Read Pochuri Naga EZEKIEL 20 Bible Online

EZEKIEL 20 - Pochuri Naga bible

EZEKIEL 20

¹Mahvi türüawa, asa müngaawa, arülo türawa vü Israel kükhruowuori VÜWA vü zaluo nta ru nü eh tüvü shupeh.

³anyi atsawa, Israel kükhruori vü küza nü mari vü: VÜWA Saküüwuowa nüh hakümjie küza veh: Nohri tü mokümjie tse lo? Hivü künaluo nti ülo? Hi nüh rhoküvehwa üta, nohri tü hivü küünaluowa nyu, ta VÜWA Saküüwuowa nüh küza veh.

⁴Noh tü mari vü ashih sa nti ülo, anyi atsawa noh tü mari ashih santilo? Jüta thuoüji mari tü ma nyira kükreküüroh küthsüluo,

⁵ thi mari vü: VÜWA Saküüwuowa nüh hakümjie küza veh: Hi nüh Israel kürüka rülo vü, Egypt zhih vünüh hi mpa nüh mari vü küthsü taji Jacob zhehlowa tsatori wa vü küshietsü, hi nüh mari vü küshietsü taji, hi tü VÜWA nohri Saküüwuowa ti küza.

⁶Jüma rülo vü hi nüh mari vü küshie nü hi nüh Egypt zhih vünüh mari sie nü mari kenüh phahküsa azhihwa vü ru navehti küshie, tünüjuh thi awejuh liküveh azhih, azhih aveh vü kütholathovütsawa.

⁷Thi hi nüh mari vü, nohri küsüküsü nga nohri notha nüh loraküveh akümatsatsa zanyori vijam luo, thi Egyptra nguo vi nü nohri mpa nohri samkümne tümluo; hi tü VÜWA nohri Saküüwuowa.

⁸Thitü mari tü hi küraküzhi nü sie saluo taji eh zhümküna nüh sam; mari nyi küsü nga mari notha nüh loraküveh akükretsatsa zanyori vimja nüh sam, nyutü mari tü Egypt nguori mükule. Jütiküsa vü hi nüh mari vü eh rükümthowa küshoketsü nti müshe, thi Egypt zhih azhila vünüh mari vü eh rüküshuwa shuküüze ntimüshe.

⁹Thitü eh nyo rieh nüh müsanüh sam, küpakenühnyunü mari nüh rhoküveh akuoküjiri azavü mari notha vünüh saküümne leh nyu ti küsakenüh, hi nüh Egypt zhih vünüh mari küsiezhu vünüh mari notha vü hi mpa nüh hi mari vü saküthsü kümthuoh kenüh.

¹⁰Jüti sanü hi nüh Egypt zhih vünüh mari sieküjo nü reza vü sie ru.

¹¹Hi nüh mari eh zhühkheri tsü thi mari vü eh zhühkhori kütsa, jümari kümzheri thuoüji aveh nga rho naveh.

¹² Jüma nyiehvü nga hi nüh mari vü eh kümnyiri hi thi mari azhievü athsoshi küsü sanü tsü, jüta küsa vü nüh hi VÜWA nüh mari sakümtse ta küsa thsüra na küveh kenüh.

¹³Thitü Israel zhehlowa tü reza vünüh hi sie küraküzhi nü hisie saluo, mari tü eh zhühkheri mümzhe nü eh zhühkhori kulejam. Jümari kümzheri thuoüji aveh nga rho naveh; thi eh kümnyiri tümari sakümne küjisheh mthuoh. Jüti küsa vü reza vünüh hi nüh eh rükümthowa küshozhu nü mari sakürakhehm nti müshe.

¹⁴Thitü eh nyo rieh nüh müsanüh sam, jüta küsa vünüh hi nüh mari küngu vünüh mari siezhu küru akuoküjiri nüh küngu vünüh samkümne nüh sana küveh kenüh.

¹⁵ Jümpa mükünyu hi nüh mari sie nü mari vü kütsü azhih, tünüjuh thi awejuh liküveh azhih aveh vü kütholathovü azhihwavü küruwa nyu ti reza vünüh küshiethuoh,

¹⁶küpakenühnyunü mari nüh eh zhühkhori kulejam thi eh zhühkheri mümzhe thi eh kümnyirülori sakümneküm kenüh; mari luoveh tü mari anguori vü teküwa kenüh.

