Read Pochuri Naga EZEKIEL 3 Bible Online

EZEKIEL 3 - Pochuri Naga bible

EZEKIEL 3

¹ Ma nüh hi vü, O anyi atsawa noh vü mowa tsü veh ünüh tsaluo; külulasi hama tsaluo, thi waluo, Israel zhehlori vü küza luo.

²Jükenüh hi nüh eh po ka ünü ma nüh külulasiwa vi hi kütsa.

³Ma nüh hi vü, “Anyi atsawa, hi nüh noh vü kütsü külulasiwa tsanü jüma nüh noh vo sakümwaluo,” ti küza. Thinü hi nüh jüma tsa; thi jüma tü eh po lovü awejuh üta münge.

⁴Ma nüh hi vü: “Anyi atsawa, Israel zhehri vü wa nü eh zhü hama ha mari vü küza luo,

⁵küpakenühnyunü noh tü azhümküthsü küphra thi azhü kükho nyiri vü küze müveh nü Israel zhehlori vü küze küveh kenüh,

⁶Azhümküthsü küphra thi azhü kükho anyi hozakeri vü nyu, noh nüh ma zhüri müthsümkümshirari nyu. Azhütsa, mükütüküzü hi nüh noh mari vü küze thuoüji mari nüh noh zhü küna wie naveh.

⁷Thitü Israel zhehlori tü noh zhü müküna nüh sa naveh, küpakenühnyunü mari tü eh zhü küüna amüshe mükünyie kenüh; Israel zhehlori aveh tü atie kükho thi azhü mküna luoveh peh kümü kenüh.

⁸Noluo, hi nüh noh nyieh tü mari anyieh atüvü sakümzhom tüthuoh ünüh, thi noh tie tü mari atie atüvü sakümzhom tü thuoh ünüh.

⁹Aloh kükhratsawa kümjie, anyihküükhaloh nyiehvü nüh khra, hi nüh noh tie jüüta samtü thuoh ünüh; mari nüh küno vü mari mükrü tüm nyutü luoveh mzah tümluo, küpakenühnyunü mari tü azhümküüna zhehlori saküm kenüh,” ti küza.

¹⁰Ma nüh hi vü: anyi atsawa, eh zhü hi nüh noh vü küza na küsa aveh noh luoveh lovü vithse luo, thi noh khüna vi künaluo;

¹¹jüti sanü noh nyiri reviteküwari vü wa nü mari vü küza luo. Mari vü, “VÜWA Saküüwuowa nüh hakümjie küza veh,” ti küza luo; mari nüh künatü mükünatü küza luo.

¹²Jüsevü Sietsewa nüh hi khake tewa, thi VÜWA kütholathovü tü ma pe vünüh küsüra ünü eh se vünüh hi tü jikhi zie nü küsa künara;

¹³jüma tü kürho sara küsa khi küsü nüh küsü vü küsike küveh khi, thi ma natori vü pehküveh satürü khi, jüma tü jüma tü aküji küsü kümjie.

¹⁴Sietsewa nüh hi khaketewa nü hi vü tewa; hi tü eh sietse vünüh luovehmsüke nü tewa, VÜWA ke tü hi vü müzhosheh teküwa kenüh.

¹⁵Hi tü Telabib vü reviteküwari vü ru, mari tü Khebar rühgu vü rhopeh veh. Thi hi tü jüla mari azavü rülo türü torieke.

¹⁶Rülo türü sehkhe vü VÜWA zhü tü, hi vü ru taji:

¹⁷“Anyi atsawa, hi nüh noh tü Israel zhehlori vü kühuowa küsamthuoh; noh nüh eh po vünüh azhü küünara vü, noh tü hi vünüh hamna vi mari vü tsü naveh.

¹⁸Mükütüküzü hi nüh kümsüküsari vü, ‘Noh tü sü wie na thuoh,’ ta küza thuoüji, noh tü mari vü hamna mütsü tümluo, nyutü kümsüküsari vü mari kümsüküsa lehkhuji kenüh hamna müküza tüm luo, mari kürholi külole na küsa kenüh, kümsüküsa jümari tü mari künakhie vünüh sünaveh; thitü mari azüh thuoüji noh ke vünüh vi naveh.

¹⁹Thitü noh nüh kümsüküsari vü hamna tsü, thi mari nüh mari kümsüküsa lehkhuji vünüh müsühle ti thuoüji mari tü mari künakhie vünüh sü wie naveh; thitü noh thuoüji noh kürholi külole naveh.

²⁰Jüma sevü nga, mükütüküzü künyitsari tü mari künyitsa vünüh sühlewa nü künakhie sa thuoüji, thi mari atüvü hi nüh ajih kümshü sa, ti thuoüji mari tü sü wie na thuoh; küpakenühnyunü noh nüh mari vü hamna mükütsü kenüh, mari kükhiemuo kenüh mari tü sü wie naveh, thi mari nüh künyitsa küüroh küsari tü kümsheketüwa nyuthuoh; thitü mari azüh tü hi nüh noh ke vünüh vi naveh.

²¹Mükütüküzü, jüüta wie ketünga, künyitsari tü mükhiemuo tüm üta noh nüh hamna tsü nü mari nüh kükhiemuo müsanüh sa, ti thuoüji mari tü rhotsa wie naveh; küpakenühnyunü mari nüh hamnawa küvi kenüh; thi noh tü noh kürholi külolena thuoh,” ti küza.

²²Jüsevü VÜWA ke tü jüla eh rügi vü peh; thi ma nüh hi vü, “Süra nü anyuovü tsezhuwaluo, thi hi nüh jüla nüh noh sie jüle naveh ünüh,” ti küza,

²³jüti küüza vü hi tü süra nü anyuowa vü tsewa; thinü VÜWA kütholathovü tü jüla pehtewa, hi nüh Khebar rühgu vünüh küngu kümjie küsa; jüti küsa vü hi tü eh nyieh vü tsuo zeh tewa.

²⁴Sietsewa tü eh lovü tetu nü hi vi eh mpha rügi vü sa; thi ma nüh hi sie jüle taji hi vü: wa nü noh mpa nüh noh zhehlovü khethuoke peh luo.

²⁵Noh kenüh thuoüji, anyi atsawa, noh vü akuli thse naveh, thi jümari nüh noh phehtem nü noh tü anyiri azavü müwara nüh sam naveh;

²⁶thi hi nüh noh mizhi tü noh luole vü wa küüpekem naveh, jüti sanü noh tü azhü müphrara nüh sam naveh; küpakenühnyunü mari tü azhü müküünara zhehlo küsa kenüh.

²⁷Thitü hi nüh noh sie küjüle vü thuoüji hi nüh noh po saphie tsü naveh, thi noh nüh mari vü, ‘VÜWA Saküüwuowa nüh hakümjie küza veh,’ thari nüh küna naveh ünüh küüna luo; thi thari nüh müküna nüh sa naveh ünüh müküna nüh küüsam luo; küpakenühnyunü mari tü azhümküüna zhehlori küsa kenüh.