Read Pochuri Naga EZEKIEL 28 Bible Online

EZEKIEL 28 - Pochuri Naga bible

EZEKIEL 28

¹VÜWA zhü hi vü ru taji:

²anyi atsawa, Tair kajitsawa vü küza luo, VÜWA Saküüwuowa nüh hakümjie küza veh: Noh luoveh nüh rhiezaküm kenüh thi noh nüh, ‘Hi tü nyiaza küsü; hi tü nyiazara pe vü shupeh veh, ajuhküjira zhila vü,’ tü noh tü anyiri wie, thi nyiaza nyu, noh nüh müshe vi nyiaza küsü kümshe vi müjieh wie nga.

³Noh tü Daniel nyiehvü nüh mütsa tsawie veh; noh vünüh küüzhe küsü nga müküthi;

⁴noh kümahtsa thi noh küthsükümshi vünüh noh tü noh künyirhie noh mpa noh kenüh sazhuhmthuoh, thi noh luo vü suna thi rakasa vizhuhmthuoh,

⁵asü küsa vü noh kümtsa aküji nüh noh künyirhie saküzhimthuoh, thi noh luoveh tü noh künyirhie vünüh rhiezamthuoh.

⁶Jükenüh VÜWA Saküüwuowa nüh hakümjie küza veh: Noh nüh noh luoveh tü nyiaza küsü luoveh sie kümjie kenüh,

⁷Jükenüh hi nüh anyitheri noh vü sieru naveh, kükrüküngo tsatsa akuoküjiri; mari nüh noh kümtsa saküzüwa vü anyuchuwa shozhu naveh thi noh küzü sakümne naveh.

⁸Mari nüh noh tü küphieke lovü shükükhari küze naveh, thi noh tü jühküji azhila vünüh küvürie aküsü sasü naveh.

⁹Noh tü khinyi nga, “Hi tü nyiaza küsü,” ti küza wie nti ülo, noh küfethera tsatü vü, noh tü anyiri wie, nyiaza nyu, noh sakümsamna kütsüri ake vü?

¹⁰Noh tü alienyiri ake vünüh ahu mkütsira küsü naveh; küpakenühnyunü hi nüh küzamthuo, ta VÜWA Saküüwuowa nüh küza veh, ti küza.

¹¹Jüma nyiehvü nüh VÜWA zhü tü hi vü ru taji:

¹²“Anyi atsawa, Tair kajiwa kenüh kürümuo jikhi küsü saluo, VÜWASaküüwuowa nüh hakümjie küza veh: Noh tü aküjutsa kütsükie küsü sa, kümahtsa pro thi aküjuwa küzü peh.

¹³Noh tü Eden, Saküüwuowa phari lovü peh; aloh amekürheri nüh noh küüzhuvü alo kürhe küpapa, thi noh küpepe tü suna nü atsorhe sake sakheh hi nüh noh saküüje rülo vü jümari sakheh.

¹⁴Sakümtseküm cherub küsü vi nü noh kühuote küüsa; noh tü Saküüwuowa kümtse aküzhiwa rügivü pehveh; noh tü anyih lohri azavü tse.

¹⁵Noh saküje rülo vü thuoüji noh lehkhujiri vü kümte münyie luo, künakhie noh vünüh müjie küngu küju nü.

¹⁶Noh süküsa küwale vü thuoüji noh tü küvürie nüh pro, thi noh tü khiemuo; jükenüh hi nüh noh tü müküchieküzhü zanyo küsü üti hi nüh Saküüwuowa aküzhi vünüh noh jam, thi anyih alohri azavü nüh cherub kühuotewa nüh noh zhezhu jam.

¹⁷Noh küzü kenüh noh luoveh tü rhieza; noh küzü rieh nüh noh nüh noh kümtsa küütsa küsüm. Hi nüh noh tü azhih vü vehjam; hi nüh noh tü kajira tüvü shihthuoh, noh vünüh mari notha tü külora naveh.

¹⁸Noh künakhie zhi küüluole vünüh, noh süküsa mükünyitsa vünüh, noh nüh noh kümtsezhehri sakümnem Jükenüh hi nüh nohri azhie vünüh anyih vizhu; jüma nüh noh tsoriem, thi hi nüh noh tü noh ngu küvehri aveh notha vünüh noh tü azhih aweji vü küürelekem.

¹⁹Anyiri azavü noh küthsüri aveh tü noh vü azühngeketewa thuoh; noh tü kükrüshike sehkhe küsü ru pehveh thuoh thi noh tü küsuokürho küpehwa nyuthuoh,” ti küza.

²⁰ VÜWA zhü hi vü ru le taji:

²¹“Anyi atsawa, noh nyieh tü Sidon vü küprüke luo, thi jümawa vü setsaküthsüzhü phratsüluo,

²²jüti sanü, VÜWA Saküüwuowa nüh hakümjie küza veh: Hi nüh noh sie wuluo veh, O Sidon thi hi nüh noh zhievü nüh kütholathovü nyie naveh. Hi nüh jümawa vü ashihküsa vü mari nüh hi tü VÜWA ta küsa thsü naveh, thi jüma vü eh kümtse saküngu naveh;

²³küpakenühnyunü hi nüh jümawa vü sanakümsü küze na küveh kenüh, thi ma lerari vü azühküüthü küze naveh; thi aküsü tü mari azhievü tsuoke naveh, awuowuo vünüh ma vü anyuchuwa ru taji. Thi mari tü hi VÜWA ta küsa thsü naveh,” ta küza.

²⁴Israel zhelohwa tü aluo ruota küsho nyutü arüzhü kükhro küsü nga momaküküsa vünüh ma zhephruri azhievü kümnomna küngu lewa nyuthuoh. Thi mari tü hi VÜWA ta küsa thsü naveh.

²⁵“VÜWA Saküüwuowa nüh hakümjie küza veh: Hi nüh Israel zhehlowa tü ma saküvorie küm anyiri azavü nüh kasazhuh vü thi akuoküjiri nüh küngu vünüh mari vü eh kümtsewa saküünguvü, mari tü mari zhih hi nüh Jacob vü kütsüwa vü pehtewa na thuoh.

²⁶Mari tü luoveh küji vünüh jüla rho nü azheh sa thi rhelivirhu shie naveh. Ma zhephruri nüh no mükücheküsa kenüh mari ashih sieküsa vü mari tü luoveh jisheh nü rhona. Jüta sanü mari tü hi VÜWA mari Saküüwuowa ta küsa thsü naveh.”