¹⁷Jüta wie ketünga eh notha tü mari müshiesa, thi hi nüh mari müzorie nyutü reza vünüh mari samküra kheh.

¹⁸Shünyiza vünüh hi nüh ma tsari vü, noh vühra zhühkhe mümzhe tüm, nyutü mari zhühkhori mümzhe tüm, nyutü mari anguori vi nü nohri samkümne tümluo.

¹⁹Hi tü VÜWA nohri Saküüwuowa; eh zhühkheri müzhe luo, thi azhüzhü nü eh zhühkhori müzhe luo,

²⁰thi hi nüh nohri azhievü athsoshi sa na küsa kenüh eh kümnyirülori sakümtse luo, jüta küsa vünüh hi tü VÜWA nohri Saküüwuowa ta küsa nohri tü thsüra naveh ünüh.

²¹Thitü Israel tsari tü hi sie küraküzhi nü saluo; mari tü ehzhühkhori mümzhe, jümari kümzheri thuoüji aveh nga rhora wie naveh; mari nüh eh kümnyirülori sakümnem. Jüti küsa vü hi nüh reza vünüh mari vü eh rükümthowa küshoke nü eh rüküshuwa küze ntimüshe.

²²Thitü hi nüh eh ke vitem, thi eh nyo rieh nüh müsanüh sam, jüta küsa vü nüh hi nüh küngu vünüh siezhuküruwa notha küngu vünüh samkümne nüh sana küveh kenüh.

²³ Jüma nyiehvü nga reza vünüh hi nüh mari tü akuoküjiri azavü zhuhrie küzemü nti thi nyujiri vü vorie küüzemü nti küshiekümthuoh,

²⁴küpakenühnyunü mari nüh eh zhühkheri kulejam thi eh kümnyirülori müküchie saküm kenüh, jüti sanü mari notha tü ma nyira nguovü sam.

²⁵Jüma nyiehvü nga hi nüh mari vü azhühkhe mükümhie thi mari nüh mükürhora azhühkhori tsü.

²⁶Hi nüh mari aküte vünüh mari sakümnetsü, mari tsa küwuokhuri vinü kütsü vünüh, hi nüh mari saküümzhoh nti, jüta thuoüji mari tü hi VÜWA ta küsa thsüra naveh.

²⁷Jükenüh, anyi atsawa, Israel zhehlowa vü küza nü mari vü, VÜWASaküüwuowa nüh hakümjie küza veh: Hamawa vü noh nyiri tü hi vü aroshisheh nü hi phrakümsümthuoh.

²⁸Küpakenühnyunü hi nüh mari vü tsü nta küshieküm azhihwa vü sieküru vü, mari nüh khiekhiela küzhiho kümsie ngu naveh ünüh nyutü athsoh küjepu ngu naveh ünüh jüla mari küsahthuohsasati küsa kenüh, thi mari kükhurü kütsü sanü arüsakümtho; jüla nüh mari tü kürhengu akülo arügivü küze, thi mari tü jüla nüh mari kükhurü akhah küshoke.

²⁹(Hi nüh mari vü, Nohri nüh küwa azhie kürügiwa tü mowa lo? ti küna. Jümatü nosü küju nga Bama, azhie kürügi ta ji tse wieveh.)

³⁰Jükenüh Israel zhehlowa vü küza luo, VÜWA Saküüwuowa nüh hakümjie küza veh: Nohri tü noh nyiri amüke kümjie vünüh nohri mpa nohri sakümnem nü mari kükretsatsa zanyori vü khazitewanti ülo?

³¹Nohri nüh aküte kütsü vü noh tsari tü anyih vünüh tsekariküwa vü, nohri tü nohri mpa nosü küju nohri anguo aveh vi nohri sakümne tse. Thinü hi tü nohri nüh sie küzaluo le naveh ülo, O Israel zhehlowa? Hi nüh rhoküveh üta hi tü nohri nüh sieküzaluolewa nyu, ta VÜWA Saküüwuowa nüh küza veh.

³²Nohri nüh nohri kümshe vü müsheküveh wa tü piketü küsarawa nyu, nohri nüh, “Akuohjiri kümjie, nyuji akuohri kümjie sanüh raluo, thi athsoh thi aloh khurü ünüh raluo,” ta sa veh ti küza.

³³Hi nüh rhoküveh üta, ake akükhra vi, apie küthsuoke vünüh, thi arükümtho küüshozhu vünüh hi nüh nohri anyiehvü kaji naveh, ta VÜWA Saküüwuowa nüh küza veh.

