Read Pochuri Naga JEREMIA 9 Bible Online

JEREMIA 9 - Pochuri Naga bible

JEREMIA 9

¹O eh lü tü ajuh sa thi eh notha tü küwuzhu rüthsü küsü sa thuoüji, eh nyira tsavüri rehtheküm kenüh arülo thi arüza krie na nü!

²O hi tü shünyiza vü eh kenüh azhie küpele tüla küzekütsera kenüh kümnyiepe küpeh tüla, jüla eh nyiri jam nü mari vünüh tewa na nü! küpakenühnyunü mari aveh tü küüphroküphrieri sakümthuo kenüh, aro kümsü nyiri riekhuo küsa kenüh.

³Mari tü mari mizhi lawi kümjie kükho; mari zhih vü küzhüja thi zhütsa mükünyu rho müzhomthuoh; küpakenühnyunü mari tü kümsü vünüh kümsü vü sate mthuoh, thi mari tü hi müthshü thuoh, ta VÜWA nüh küza.

⁴Nyiri aveh nga ma zhephruwa vünüh azhüzhükhe luo, thi ajienü küsü vü nga alehmno tümluo; küpakenühnyunü ajie nü aveh nga kümramzhi kheh wie, thi azhephru aveh nga akürieküphrari küsü üta kuoküwa wie.

⁵Anyiri aveh nga ma zhephruwa müramizhizhiti, thi nyi küsü nga küzhütsa müphrate; mari tü akürievi mari mizhi sosie mthuoh, mari tü künakhie samthuoh thi khaphrü na küsa thasümthuoh.

⁶Kümrü rügi vü kümrü müjuke, thi kürieriekhri rügi vü kürieriekhri müjike, mari tü hi thsü na küsa mam wiethuoh, ta VÜWA nüh küza.

⁷Jükenüh VÜWA nüh hakümjie küza veh: Halie, hi nüh mari tsoküülie thi müte naveh, eh nyiri kenüh hi tü mowa sa hü nalo?

⁸Mari mizhi tü aküsü shüchu; jüma tü rieriekhrisheh nü phrahteteti; mapo vüvüh küphratephrate vüh ma zhephruri vü kürükümhie phrahteteti, thitü ma luoveh lovü thuoüji ma kenüh thuolalati.

⁹Zanyo hamari kenüh hi nüh samküümnomna tüm naveh ülo? ta VÜWA nüh küza veh; thi hi nüh akuoküji ha üta küsa ri vü amüthoh müsatüm naveh ülo?

¹⁰“Aküzhiri kenüh akükrie thi kürera vike luo, thi rezari arekümzhi kenüh kürümuo küsü vike luo, küpakenühnyunü jümari tü jaküsüm nü nyi küsü nga mükashukarithuoh, thi mieshürüli kükhu nga künara müvehthuoh; amürhü vü amüwari nga thi samwari nga jo nü te wakheh thuoh.

¹¹Hi nüh Jerusalem tü ferie küümprokem nathuo, rezanyihnyih küpepe küsü küsam naveh; thi Judah nyujiri tü küüzoküm küsü küsam naveh, müküürhie nüh sam naveh” ta küza.

¹²Thawa nüh zanyo thsü sheh taji thsümshira nalo? Jüma küzazhu naküsa kenüh thawa vü VÜWA po tü phrahte lo? Mokenüh azhih wa tü reza kümjie ferie thi kümsü jam nü nyi küsü nga kütsuokükhru müsalo?

¹³Thi VÜWA nüh, hi nüh mari atüvü akhonyo sakütsüwa kuleja kümkenüh, thi eh jikhi müvi nüh saküm kenüh, nyutü müzhe nü mükütse kenüh,

¹⁴ma pari nüh mari küsosie üta müzike wie thuoh nüh mari mpa luovehmüzhetewa thi Baalri asevü nyi tewa.

¹⁵Jükenüh VÜWA, Israel Saküüwuowa nüh hakümjie küzaveh: Halie, hi nüh amürü vi, anyi hamara vo sanaveh, thi kümzhiajuh küüzhu naveh.

¹⁶Hi nüh mari tü mari nga thi mapari nga müküthsüri aza vü saküvoriem naveh; thi hi nüh mari asevü anyuchuwa küze naveh, hi nüh mari müjieh küpokah küju nü, ta küza.

¹⁷Kümsietsa VÜWA nüh hakümjie küza veh: müshenoluo, thi küluküveh nyimzari ji nü küüru luo; wuori küze nü arokümhie nyimzari ji nü ru luo;

¹⁸mari küüpretsamie luo thi hiri rügi vü rerake luo, jüta küsa vünüh hiri notha tü arüthsü liwara naveh, thi hiri nohu tü ajuh nüh lizhu naveh.

¹⁹Zion vünüh küzia jikhi küsü küünara kenüh; hiri tü mokümjie feriemlo! hiri tü zükrü jumthuo, hiri nüh azhihwa jakümthuoh kenüh, mari nüh hiri kürhoperi vija kümthuoh kenüh, ta küna ra.

²⁰Künaluo, O nyimzari, VÜWA zhü, thi noh ri küna tü ma po lovü azhüwa vi luo; nohri tsari vü küshükhele vi sosieluo, thi ma zhephru ri küsüsü vü lokürüza sosieluo,

²¹küpakenühnyunü aküsü tü hiri mürhü lepie vü rupeh küveh thuoh kenüh, jüma tü hiri kajizhehri vü turumthuoh, alerari vünüh atsari rehthuoh, thi alie vü nüh vizari rehthuom.

²²Phrahte luo, hakümjie vünüh küza veh: “Anyira küsü kümori tü asü kümjie azhuh külie vü tsuotsanaveh, kümawiera sevü müthaküshih kütsuotsa kümjie naveh, thi nyi küsü nga nüh jümari küzhuhwa nyu,” ta küza.

²³Hakümjie VÜWA nüh küza veh: zanyoküthsüri tü ma mpa makümahtsa vi mürhiezarhiechi tüm, anyi kükhrari ma mpa ma kükhra vi mürhiezarhiechi tüm, nyirheri tü ma mpa ma künyirhie vi mürhiezarhiechi tüm;

²⁴thitü kürhiezarhiechiwa tü hama vünüh rhiezarhiechi luo, jüma tü hi thsümshi thi thsü ti küsawa, thi VÜWA tü azhih vü mükhaprükhale küümze kümsho, thi künyitsa küsawa wie thuoh; küpakenühnyunü hi tü zanyo hamari nolo küm kenüh, ta VÜWA nüh küza veh.

²⁵Halie, arulori tü tsethuoh, ta VÜWA nüh küza veh, ahu tsikümri thitü mükütsi aveh kümnomna tsüna,

²⁶Egypt, Judah, Edom, Ammon atsa, Moab, thi küpohu vü kürho mari lüshe kümjieri aveh hi nüh kümnomna tsünaveh; küpakenühnyunü akuoküji hamari aveh tü ahu mkütsi kenüh, thi Israel zhehlo aveh tü aluoveh lovü mükütsi kenüh.