külulasi küsü vünüh kümsü aveh Babilon vü ru na küsa rhükheh, azhü hamari rhü küsa aveh tü Babilon kenüh rhüküsa wie.

⁶¹Thinü Jeremia nüh Seraia vü, “Noh Babilon vü küru vü, azhü hamari aveh chie naveh ti küsa thsüluo,

⁶²thi, ‘O VÜWA, noh mpa wie nüh azhih hama zorie nta sakükrü nü anyi kürholuo nyutü samwaluo jülovü müküürho nta, thi jüma tü küsuokürho jaküüzo nta,’ ti küza.

⁶³ Noh nüh külulasi hama chiekhehm thuoüji, jümawa vü aloh huke nü Eufrates azhila vü vehjakem luo,

⁶⁴Jüti sanü, ‘Hakümjie Babilon tü retetu nü müküshura le sanaveh, hi nüh ma vü kümsü vikütsewa nüh,’ ti küza üti,” küza. Jeremia zhü tü hama küju mpa.