Read Pochuri Naga JEREMIA 6 Bible Online

JEREMIA 6 - Pochuri Naga bible

JEREMIA 6

¹Külolerape vü te luo, O Benjamin nyiri, Jerusalem azhila vünüh! Tekoa vü tütü khu luo, thi Beth-hacherem rügi vü thsoshi vike luo; küpakenühnyunü zhietü vünüh kümsü thi küzoriezosa aküji nguzah küveh thuoh kenüh.

²Aküzü thi khukekümhie wa hi nüh zoriem naveh, Zion tsa vühwa.

³Nyihzhükühuori thi ma nyihnyihri ti ma sie wuluoru naveh; mari tü mari juhthshüzheh ma samkiele naveh, mari tü maperi vünüh shie mürhuo naveh.

⁴“Ma sie arie küsa kenüh küche luo; süraluo, rünyi küzeto vü ma prü naveh ünüh,” “Hiri amngu müsünasathuoh, küpakenühnyunü arülowa tü kuoteküwa thuoh kenüh, münüleh arüzhe tü kuosuo teküwa thuoh kenüh,”

⁵“Süraluo, hiri kürü arüza vü ma prü naveh ünüh, thi ma kajizhehri zoriem naveh ünüh,”

⁶küpakenühnyunü VÜWA nüh hakümjie küza küveh kenüh: “Ma thsohri shüjaluo; thi Jerusalem kümkieshe kenüh akhithuoh küsü saluo. Anyuji hama tü samküümnomna thuoüji mükümhiewa wiethuoh; malovü tü kümrü küchie nüh zanyo küsü nga münyie luo.

⁷Juhkhre küsü nüh ma juh saküürherho üta, jükümjie ma nüh ma kümsüküsari saküürherho rhoti; ma lovü küvürie thi zü küüthü künara mthuoh; aküna thi kümsamna eh tüvü peh huomthuoh.

⁸Hamna künaluo, O Jerusalem, hi tü noh vünüh küpele tewa üsü nüh; hi nüh noh tü küüzo küsü sam üsü, müküürie azhih küsü küsam üsü,” ta küza.

⁹VÜWA nüh hakümjie küza veh: Israel kümtori tü rhelivi rhu küsü küjihke mütham naveh; rhelivi külazhuri küsü kümjie noh ke matsuona vü thsuokewa le luo; ti küza

¹⁰Mari künarana küsa kenüh hi tü thawa vü küza nü küütsaza nalo? Halie, ma khünari tü sotem thuoh, mari tü jikhi müza rathuoh; halie, makeri nüh, VÜWA zhü tü küriesarienyi küsü samthuoh, mari jüma vi loküzhe mükünyie samthuoh.

¹¹Jükenüh hi tü VÜWA rükümtho promthuoh; hi tü jüma eh lovü sakeküpeh münomthuoh. “Alera vü küpeh atsari vü jüma küshoke tüluo, thi vizari sehzhuhküvehri rügi vü nga küshoketsüluo; avüpari thi avüvühri, kükruori thi khruoküzeri nga ti sietewa naveh.

¹²Mari azheh tü kürele küpari vü tewa na thuoh, mari azheh thi avüvühri nga ti; küpakenühnyunü azhih jüla arieri vü hi nüh eh ke thsuoke na küveh kenüh,” ta VÜWA nüh küza,

¹³“küpakenühnyunü mari aküzatsa wa vü nüh aküjitsa wa kütsu, aveh nga mükümsho akürie vünüh amüwi küji kenüh; hi setsaküthsüwa vünüh anavüwa küju, aveh nga nyiri vü riem.

¹⁴ Mari nüh eh nyira kümsamana sakü mhie zah tsü, thi kürükümhie münyie wie ketünga, kürü kümhie,” ta küzazati.

