Read Pochuri Naga KÜRÜMUO 2 Bible Online

KÜRÜMUO 2 - Pochuri Naga bible

KÜRÜMUO 2

¹Mokümjie VÜWA rüküshu vünüh Zion tsavühwa tü sakürünyie lo! Ma nüh Israel küüzhu tü atülü vünüh azhih vü vehjaküzem thuoh; ma tü ma rüküshu rülo vü ma jinyipe mümsheke nüh samthuoh.

²VÜWA tü mülona wie thuoh nüh Jacob kürhoperi aveh zoriemthuoh; ma rükümtho vünüh ma nüh Judah tsavühwa shiekuri zophuomtüthuoh; ma nüh müküchiekürhe vünüh kajipe thi ma takrüri azhih vü viteru mthuoh.

³Ma nüh ma müküüzhikera rüküshu vünüh Israel kükhra aveh rechiemtü thuoh; ma nüh mükünongüra nyieh vünüh ma ke azhie wuowa vimtüthuoh; ma nüh Jacob vü anyih azhu kümjie küsa küsü nüh tsomthuoh, tsorie küzülemthuoh.

⁴Mükünongüri küsü kümjie ma nüh ma lowie veh, küümaküshiri küsü kümjie ma ke azhie wuovü jüma sake; Zion tsavühwa juhthsüzheh vü hiri nüh vi rhieza küvehri aveh zothem; ma nüh ma he tü anyih kümjie küshokemthuoh.

⁵VÜWA tü mükünongüri kümjie samthuoh; ma nüh Israel zoriemthuoh. Ma nüh ma kajizhehri aveh zoriemthuoh, ma shiekuri tü küferie vü samthuoh, thi Judah tsavühri vü küülu thi kürümuo saküzhimtüthuo.

⁶Aphari küsü kümjie ma nüh ma shühzheh zochiemtü thuoh, ma nüh ma juhthsü kükhurüzheh zoriem tüthuoh; VÜWA nüh Zion vü akhule thi kümnyirülo sekhe samtüthuoh, thi ma haküze rüsakümtho vünüh kajiwa thi anavüwa alo müküra samthuoh.

⁷VÜWA nüh ma kükhurüpe müküchie thuoh, ma kümtsezheh müküüvi samtüthuoh; ma kajizheh azieri ma nüh mükünongüri akevü thsemthuoh; akhu rülo küsü vü üta VÜWA zheh vü kükhara jjikhi küsü vizhu.

⁸VÜWA nüh Zion tsavüh aziewa ferie nta müshemthuoh; ma nüh arüshu li thsomthuoh, ma nüh küzorie vünüh ma ke müvite nüh samthuoh; ma nüh jüke thi azie sakükriemthuo; mari tü kürü lorü vehthuoh.

⁹Ma kheri tü azhito lovü küzhoke tetuthuoh; ma nüh ma rüpeküthsoteri ferie thi zothuomtü thuoh; ma kajiwa thi ma kajitsari tü akuoküjiri azavü pehvehthuoh; awulewa tü münyie luo, thi ma setsaküthsüri tü VÜWA vü nüh kümohtsa müngu nüh samthuoh.

¹⁰Zion tsavüh kükhruori tü tsüke nü azhito rügivü shupeh veh; mari tü mari alü rügivü azhitho jake thi atsahkie küzhu ti sa vehthuoh; Jerusalem rüla kürünguori tü ma lüri azhihvü küngie tsuothuoh.

¹¹Eh notha tü akükrie vünüh viküzemthuoh; eh rüzhe tü kürhosü vehthuoh; eh luoveh tü lokürü nüh azhih vü mzhiathuo eh nyiri küzorie kümü kenüh, küpakenühnyunü anyuji lerari vü nyinyuoteri thi kürnyiri tü puonü küloküveh kenüh.

¹²Mari tü ma zahri vü krie taji, “Alohse thi akhah khiela pehveh lo?” ti sa, anyuji alerari vü kümsamnari kümjie külo nü, mari kürho tü ma zahri tüso rügi vü küüshoke üta.

¹³Hi nüh noh kenüh mowa küzara na lo, mowa vü nü noh kümjiera na lo, O Jerusalem tsavüh wa? Hi tü mowa vünüh noh lora na lo, thi noh luoveh sakürüzi na lo, O Zion tsavüh mükükürüsa wa? Noh küzorie tü juhküji üta; thawa nüh noh sakümhie ra na lo?

¹⁴Noh setsaküthsüri tü noh müküleküsa thi akürie kümohtsa ngumthuoh; mari tü noh müngu satsüle nta noh künakhie mükütsatü thuoh nüh sa, thitü noh tü müküleh thi küjomsü tse ta küsa zhüle zhüri ngu.

¹⁵Aleh vü kükashukariri aveh nüh noh vü mari ake je; mari nüh Jerusalem tsavüh wa vü ashih ti sa thi ma lüri küze; “Anyu hamatü aküzü tsawa azhih aveh loküüzhewa ta küjiwa thuoh ülo?” ti sa.

¹⁶Noh mükühnongüri aveh tü noh vü apo ka kheh; mari nüh eshih tisa, ma hari hahri, mari nüh zie taji: “Hiri nüh ma zoriemthuoh! O, hiri nüh münguküru rülo tü hamathuoh; asetsatsa vünüh hiri nüh jüma ngura thuoh,” ti sa!

¹⁷VÜWA tü ma nüh santa kümshewa sathuoh, ma nüh ma saküükrüwa viwa ra thuoh; khanavü nüh ma nüh awuleh saküm üta, rüthaküna münyie wiethuoh nüh ma nüh zoriemthuoh; mükünongüri tü ma nüh noh nyieh vü nyierakü-khruom thuoh, thi noh küümaküshira kükhra saküjimthuoh.

¹⁸VÜWA vü zie luo! O Zion tsavühwa azie! Arüthsü tü arülo thi arüza ti akuvü küsü kümjie li küütsuoluo! Noh mpa nüh kümnyie mütsü tüm luo, noh notha tü müküzhitümluo!

¹⁹Süra nü arüza vü zie zhu luo künoteri küsate vü nüh! Ajuh küüsho kümjie VÜWA tsatüvü noh luoveh küshoke luo! Noh tsara kürholi kenüh noh ke ma vü khroke luo, alera leshi aveh vü mari tü kürüma kenüh külokheh.

²⁰Noluo, O VÜWA, thi müshe nonoluo! Noh tü hama thawa vü sathuoh lo? Khrevühri tü mari tsatori tsanaveh ülo, atsa mari nüh wuo küsari? Anavüwa thi setsaküthsü wa tü kefethe leh ülo, VÜWA kümtsezheh vü?

²¹Rünguori nga thi kükhruori nga alerari azhih vü zeh veh; eh nyimza kürünguori thi küvizari tü anyuchuwa vünüh tsuotsamthuoh; noh rüküshu rülovü noh nüh mari fethem thuoh, rüthaküna münyie nüh süthekhehm.

²²Akhu rülo küsü kümjie vünüh noh nüh hi mükünongüri azhie aveh vünüh ruso; thi VÜWA rüküshu rülovü nyi küsü nga mümrie nyutü mürhora nüh sam; hi nüh vü nü küjeküruri tü hi mükünongüri nüh zorie khehm.