³⁴Hi nüh ake akükhra vünüh, apie küthsuoke vünüh, thi arükümtho vünüh anyiri vünüh vishu naveh thi nohri zhuhrieküm nyujiri vünüh nohri sazhuh naveh;

³⁵hi nüh nohri sie anyira reza vü ru naveh, jüti sanü jüla nüh nohri sie künyitonyito ashih lovü tu naveh.

³⁶Hi nüh noh nyiri sie Egypt zhih reza ashih vü kütu üta hi nüh nohri sie ashih lovü tu naveh, ta VÜWA Saküüwuowa nüh küza veh.

³⁷Hi nüh nohri tü azhietsühwa kükhu vü küütu nü kütsathuozhüküphehte alovü nohri sieru naveh.

³⁸Nohri azhievü azhümküünari thi hi sie küphrürie sakümtsem naveh; mari nüh anyilieri kümjie rhoküveh azhihwa vünüh hi nüh mari siezhuru naveh, thitü mari tü Israel zhih vü kütuwa nyu. Jüta thuoüji nohri tü hi VÜWA ta küsa thsü naveh.

³⁹Noh thuoüji, O Israel zhiehlowa, VÜWA Saküüwuowa nüh hakümjie küza veh: Mükütüküzü nohri nüh eh zhü müküna nta thuoüji wanü nohri küsüküsü nga khinyi nga thi hala sevü nga nohri anguori kütsü sa luo; thitü eh nyo kümtsewa thuoüji nohri kütethi nohri anguori vi nü müküchie müsa lera thuoh,

⁴⁰küpakenühnyunü eh küzhi kümtse, Israel küzhi kümsiewa vünüh Israel zhehlo aveh, mari avehveh azhih jüla nüh eh kütsü sanaveh; jüla nüh hi nüh mari sieke naveh, thi jüla nüh hi tü nohri nüh küülie thi nohri nüh küte kümhietsari nohri kümtse zanyo müvijimkümhieri aveh vi naveh.

⁴¹Hi nüh nohri tü anyira zavü nüh vizhu nü thi nohri zhuhrieküm nyujiri vünüh küvizhuh vü hi nüh nohri tü arheküüngu aküloküsü kümjie vünüh nohri sieke naveh, thi hi nüh akuoküjiri nüh küngu azavü nüh eh kümtse nohri azavü saküthsü naveh.

⁴²Hi nüh nohri sie nü Israel azhih, noh nyiri vü tsü nta küshieküm nyujiwa vü sieküru vü nohri nüh hi tü VÜWA ta küsa thsüranaveh.

⁴³Jüla nüh nohri tü nohri lehkhuji nohri nüh nohri mpa sakümne kümküürohküsa aveh müshekera naveh; thi nohri nüh kümsü küsa aveh kenüh nohri mpa nüh nohri nonyakuom naveh.

⁴⁴Hi nüh eh nyo arieh vünüh nohri sie küsa vü, nohri kümsü lehkhuji, nyutü küütsaküsüh küüroh küsa vünüh mükünyu, nohri tü hi VÜWA ta küsa thsü naveh, O Israel zhehlowa, ta VÜWASaküüwuowa nüh küza veh, ti küza.

⁴⁵VÜWA zhü hi vü ru taji:

⁴⁶“Anyi atsawa, zhieseh wuovü noh nyieh küprüke luo, zhiese vü phrahtesosieluo, thi Negeb reza zhih vü setsaküthsüzhü phratsüluo;

⁴⁷Negeb rezawa vü, VÜWA zhü küna luo, ti küza luo: VÜWASaküüwuowa nüh hakümjie küza veh, hi nüh noh vü anyih tsoke naveh, thi noh lovü küpeh athsoh kümzhi aveh thi athsoh küsü aveh jüma nüh tsoriem naveh; anyihzhu tsophrierake küvehwa tü samkünera, thi zhiese vünüh zhietü küju anyieh aveh tü jüma nüh ram naveh.

⁴⁸Hi nüh jüma tsoke ta küsa kürholi aveh nüh ngu naveh; jüma tü saküünerawa nyu,” ti küza.

⁴⁹Jüta küüzavü hi nüh, “O VÜWA Saküüwuowa! mari nüh hi tü, ‘Ma tü azhühvie küsari nyu ülo?’ ta küza,” ti küza.