Read Pochuri Naga JEREMIA 7 Bible Online

JEREMIA 7 - Pochuri Naga bible

JEREMIA 7

¹VÜWA nüh Jeremia vü azhü küru:

²VÜWA zheh kheri vü tsie nü jüla nüh azhü hama zhüchüh taji, VÜWA zhü künaluo, Judah nyiri akheriri lovü tu nü VÜWA khurü nta küsari aveh

³VÜWA, Israel Saküüwuowa nüh hakümjie küza veh, noh lehri thi noh nüh saküvehri sakümsholuo, jüta thuoüji hi nüh nohri tü azhie hala küürho naveh.

⁴Kümürazhü hamari vü mtsotü tümluo: “Hama tü VÜWA khurüzheh, VÜWA kükhurüzheh, VÜWA kükhurüzheh, VÜWA kükhurüzheh,” ta küsa,

⁵küpakenühnyunü mükütüküzü nohri nüh noh lehri thi noh nüh saküvehri vünüh khaphrütsa thuoüji, mükütüküzü nohri nüh küsü nüh küsü vü kümshowa küro thuoüji,

⁶mükütüzü nohri nüh anyilieri, apa mkünyieri nyutü tünyivühri, mümrü thuoüji, nyutü azhie hala mükükhiehra zhü müküthü thuoüji, thi mükütüküzü nohri mpa nüh nohri saküümnomna nta sanü nyiaza küpara se nyi temwa ti thuoüji,

⁷hi nüh nohri azhie hala küürho naveh, hi nüh khana vünüh küsuokürho nohri apari vü tsüküm azhih wa vü.

⁸“Halie, nohri tü kümra azhüri vü tsotüm.

⁹Nohri tü rühu, fethe, küüphroküphriesa, rie nü küshie, Baal vü asierhe tsü, thi nohri nüh müküthsü nyiazara se nyitewa,

¹⁰jütisanü ru azheh hala eh tü vü tsie, jüma tü eh nyo vünüh ji taji, ‘Hiri tü vizhumthuo!’ ta sanü akükre hamari aveh sataji tse peh naveh ülo?

¹¹ Eh nyo vünüh ji küveh azheh hama tü noh notha vü kürühuwa küüthipe küsü samthuoh ülo? Halie, hi nüh hi mpa nüh jüma ngu mthuoh, ta VÜWA nüh küza veh.

¹² Shilo vü eh zhie hi nüh eh nyo küsa pokhuwa vü khinyi waluo, thi hi nüh eh nyi Israel kümsüküsari kenüh mowa sanüh noluo.

¹³Nohri nüh zanyo hamari aveh saküm kenüh, thi hi nüh nohri vü mtsatso nüh phrahte wie ketünga nohri nüh müküna, thi hi nüh nohri ji wie ketü nga nohri nüh mürüle,

¹⁴jükenüh hi nüh eh nyo vü nüh küji azheh wa, thi nohri nüh aleh künowa vü, thi hi nüh nohri vü thi nohri apari vü ti kütsü azhiewa vü tü hi nüh Shilo vü sakütsa üta satsü naveh.

¹⁵Thi hi nüh nohri küshukürari aveh viküja üta hi nüh eh küngu vünüh vijam naveh, Efraim tsatori aveh.

¹⁶“Noh kenüh thuoüji, anyi hamari kenüh khuo müsatü tümluo, nyutü arügi vü müzie tüm nyutü mari kenüh kükhuo müsa tümluo, thi hi sie mjületümluo, küpakenühnyunü hi tü noh zhü küünawa nyu.

¹⁷Noh tü mari nüh Judah nyujiri vü thi Jerusalem lelari vü mowa sa veh ünüh müngu ülo?

¹⁸Kürünguri nüh athsoh mükrüzhuh, apari nüh anyih sa, thi atülü vü kajivüwa kenüh tieshu sa na küsa kenüh krevüri nüh atha küto künya; thi luoveh saküzüh nü eh rüsakümtho nta.

