Read Pochuri Naga KÜRÜMUO 3 Bible Online

KÜRÜMUO 3 - Pochuri Naga bible

KÜRÜMUO 3

¹Hi tü Saküüwuowa[1] rükümtho mürüzhietshü müshekümnomnakünyuwa;

²ma nüh hi zhezhujam nü aküwie küsü nga mükünyie aküzo lovü sieru;

³hi vü müpa nüh ma ke küreleke, arülo aveh hi vü sahüji sahü, ti sa.

⁴Ma nüh eh sa thi eh sahu ti samsü küzemthuoh, thi eh rüri zoshim;

⁵ma nüh akükha thi kümnomna küji vi hi mükiete thi sahietem thuoh;

⁶khanavü nüh sükümri kümjie ma nüh hi vi vü shuküüpehmthuoh.

⁷Ma nüh hi azie samkielem nü hi tü mümriera wiethuoh; ma nüh akieveh küüzho vi hi vü thsem tü thuoh;

⁸hi nüh küükra kenüh ji thi zie ketünga, ma nüh eh kükhuo sotem tüthuoh;

⁹Ma nüh aloh külokhuori vi nü eh lehkhuji totem tü thuoh, ma nüh eh lekhujiri saküükhuhmtü thuoh.

¹⁰Ma tü eh kenüh awie küsü küchuo nü huoküveh wie, amiewuo küsü küthi peh küveh üta;

¹¹ma nüh eh lehkhuji vü siewa nü hi mürhüm thuoh; ma nüh hi tü saküüzojam thuoh;

¹²ma nüh ma lawih heh nü hi tü ma shüchu kümjie vüh sa.

¹³Ma nüh ma shüchuku ashüchuwa nüh eh luoveh lo vü kathse;

¹⁴Hi tü eh nyiri aveh vü riesaküükhri vüh küsü samthuoh, anyieshojü mari nüh kürieza azah zanyoküsü samthuoh.

¹⁵Ma nüh kümnomna vi eh kha-shie küsamthuoh.

¹⁶Ma nüh eh ha tü vi aloh küümkomthuoh, thi aweji vi ehnyie küüthsümthuoh;

¹⁷eh kürho tü luovehkürüzi mnyie nüh samthuoh; loküzhe nü mowa nüh hi tü kümam;

¹⁸jükenüh hi nüh, “Teküwa wa tü eh kütholathovü, thi VÜWA vünüh hi nüh luozheküruwa,” ti küza.

¹⁹Eh müshe kümnomna thi lokürü mshe noluo, ma kükha küzake le nüh!

²⁰Eh kürholi tü jüma müshe peh huo thi eh lovü kükie tsuo.

²¹Thitü hi nüh hama eh luoveh lovü nüh ji, jükenüh hi tü küluozhe pehveh:

²²VÜWA mükükhaphrükhale külo tü piketü mükütuo, ma noküümze tü piketü asehkhe vü müru wie;

²³jümari tü rüne kürüzhu rüthe pehveh; aküji tü noh küzhütsa nyitsa wie thuoh.

²⁴“VÜWA tü eh suopewa,” ta eh kürholi nüh küza veh, “Jükenüh hi tü ma vü luozhe naveh.”

²⁵VÜWA nü ma huo küperi vü mühie, kürholi ma küphahri vü.

²⁶VÜWA küülolera wa kenüh zota kühuowa nüh mühie.

²⁷Nyi küsü nüh ma küviza vünüh thsokhuonyi küvüwa nüh kümphakhe,

²⁸VÜWA nüh jüma vike vüm thuoh tinü zota papaküsa peh luo,

²⁹nyi küsü nüh ma po vi azhitho lovü thse, küluozhe peh mühie küveh kenüh,

³⁰nyi küsü nüh aküjewa vü ma nakieh tsü, thi kümsamnyi vi saküpro,

³¹küpakenühnyunü VÜWA tü küsuokürho kule küjawa nyu.

³²Ma nüh asheküsü satsü wie ketünga, ma tü rüthaküna peh wie naveh ma mükükhaphrükhale küümze küwuzhi müzhe nü;

³³küpakenühnyunü ma tü nyi küsü müshesa kümnomna nyutü ashesaküüsü mükülo kenüh.

