Read Pochuri Naga EZEKIEL 10 Bible Online

EZEKIEL 10 - Pochuri Naga bible

EZEKIEL 10

¹ Jüsevü hi nüh noküze ünü Cherubim alü anyieh rügi vü khremü sithe kümjie küsa kükajipe küsü atso küthse kütsa.

² Ma nüh mürilothsü kümphiewa vü, “Cherubim saji vü satürüküüroh azhiehvü tu luo; cherubim azhievü nüh anyihie juküveh noh müza küpro vi nü anyujiwa anyiehvü zhuh luo,” ti küza. Hi nüh noküüze üta ma tü tu.

³Anyiwa nüh jüüta kuokütü vü cherubimri tü azhehwa zhieseh natovü tsie veh; jüti küsa vü akülu tü anyula alowa protewa.

⁴Thinü VÜWA kütholathovü tü cherub vünüh sühra nü azhehwa akheji wuovü wa; azhehwa tü akülu nüh protewa, thi anyula tüVÜWA kütholathovü küwierake nüh protewa.

⁵Cherubimra küsa khi tü anyula aliewa küju künara, Saküüwuowa Kükhratsawa azhüküphra vü jikhi kümjie.

⁶Ma nüh mürilothsü müphieküvehwa vü azhükütsü vü, “Satürüküüroh alovü cherubim azhievü nüh anyih vi luo,” ti küza, thinü ma tü wa nü satürü küsü nato vü tsie.

⁷Jüti küsa vü cherub küsü tü cherubra azhievü nüh ma ke anyih cherubri azhievü pehküvehwa vü thsuo zhuru nü anyih pike vi nü jüma vi mürilothsü müphieküveh anyiwa ke vü thse, thi ma nüh jüma vi nü alievü shutewa.

⁸Cherubimri tü mari küsa kükhu vü anyira ke atso küngu.

⁹ Hi nüh noküze ünü cherubimri nato vü satürü müzü pehveh; thi cherub küsüsü nato vü küsü; thi satürüra tsonyie tü kümzhi sithe küphrieh küveh kümjie.

¹⁰Thi mari atsonyie kenüh thuoüji mari müzü aveh nga zarike wie, Satürü küsü azhievü satürü zanyoküsü kümjie.

¹¹Mari küüngah vü küüprü müzü küsüküsü vü nga mükürelewiethuoh nüh tsewa; thitü satürü atüwa nüh khie wuovü küprüke naveh ünüh küpari tü mari nüh tseküwa vü mükürele wie thuoh nüh jüma se müzhe.

¹² Mari satsa ajü mari seru, mari akeri, mari küsari, thi satürüri, mari müzü satürüri aveh vü anotha pe mükiele.

¹³Satürüri thuoüji hi nüh küünara. “Satürüküüroh” ta ji.

¹⁴ Mari küsüsü wie nga anyieh müzüzü pe: apowa thuoüji cherub anyieh, akünyia wa nyieh thuoüji anyira nyieh, kücheawa thuoüji amiewuo, thi müzüawa thuoüji aluomü anyieh, ti pe.

¹⁵Cherubimri tü süra tewa. Rhoküveh asa hi nüh Khebar rühgu vünüh künguri tü.

¹⁶Cherubri nüh küüngah vü, satürüri tü mari nato vünüh tse; thi cherubri nüh azhih vünüh süra tsie nta mari küsa kükha vü satürüri mari nato vü küpehri tü mükürele.

¹⁷Mari nüh pehte küwa vü küpari nga pehtewawati, thi mari nüh kükhake vü küpari nga khakeketi; küpakenühnyunü rhoküveh asari lovü asietsewa tüküveh kenüh.

¹⁸Jüsevü VÜWA kütholathovüwa tü azhehwa kheji vünüh shuwa nücherubra rügivü pehtewa.

¹⁹Cherubri tü mari küsa khake nü azhih vünüh sühra nü eh notha vünüh teküwa vü satürüri nga mari nato vünüh nyitewa. Mari tüVÜWA zheh zhieshu kheri lehpie vü pehtewa; thi Israel Saküüwuowa kütholathovü tü mari anyiehvü peh.

²⁰Hamari tü Khebar rühgu kütuoh vü Israel Saküüwuowa kükhu vünüh küngu akürho sari; thi hi nüh küthsü jümari tü cherubri wiethuoh.

²¹Mari aveh nga anyieh müzüzü pe, aküsa müzüzü pe, thi mari küsakükhu vü mowa nüh anyira ke kümjie küsa pe.

²²Mari aveh anyieh thuoüji mari tü hi nüh Khebar rühgu hi nüh künguvünüh atsonyie sie zarike wie. Mari aveh nga atüvü kümsho tse wa.