Read Pochuri Naga JEREMIA 8 Bible Online

JEREMIA 8 - Pochuri Naga bible

JEREMIA 8

¹Jüma tsotho vü, ta VÜWA nüh küza veh, Judah kajiri arü, kajitsari arü, anavüri arü, setsaküthsüri arü, thi Jerusalem vü ariera rü tü mari rüku lo vünüh vizhu naveh;

²thi mari tü arünyi, asa thi atülüra shieji aveh, mari nüh kümzeküm thi akütsü küsa, mari ase nyiteküwa, mari nüh küphah thi kükhuorü tü vü voriem naveh; thi mari tü küvizhuwa nyu nyutü küchowie wa nyu; mari tü azhito atso nyiehvü asü kümjie sam naveh.

³Hi nüh azhie aveh vü zhejaküm kümsü atharuo mülo nü pehküveh hamari tü akürho nyieh vünüh aküsü nüh küümngu sanaveh.

⁴Noh nüh mari vü, VÜWA nüh hakümjie küza veh: Nyiri külu küm vü mari tü süra mütsiele ülo? Mükütüküzü nyi küsü nüh sühle teküwa vü ma tü sühle müru le ülo?

⁵Thinü mokenüh anyi hamari tü küsuokürho asevü tseketewa lo? Mokenüh Jerusalem tü tsotho aveh sühle tewa veh lo? Mari tü kürieriekhri küjehphoke, mari tü küsühle mam.

⁶Hi nüh kütsake tsü nü küna thuoh, thitü mari tü kümshowa mphahte; nyiküsü nga ma kümsüküsa vünüh mükhaphrü; hi tü mowa sam lo? ta küza taji. Mari aveh nga ma mpa ma lehkhuji vü sühletewa, rawuh küsü nüh alüküshoh nü arie küsa vü joke küwa kümjie.

⁷Atülüri vü amwa nga ma tsothori thsü veh; thi tuturhe, arhünyie, thi souzüwiza ri wienga mari küru tsotho sa veh, thitü eh nyiri thuoüji VÜWA zhükho müthsü.

⁸“Nohri tü mokümjie nüh, ‘Hiri nü zanyo thsüm, thi VÜWA khonyo tü hiri küpehveh, ta küzara na lo’? Thitü halie küriera kürhüvüh tü, akürie samthuoh.

⁹Zanyoküthsüri tü küzükrü vü vithseru nathuoh, mari tü luoveh saküzah nü sietewa naveh; halie, mari tü VÜWA zhü kulejamthuoh, thinü mowa zanyoküthsü mari vü pehveh lo?

¹⁰Jükenüh hi nüh mari vüvühri vi küpari tsüm na thuoh, thi mazhuhri vi kükhrarari vü tsüm naveh, küpakenühnyunü a küzahtsawa vünüh wa aküjitsa wa küju mükümsho vünüh künyie mngu kheh mü; Setsaküthsüwa vünüh anavüwa küju küzhüja vünüh küsa khehwie.

¹¹ Mari nüh eh nyira kümsamna rüzishe nü roza kütsü thuoh, jüti sanü kürükümhie münyie wie ketü nga, kürükümhie, kükümhie; ta küza zati.

¹²Mari tü akükre sakümvü mari tü zükrü ülo? Nyu, mari tü piketü müzükrü wie; mari tü anyieh maküzüh thsü, jükenüh mari tü külukümri azhie vü külukem na thuoh; hi nüh mari kümnomna kütsü vü mari tü sakükamtü nathuoh, ta VÜWA nüh küza.

¹³Hi nüh mari vizhuh nta küsa vü, ta VÜWA nüh küza, rhelivi rhu vü avi müpe, nyutü müpah rhu vü ma vi müpe; ma nyawari wie nga wazhümthuoh, thi hi nüh mari mowa tsü nüh mari vü nüh tewa thoh,” ta küza.

¹⁴Mokenüh hiri tü zota shupeveh lo? Kürü sehzhuh luo, kürü shieku nyujiri Vüwa nü pokahmü ünüh raluo; küpakenühnyunü VÜWA hiri Saküüwuowa nüh hiri küüpokah nta küüsakümthuoh kenüh, thi hiri vü kümzhi tsü nü küüzhumthuoh, küpakenühnyunü hiri nüh VÜWA vü khiemuo kümthuo kenüh.

¹⁵Hiri nüh kürükümhie no, thitü kümhie küsü nga müru nüh sam, Saküümhie tsotho no, thitü halie, küsüro müpa.

¹⁶Mari rawuh nyakukhi tü Dan vünüh künara; mari rawuhvo kükhu jikhi tü azhih ajü küzhüh, mari nüh ru nü azhih jüla thi jüma lovü proküveh aveh zoriem, anyujiwa thi jü lovü kürhori aveh nga zoriem,

¹⁷küpakenühnyunü halie, hi nüh nohri aresü ri küze veh, jüma mükürerari, thi jümari nüh nohri shü naveh, ta VÜWA nüh küza.

¹⁸Eh sheküsü tü saküümhie ra anyieh vünüh tewa thuoh, eh luoveh tü eh lo vü nüh namthuoh.

¹⁹Künaluo, azhih kümsho thi kümthsü vünüh eh nyiri tsavühraküzie: “VÜWA tü Zion vü pehmveh thuoh ülo? Ma kajiwa tü ma vü pehm veh thuoh ülo? Mari tü mokenüh mari nüh kükhrüke atsori vi thi aliera nguori vinü eh rüsakümtho nü arüsaküshu veh lo?”

²⁰“Kümawie tü te wathuoh, müzhü tü jum thuoh thitü hiri tümükülole.”

²¹Eh nyira tsavühwa kümsamna tü eh luoveh kümsamna wie thuoh, hitü shükheke, thi luovehküzah nüh hi küjihtem thuoh.

²²Gilead vü jürezhi münyiethuoh ülo? jüla nazi küthsü münyiethuoh ülo? Thinü mokenüh eh nyira tsavü ra sazüh tü müsakümhiele lo?