Read Pochuri Naga KÜRÜMUO 1 Bible Online

KÜRÜMUO 1 - Pochuri Naga bible

KÜRÜMUO 1

¹Anyujiwa tü küzakele nga küzo nü pehveh thuoh lo, küsükeri nü anyiri nüh pro nü! Ma tü mokümjie tünyivühri küsü kümjie samthuoh lo, ma tü thopahiri aza vü aküjiwa tü! Anyujiri azavü kajiratsa küsawa tü nyura siepe küsü samthuoh.

²Arüza vü ma tü khielota krie, ma khajie rügi vü arüthsü küpeke nü; ma külori aveh azhie vü ma tü nyiküsü nga ma luovehsakürüzi münyiethuoh; ma füri aveh nüh ma vü aroshimthuoh, mari tü ma mükünongüri samthuoh.

³Judah thuoüji kümnomna kenüh reviteküwa thuo thi siepe wa savehthuoh; ma tü khinyi nü akuoküjiri azavü rhovehthuoh, thi kümnyie azhie mphahra nüh sa vehthuoh; ma zheküüshokeri ma müshe küna azhievü nüh ma phamthuoh.

⁴Zion vü küwa leh tü küluvehthuoh, küpakenühnyunü nyi küsü nga akhu küte küsawa ru mküvehthuoh kenüh; ma kheri aveh tü jaküüzomthuoh, ma nasari tü lüchi vehthuoh; ma rüla kürünguori tü shüthuokemthuoh, thi ma müngu tü khake pehvehthuoh.

⁵Ma küümaküshiri nüh ma avü samthuoh, ma mükünongüri nüh tsarhiem thuoh, küpakenühnyunü ma nüh khielota küphrie kenüh VÜWA nüh ma sakümnomna kümthuoh kenüh; ma tsari tü tewathuoh, küümaküshiri atüvü aküsi satewathuoh.

⁶Makükhra aveh Zion tsavühwa vünüh karitewa khe thuoh. Ma kajitsari tü arüpuo kümrhuope müküphahra kümjie samthuoh; mari tü zhetseri atü vü kükhra münyie nüh jote veh thuoh.

⁷Jerusalem tü müshekera, ma müshemnomna thi tse tekütse rülori, khana rülo vü amekürhe ma zhi küsari aveh. Ma nyiri nüh küümaküshira ke vü tekütuvü, thi nyiküsü nga nüh ma küükra mükünyievü, küümaküshiri nüh ma küloküm noküze vü müküchie sa.

⁸Jerusalem tü khiemuo müsüshehke wiethuoh, jükenüh ma tü müküchie küsü samthuoh; ma küchierheri aveh tü ma mamthuoh; küpakenühnyunü mari nüh ma nyiju ngukümthuoh kenüh, ma wienga lüchi vehthuoh, thi ma nyieh kürele tewathuoh.

⁹Ma mükümtse tü ma küüleh vü küpeke, ma tü kürule ma kenüh kümshe müsa; ma küloküm tü azüh saküüngeke sa, nyi küsü nga nüh ma luoveh saküürüzi münyie nüh sa. “O VÜWA, eh kümshemnomna kenotü mo, küpakenühnyunü mükünongüri nüh khra kümthuoh kenüh,”

¹⁰Mükünongüri nüh ma kürhe zanyori rügi vü makeri thsuokem thuoh; ma kümtsezheh tü akuoküjiri nüh zheküvi nga ngu wiethuoh, noh tü noh ashieji vü müküütu nta mari khete.

¹¹Ma nyiri nüh alohse küpha vü mari aveh tü lüchi khe; mari kükhra sakürhole nta kütsaküzhu kenüh makünyirhieri vi nü asüsa. Noluo, O VÜWA, halie hi tü mame mükünyie samthuoh ünüh.

¹²Nohri kütsuokükhru sa küvehri nohkeri nüh jütü zanyoküsü nga nyu ülo? No küze nü eh luovehküna kümjie mükütüzü wuori naveh ünü nyu nüh noluo, hi vü viru kümwa, VÜWA nüh khielota ma rüküshu rülo eh müshe sakümnomnam.

¹³Kümsie vünüh ma nüh anyih küze; jüma tü eh rüri lovü küzhoke tetu; ma nüh eh mpha kenüh aveh küsü shohta sa, ma nüh hi asevü saküüsühle; ma nüh hi saküüngothse anyieshojü.

¹⁴Eh küphrürie tü thsohkhuonyi küsü vü kürikemthuoh; ma ke nüh jümari tü müsürümtü thuoh; eh ku rügivü küüzho tü, ma nüh eh kükhra saküram thuoh; VÜWA nüh hi vi nü hi nüh mükütsierari ake thsemthuoh.

¹⁵VÜWA nüh eh zhievü nüh eh rieküsari aveh kulejamthuoh; eh küvizari küchenya nata ma nüh atsotho küsü hi vü zhüchümthuoh; VÜWA nüh Judah mükükhrüsavühri tü kütsüzhu kümjie nyinyamthuoh.

¹⁶Zanyo hamari kenüh hi tü krie; eh notha tü arüthsü nüh tsa; küpakenühnyunü luoveh saküürüzihwa tü letsuoküm kenüh, eh luovehküji sakürho naküsa kenüh; eh tsari tü küüzomthuoh, küpakenühnyunü mükünongüri nüh sarateküwa kenüh.

¹⁷Zion tü ma ke küchuo küze, thitü nyi küsü nga ma luoveh sakürüzi münyie luo; VÜWA nüh Jacob zhephruri tü ma küümaküshiri küsa nta azhütsü, Jerusalem tü mari azavü zanyo kümne küsü samthuoh.

¹⁸VÜWA tü awuleh vü pehveh, küpakenühnyunü hi nüh ma zhü sie saluo küm kenüh; thitü künaluo, nohri anyiri aveh, thi eh kümnomna noluo; eh nyi kürünguo rülari thi vizari tü aküsi satekheh thuoh.

¹⁹Hi nüh eh külori ji thitü mari nüh hi müramthuo; eh navühri thi kükhruori tü anyuji vünüh pokahm thuoh mari kükhra sakürhole nta ashie phahküveh vünüh.

²⁰Noluo, O VÜWA, hi tü küzakele nga müshemnomna lo; eh vo tü kürho vehthuoh, eh luoveh tü eh lovü nüh kürüh vehthuoh, küpakenühnyunü hi nüh müküzike kenüh. Anyuchuwa vi nü alera vünüh rethe; azheh vü thuoüji jüma tü aküsü kümjie.

²¹Hi nüh mokümjie lüchi veh ünüh mari nüh künara, nyi küsü nga eh luoveh saküürüzi münyie nüh. Hi mükünongüri aveh nüh eh küsüro künara; noh nüh jüüta saküm mari tü alowie. Noh nüh küthsüküm rülowa viraluo, thi jümari tü hi kümjie küüsam luo.

²²Mari nüh kümsü küsa aveh tü noh tüvü küüru luo; thi noh nüh hi vü küsa üta mari vü nga saluo eh küphrürie aveh kenüh; küpakenühnyunü eh külüchi tü zhim thi eh luoveh tü thasü thuoh.