¹⁹Hi tü mari nüh luoveh sa küüzüh wa ülo? ta VÜWA nüh küza. Jümatü mari müpa nüh mari samküürüza ülo?

²⁰Jükenüh VÜWA Saküüwuowa nüh küza veh: Halie, eh rüküshu thi eh rükümtho azhie hama nyiehvü, anyiri asa nyiehvü, ato vü athsohri thi azhitowa thsohvi rügivü küshoke naveh; jüma tü pemküveh nüh tso naveh,” ta küza.

²¹VÜWA, Israel Saküüwuowa nüh hakümjie küza veh: Nohri küsathuo vü nohri kütso kükhurü vü thserü nü asawa tsaluo,

²²küpakenühnyunü hi nüh Egypt zhih vünüh mari siezhu küru rülo vü hi nüh noh pari vü kütsa kükhurü thi küsahthuoh kenüh müküze nyutü azhütsü,

²³Eh jikhi vi luo, jüta thuoüji hi tü nohri Saküüwuowa sa naveh, thi nohri vü azhükütsü aveh vü tse luo, jüta thuoüji nohri tü mühie ra naveh, ti tsü.

²⁴Thitü mari tü azhümvi nyutü mari khüna mükümrhe ke, thitü mari mpa nüh mari küzhüphie thi mari kümsü luo veh müküzike vü tsetewa, jütisanü atü vü mütsezhie nüh asevü tsetewa.

²⁵Noh pari Egypt zhih vünüh tse zhuteküru rülo vü nüh nosü küju hi nüh mükütuo nü eh siepe setsaküthsüri aveh rülorülo küze;

²⁶tü mari tü eh zhü müküna, nyutü mari khüna mükümrheke, thitü mari aku kuotike. Mari pari nyieh vünüh kümsütsa sa.

²⁷Jükenüh noh tü azhü hamari aveh mari vü küza naveh, thitü mari noh zhü künawa nyu. Noh nüh mari ji naveh, thitü mari tü noh küühuwa nyu.

²⁸Thi noh nüh mari vü, kuohji hamatü VÜWA mari Saküüwuowa jikhi müküviri, thi khuoke kümhie müküviri; küzütsa tü pokahmthuo, jüma tü mari apo vünüh fethuomthuoh.

²⁹Noh sheh müjie nü jam luo; azhie kümsieri vü küülu küsü sakümsieluo, küpakenühnyunü VÜWA nüh ma rükümtho wulewa kule thi jakümthuo kenüh ta küza naveh,

³⁰küpakenühnyunü Judah tsari tü eh küngu vünüh kümsü samthuoh, ta VÜWA nüh küza; mari nüh mari kükre eh nyo vünüh küji azheh vü sakemthuoh, jüma sakümne nta.

³¹Jütisanü mari tü Tofeth azhie kürügiwa sasaveh thuoh, jüma tü Hinnom atsa anyuo vü pehveh, mari atsa nyimpari thi atsavühri anyih vünüh tso nta; jüma tü hi nüh azhümtsü, nyutü jüma tü eh müshe lovü nga müturu.

³²Jükenüh halie, arülori tü tetsethuoh, ta VÜWA nüh küza, jüma tü Tofeth ta müküji le, nyutü Hinnom atsa anyuo ta müküjile, thitü kürehthe nyuo ta küji rülo teru nathuoh: küpakenühnyunü mari nüh alo vü Tofeth chowumna küvehthuoh kenüh, küpa vü küshothuo münyie nüh samna küvehthuoh kenüh.

³³Thi anyi hamara küsü kümo tü amürhü vü prükütseri thi azhi vü asara shie sanaveh; thi nyi küsü nga nüh mari saküükrüwanyu.

³⁴ Thi hi nüh Judah nyujiri vünüh thi Jerusalem külozhe loku khi thi aloküwie khi, kümnyutepawa thi kümnyutevühwa khi ti khetemtü naveh; küpakenühnyunü azhih jüma tü jakümsam na küvehthuoh kenüh.