Read Pochuri Naga EZEKIEL 19 Bible Online

EZEKIEL 19 - Pochuri Naga bible

EZEKIEL 19

¹Noh thuoüji, Israel kajitsari kenüh kürümuo küsü sanü zie luo,

²jüti sanü: Noh tü amiewuo azavü amiewie vi nü noh zah saluo! Ma tü amiewuowa atsari vü zeh nü ma tsari küje veh.

³Ma nüh ma tsa küsü küje küsühra nü atsakükhruo küsü sara, thi asaküre vi ma sosie; ma nüh anyiri mürhühriem.

⁴Akuohjiri nüh ma vü küüfükülo jikhi sa; ma tü mari zhikrie vünüh retewa; mari nüh kühavüh nüh ha nü Egypt vü ma sieru.

⁵Ma tü küsara khetemthuoh ta küsa ma nüh küngu vü, ma küluozhewa tü ratewa, ma nüh ma tsa küsü küpa vile nü, saküshefü le.

⁶Ma tü amiewuori azhievü tsietsuotsekhru; ma tü atsakükhruo küsü sara, thi asaküre thsü ra; ma nüh anyiri mürhühriem.

⁷Thi ma nüh mari shieku kümzhori kütheriemtü, ma nüh mari anyu sakümsüjamtü; azhih jüma tü saküthasümtü, thi jümawa alovü küpeh aveh nga, ma jikhi kürümuo vünüh.

⁸Akuohjiri tü asuofo kümkiele aveh vünüh ma sie saluo; mari tü mari aneh ma vü jake; mari zhikrie vünüh ma tü rem.

⁹Kühavüh vinü aku lovü hathse, thi ma vi Babilon kajiwa vü ru; mari nüh ma vi navüzheh vü ru, jüta küsa vü nüh ma jikhi tü Israel küzhiri vü mükünara nüh sana küveh kenüh.

¹⁰Noh zah tü rhelivizhuh vü rhelivirhu küsü kümjie sa nü ajuh kütuoh vü lowa shie, ajuh küwale vünüh avi khielota pe thi atsuona khielota shu.

¹¹Ma rhu kümzhotsawa nüh Kajiwa Kajikütsüh sateru; apruo küji azhievü khajie kümsiewa sa; ma tsuona khielota küzhi vünüh kümsie sanü tsie.

¹²Thitü jüma tü ahaküze vünüh lojam, thi azhihvü vehjam; zhieshu mürhü nüh jüma sakükhrom; ma viri thuoüji rhojam, ma rhu kümzhowa tü wazhü tewa; thi anyih nüh jüma tü tsoriem.

¹³Khinyi thuoüji jüma tü reza vü lowa shiemthuoh, küüweh thi küürieh azhih küsü vü.

¹⁴Thi ma rhu vünüh anyih shuwathuoh, ma tsuonari thi aviri tsoriemthuoh, jüti sanü ma vü ato kümzho münyiethuoh, atakrü sana küsa kenüh kajikütsüh münyiethuoh. Hamatü kürühmuo küsü, thi hamatü kürühmuo kümjie vünüh vi.