Read Pochuri Naga EZEKIEL 30 Bible Online

EZEKIEL 30 - Pochuri Naga bible

EZEKIEL 30

¹VÜWA zhü tü hi vü ru taji:

²anyi atsawa, setsaküthsüzhü phra tsü, VÜWA Saküüwuowa nüh hakümjie küza veh: “Krieluo, akükrü rülowa tsethuoh,”

³küpakenühnyunü arülowa tü shehnyimthuoh, VÜWA rülo tü shehnyimthuoh; jüma tü akülu rülo küsü sam naveh, akuoküjiri kenüh küpoka tsotho küsü.

⁴Anyuchu küsü Egypt rügivü ru naveh, thi amüsheküna tü Ethiopia vü peh naveh, rehthekümri Egypt vü küülu vü, thi makünyirhie vüteküwa vü, thi mavüteküwa vü, thi ma ajuke zophuoriem vü.

⁵Ethiopia, Put, Lud, Arabia aveh, Libya, thi küwuluo azhih vü nyiri aveh tü mari vü nyi nü anyuchuwa vünüh tsuotsa kheh naveh.

⁶VÜWA nüh hakümjie küza veh: Egypt kürüzori thuoüji külum naveh, thi ma kürhieza kükhra tü teturum naveh; Migdol vünüh Syene küju mari tü jüma azhievü anyuchuwa vünüh tsuotsam naveh, ta VÜWA Saküüwuowa nüh küza veh.

⁷Mari tü jaküüzom nyuji küpara azavü jaküzom naveh, thi ma nyujiri tü jakümsüküm anyuji azavü sam naveh.

⁸Jüta sanü mari tü hi VÜWA ta küsa thsü naveh, hi nüh Egypt vü anyih tsoküüze vü, jüma küükrari aveh tü zokhuo khehm.

⁹Jüma rülo vü, zhüleküvüri tü hi vünüh shitawa nü müshemkümsü Ethiopiari saküüngothse naveh, thi Egypt küpoka rülovü amüsheküna mari vü ru naveh; küpakenühnyunü jüma tü kütsethuoh kenüh!

¹⁰VÜWA Saküüwuowa nüh hakümjie küza veh: Hi nüh Egypt künyirhieri tü zoriehm tü naveh, Babilon kajiwa Nebukhadnezzar ake vünüh.

¹¹Ma thi ma nyiri sie taji, kükrüküngo tsatsa akuoküjiri, tü azhihwa küüzorie nta sieru naveh; thi mari tü Egypt vü mari nyuchuwa shozhu naveh, thi kürehtheri vi azhihwa saküpro naveh.

¹²Aguleh ri hi nüh saküüwehm naveh, thi kümsüküsari ake vü azhihwa zhum naveh; hi nüh alienyira ke vünüh azhih wa vü thi jüma lovü kütü avehvü jaküüzo viru naveh; hi VÜWA nüh küzamthuoh.

¹³“VÜWA Saküüwuowa nüh hakümjie küza veh: Hi nüh Memfis vü anguori zoriem naveh thi atsori tü asehkhesamtü naveh; Egypt zhih vü kajitsa küsü nga küpehlewa nyuthuoh; jüti sanü hi nüh Egypt zhih vü akükrü thsem naveh.

¹⁴Hi nüh Pathros tü jaküüzo küsü samtü naveh, hi nüh Zoan vü anyih tsoküze naveh, thi Thebes vü ashihküsa müke thsetsü naveh.

¹⁵Hi nüh Pelusium vü eh rükümtho küshoke naveh, Egypt kümzhowa vü, thi Thebes ri tethuohmtü naveh.

¹⁶Hi nüh Egypt vü anyih tsoküze naveh; Pelusium tü amüsheküna aküji vü pehm na thuoh; Thebes tü zophiem na thuoh, thi Memfis tü arülo vü küluori setu na thuoh.

¹⁷On thi Pibeset vizari tü anyuchuwa vünüh tsuotsam naveh; thi anyujiri tü mari mpa nüh reviteküwa vü tewa naveh.

¹⁸Tehafnehes vü arülowa tü zom naveh, hi nüh Egypt kükhra zokhuo küm vü, thi ma kürhieza tü asehkhevü teru mühie veh; anyujiwa tü akülu küsü nüh külüwutem naveh, thi ma tsarülari tü kürhoküsi küsa vü retewa naveh.

¹⁹Hakümjie vünüh hi nüh Egypt rügivü ashih küsa mükewa thse naveh. Jüta küsa vünüh mari tü hi VÜWA ta küsa thsü naveh,” ti küza.

²⁰Mahvi türaluokewa vü, asa pokhuwa, arülo türü vü, VÜWA zhütü hi vü ru taji:

²¹“Anyi atsawa, hi nüh Egypt kajiwa Faroah apie zoshimtü thuoh; sakümhie na küsa kenüh jüma tü müküritithuoh nyutü kürietevü nga nüh müphehtethuoh, jüta thuoüji jüma tü müzho nü anyuchuwa müküjeh nüh sana küvehthuoh kenüh.

²²Jükenüh VÜWA Saküüwuowa nüh hakümjie küza veh: Hi tü Egypt kajiwa Faroah sie ruoluo veh, hi nüh ma pie zoshitü naveh, apiekümzho wa thi hi nüh zoshikümtüwa nga ti; thi hi ma ke vünüh anyuchuwa tü küütsuotsam naveh.

²³Hi nüh Egypt tü akuoküjira za vü sarieküzem naveh, thi azhihwa vü küüvoriem naveh.

²⁴Hi nüh Babilon kajiwa apie sakükhratsü nü eh nyuchuwa ma ke vü thse naveh; thitü Faroah apie künyi thuoüji zoshimtü naveh, thi müsamna kümri külüchi kümjie ma nüh ma tüvü lüchih naveh.

²⁵Hi nüh Babilon kajiwa apie thuoüji sakükhratsü naveh, thitü Faroah apie thuoüji sakü tsuotsam naveh. Thi mari tü hi VÜWA taküsa thsü naveh, hi nüh eh nyuchuwa Babilon kajiwa kevü küthse vü. Ma nüh jüma vi nü Egypt zhih vü thsuoküze naveh,

²⁶thi hi nüh Egyptri lü akuoküjiri azavü zhuhrie küzem naveh thi nyujiri aveh vü küüvoriem naveh. Jüta thuoüji mari tü hi VÜWA ta küsa thsü naveh,” ti küza.