¹⁵Mari tü zanyo akükre küsa vü mari tü zükrü ülo? Nyu, mari tü küsie nga müzükrü; mari tü mpkümjie anyieh thürüh naveh ünüh müthsü. Jükenüh mari tü külukümri azhievü külukem naveh; hi nüh mari ehkümnomna kütsü tsotho vü, mari khakümlelem naveh, ta VÜWA nüh küza.

¹⁶VÜWA nüh hakümjie küza veh: “Lehkhüji kütuoh vü tsie nü noküze luo, thi atükhura lekhuji künaluo, khiela aleh kümhie pehveh ünüh jüla tse luo, thi noh kürholiri kenüh kümnyie vi luo. Thitü mari nüh, Hiri nü jüla kütse wa nyu; ta küza.

¹⁷Hi nüh künotenyiri nohri nyieh vü sataji, Atütü jikhi vü tsake luo, ti küza! Thitü mari nüh, ‘Hiri nü kütsakewa nyu,’ ti küza.

¹⁸Jükenüh künaluo, O kuohjiri, thi thsüluo, O ashiejiwa, mari vü mowa sanaveh ünüh.

¹⁹Künaluo, O azhihwa; halie, anyi hamari vü hi kümsü vi tse, marori aviwa, küpakenühnyunü mari nüh eh zhü mükütsake ake nüh; thi eh khonyowa thuoüji tü kulejam thuoh.

²⁰Moküsa Sheba vünüh avüju hi vü ruluo, nyutü kületsuo azhih küsü vünüh amüshe kümnge ru lo? Nohri kütso kükhurümtü küvira azhi nyu,

²¹Jükenüh VÜWA nüh hakümjie küza veh: Halie, hi nüh anyi hamari atüvü ajihkümshüloh sanü mari tü jüla nüh ajihküüshü naveh; apari nga atsari nga aveh, azhephruwa nga thi afüwa nga pokahm naveh,” ti küza.

²²VÜWA nüh hakümjie küza veh: “Halie, anyi riekhuo küsü zhietü nyuji vünüh tse, azhih aleh küsuotsatsari vünüh thopahiri aküji küsü kükezhu tse thuoh.

²³Mari tü lawi thi avi küjehke, mari tü ahe müsümü thi noküümze münyie luo, ma jikhiri tü ajuhküji küüshükhi kümjie; mari tü rawuh rügi vü tse, nyi küsü nüh arie vü kütsezhu üta, noh sie saluo veh thuoh, O Zion tsavüwa,” ta küza!

²⁴Hiri nüh jüma zhüke küna ra thuoh, hiri ake tü momasanüh tewa; amüsheküna nüh hiri site tewa, krevüri küsü atsaküwuo küna üta natewa.

²⁵Ato vü shu müwa tümluo, nyutü lehkhuji vü mütse tümluo; küpakenühnyunü mükünongüwa tü anyuchuwa küsü pehküveh kenüh, kükrüküngo tü awuowuo pehküm kenüh.

²⁶O eh nyira tsavühwa, atsahkie vi tseke luo, thi aweji vü küpri luo; atsa küsü müpa üta vünüh shükheke luo, kürümuo sheh vünüh; küpakenühnyunü küzoriewa tü zhürüluo hiri vü ru na küveh kenüh.

²⁷“Hi nüh noh tü anyiri azhie vü amrü kümtenowa küsamthuoh, noh nüh thsü thi mari alehri nona küsa kenüh.

²⁸Mari tü aveh müküzike vünüh ruoluo, zhükürieri sie nü küzhu mükiele tsetseti; mari tü asa wuo thi amürü, mari aveh nga kütsaküsü nü küsari kheh.

²⁹Anyizhu tsophrierakenü, amrü tü anyih nüh tsoküram; müjuju vünüh tsoküümtse nyiwa tü tsopeveh, küpakenühnyunü kümsüküsa tü vi mküja kenüh.

³⁰Mari tü rüküm rakasa ta ji naveh, küpakenühnyunü VÜWA nüh mari kulejakümthuo kenüh,” ta küza.