³⁴Azhihwa küsiri aveh ampha kükhu vünüh küchenyam wie ketünga,

³⁵Nyiküsü ma kümsho küpewa kümsie tsawa tsatü vünüh notheriem nta küsa,

³⁶nyi küsü ashih tü mülelem tü thuoüji VÜWA nüh jüma ngumveh tü ülo?

³⁷Thawa nüh azhütsü nü jüma sara na lo, mükütüküzü jüma tü VÜWA nüh shie mütsü thuoüji?

³⁸Kümhie thi kümsü küru tü kümsie Tsawa po lovü nüh nyu ülo?

³⁹Mokenüh rhoküvehwa tü ma kükhiemuo kenüh jakhujazhi na lo?

⁴⁰Hiri lehkhuji müteno thi nono nü VÜWA vü shelewa ünüh raluo.

⁴¹Atülü vü küpeh Saküüwuowa vü hiri luoveh thi hiri ake nga ti thsuoke ünüh raluo.

⁴²Hiri tü phrürie thi azhümvi nüh samthuoh, thi noh nüh nomjatüthuoh.

⁴³Noh tü noh mpa nüh arüküshu vi noh küzhute nü hiri zheküshoke, norüthaküna münyie nüh zothe;

⁴⁴noh tü noh mpa nüh akülu vi noh küzhute jüti sanü akükhuo küsü nga müküru nüh sam.

⁴⁵Noh nüh hiri tü kümne thi atsüne anyiri aza vü küüsam thuoh.

⁴⁶Hiri mükünongüri aveh tü hiri vü mari apo kamthuoh;

⁴⁷ngosetu thi azhikrie tü hiri vü rupehm thuoh, zoriejakhe thi küzoriezosa nga hiri vü rumthuoh.

⁴⁸Eh nyiri küzoriezosa kenüh eh notha tü arüku rüthsü limthuoh.

⁴⁹Eh notha tü mükütuo nüh thi mümzhi nüh li pehthuoh wie na thuoh,

⁵⁰VÜWA nüh atülü vünüh noküze nü müküngutü küju nü.

⁵¹Eh notha nüh eh nyuji vü nyimzari kümnomna ngu nü ehlo sakürüveh.

⁵²Marühle küsü nga münyie nüh hi mükünongüri tü amüwa küsü kümjie hi küka veh;

⁵³mari nüh hi tü kümrho mrho azhikrie küsü lovü vehjake thi hi vü alohri vehthse;

⁵⁴Eh lü vü ajuh nüh külüwute; hi nüh, “Hi tü kümiemthuoh,” ti sa.

⁵⁵Hi nüh noh nyo jithuoh, O VÜWA, azhihkrie küsheh lovü nüh;

⁵⁶noh nüh eh kükhuo künarathuoh, “Hi küükra kenüh noh khüna müsate tümluo,”

⁵⁷Hi nüh noh küji vü noh tü hi shenyiru; noh nüh, “Mükrütüm luo,” ta küza!

⁵⁸Noh nüh hi rhoküveh vitsüthuoh, O VÜWA, noh nüh eh kürhorhesathuoh.

⁵⁹Hi vü müküleh saküm noh nüh nguthuoh, O VÜWA; eh kürho notüluo.

⁶⁰Mari nüh hi vü shewi küthuo thi aro kümsü küsa noh nüh nguthuoh,

⁶¹Mari nüh müküchie küsa noh künara thuoh, O VÜWA, hi vü mari nüh aro kümsü küsa aveh nguthuoh.

⁶²Eh sieküsaluora küzhüwe thi küjakhujazhi tü arülo ajü hi ruoluo.

⁶³Mari küshupeh thi küsüra tü noluo, hi tü mari nüh küüriesarienyi küsü wiethuoh.

⁶⁴Mari nüh küsa kümjie vünüh mari vü satsüle luo, O VÜWA, ma keri nüh küüroh müzhe taji!

⁶⁵Mari vü aluoveh müsheküna tsü luo; noh kümzüwa tü ma vü peh luo!

⁶⁶Arüküshu vünüh mari zheküshoke nü VÜWA tülüri kükhu vünüh mari zoriem luo.