Read Pochuri Naga EZEKIEL 17 Bible Online

EZEKIEL 17 - Pochuri Naga bible

EZEKIEL 17

¹VÜWA zhü tü hi vü ru taji:

²“O anyi atsawa, kümshi amüshekükato küsü tsüluo, thi Israel zhehlowa vü küthsüra küsü vünüh küza luo.

³VÜWA Saküüwuowa nüh hakümjie küza veh ti küsa küza luo: Luomü küji küsü aküsa küji thi aküneh küsuo, aküneh, zhi nü asarie hozake küsa küsü Lebanon vü ru. Ma nüh amüse azhuwa sih,

⁴shiküveh azhulütsawa mükoshi nü; asüküsape azhih vü jüma sihtewa, asüji nyuji küsü vü sa.

⁵Jüsevü ma nüh azhih jüla nüh atha küsü vi, jüma vi azhisa kümhie vü sa; ajuh küzhila kütuoh vü shie, ma nüh jüma tü apra ajuh nato vü küshowa küsü kümjie vünüh shie.

⁶Jütü shizhuru nü rhelivi rhu küsü satewa taji zhiwa, thitü rünyiem; ma tsuonari tü ma vü küprüke, ma rüzoh thuoüji ma küpehpe vüpeh wie. Jüti sanü jüma tü rhelivirhu sateru; jüma tü atsuona shuru khe, thi awa küüshozhuru.

⁷Aluomü aküji küpa küsü pehle hü, aküsa aküji thi aküneh hozake pe. Thi no luo! Rhelivirhu hamatü arüzoh ma wuovü chaketewa; ma tsuona tü ma wuovü shike tewa, jüti sanü ma nüh ajuh vi zü. Jüma küshiepe aze vünüh.

⁸Jüma tü lowa nü shie le azhisa kümhie ajuh küwale kütuoh vü, jüta küsa vünüh jüma tü atsuona shi thi avi pe, thi kütholahrhelivirhu sara na küveh kenüh.

⁹Küzaluo: VÜWA Saküüwuowa nühhakümjie küza veh: Jümatü tsarhiera naveh ülo? Ma nüh jüma rüzoh külowa nyu ülo, ma vi saküüpri thi saküüwazhükümwa nyu ülo, ma wa kürüthe shikütseri saküüwanewa nyu ülo? Ma rüzoh vünüh lozhu na küsa apie kümzho nyutü nyilari kükhra müvi ketünga azhümnyie.

¹⁰Jüma lowa sheleküm vü jüma tü külie naveh ülo? zhieshu mürhü ruküka vü jüma tü wazhükhehm naveh ülo, ma küshi aze vünüh wazhümüm naveh ülo?” ti küza.

¹¹Jüsevü VÜWA zhü hi vü rule taji:

¹²Azhümküünara zhehlovü khinyi küza luo: Azanyo hamara zhühnyo noh tü müthsü ülo? Mari vü küza luo: Babilon kajiwa tü Jerusalem vü ru nü ma kajiwa thi ma küjiri Babilon vü sietewa le.

¹³Ma nüh kütsarhie tsatori küsü sie nü ma vi anguzhe kükhu vü sanü ma sie kütsathuozhü küsü sasa (ma nüh azhih jüma lehvü nyiri sietewa,)

¹⁴jüta küsa vünüh kajipewa tü rünyie tetsuo nü ma mpa nüh mükhakera nüh sa, thi ma kütsathuozhü küsa vünüh jümawa tü tsiera na küveh kenüh.

¹⁵Thitü ma nüh Egypt vü zhühlekütsüri küze nü ma zhümküna nüh ma ruoluom, mari nüh ma vü arawuhri thi thopahiri khielota tsü naküsa kenüh. Ma tü küsara peh naveh ülo? Nyi küsü nüh zanyo jüüta küsa vünüh müriera naveh ülo? Ma tü kütsathuozhüwa zokhuo nü kümrie sara wie naveh ülo?

¹⁶Hi nüh rhoküveh üta, kajiwa kürhope vü ma kaji küsawa, maküüshiekütsa makümwa, thi ma nüh ma sie nü ma kütsathuohzhü zokhuokümwa, ma tü Babilon vünüh sü tsa wie naveh, ta VÜWASaküüwuowa nüh küza veh.

¹⁷Faroah tü ma thopahiri akükhra thi arefü aküji sie nü arie vü maküükrawa nyu, azhihküvükeri sake wie nga thi akürho hozake zothe nta aküzhe samkiele wie nga.

¹⁸Küpakenühnyunü ma nüh küüshiekütsawa mam thi kütsathuozhüwa zokhuom, thi ma nüh ma ke thse nü zanyo hamari saküm wie kenüh matü mümriera.

¹⁹Jükenüh VÜWA Saküüwuowa nüh küza veh: Hi nüh rhoküveh üta ma nüh küüshiekütsa makümwa thi ma nüh eh kütsathuozhü zokhuokümwa hi nüh ma lü rügivü visheleru wie naveh.

²⁰Hi nüh eh neh ma vü jake nü ma tü eh küjurü vünüh küüza naveh; ma nüh hi vü mükünyitsa saküm kenüh hi nüh ma sie Babilonvü ru naveh, thi ma sie nü ashih vü tu naveh.

²¹Ma riekhuo küshozhuri aveh tü anyuchuwa vünüh külum naveh, thi akürhori aveh thuoüji amürhü vü saküvorie küzem naveh; thi nohri nüh jüma tü hi, VÜWA nüh phrahte ta küsa thsü naveh.

²²VÜWA Saküüwuowa nüh hakümjie küza veh: “Hi mpa nüh amüse azhu kümsietsawa vünüh azhu kümsietsawa küsü vi nü tewa naveh. Ma küshite kürünyi azhutsawa mütathuom naveh; hi mpa nüh jüma vi kürügi aküzhi kümsie vü shie naveh.

²³Hi nüh Israel aküzhi kümsie vü jüma shie naveh, apruori shu thi avi pe na küsa kenüh, thi amüse kütholah küsü sana küsa kenüh. Jüma kükhu vü amüwa küpapari rho naveh; ma tsuona kükhe vü aküsa küpe amüwa aveh jüla aphra sanaveh.

²⁴Ato vü athsohri aveh nga hi tü VÜWA ta küsa thsü kheh naveh. Hi nüh athsoh kümsieri asaji vü vimümti, athsoh kürünyieri hi nüh vi kümsie tsütsüti. Athsoh kümzhiri hi nüh sakükhrotsütsüti, thi küükhrori sakürherho tsütsüti. Hi VÜWA nüh küzam wiethuoh nü hi nüh jüma saju wie naveh,” ti küza.