Read Pochuri Naga EZEKIEL 31 Bible Online

EZEKIEL 31 - Pochuri Naga bible

EZEKIEL 31

¹Mahvi türaluokewa, asa kücheawa, arülo pokhu vü VÜWA zhü tü hi vü ru taji:

²anyi atsawa, Egypt kajiwa Faroah thi ma nyiri vü küza luo: Noh küji vü noh tü thawa kümjie lo?

³Assiria müshe nonoluo, Lebanon müsa küsü tsuona küzü ri thi areza küükhe thi khielota kümsie, ma zhu aküluri azavü.

⁴Ajuri nüh jüma sakürherhoveh, aküsheh nüh jüma shieküsa azhiewa li mükiele, atori vü athsohri aveh vü ma kuzari küze kheh.

⁵Jüti sanü jüma tü atovü athsoh aveh anyievü nüh müsiete wa; ma pruori tü shi jiwa thi ma tsuonari tü shohta wa, ma shiküwari tü ajuh küwale vünüh.

⁶Amürhü vü amüwari aveh tü ma pruo rügi vü mari sa kheh; ma tsuonari kükhu vünüh ato vü asari aveh tü ma tsari tsa kheh; thi ma kükhe vü akuoküjiri aveh rho.

⁷Ma küjiwa tü züsheh, ma tsuona küüta küwa vü; küpakenühnyunü ma rüzohri tü ajuh küwale lovü cha tu.

⁸ Saküüwuowa phahri vü amüseri tü jüma vimüüjiera, nyutü aküla külükoluo thsohri nga ma pruori sie müzoriekera nüh sa; are arhuri tü ma tsuonari sie müjieh küwa vü zonyo küsü nga nyu; Saküüwuowa phahri vü athsoh küsü nga aküzü ma üta nyu.

⁹Ma tsuona khielota küsa vi nüh hi nüh jüma saküzütsü, thi Saküüwuowa phari Eden athsohri aveh tü ma noküma.

¹⁰Jükenüh VÜWA Saküüwuowa nüh hakümjie küza veh: küpakenühnyunü jüma tü müsie müshühshüh tewa nü ma zhu tü aküluri azavü ju, thi ma luoveh tü ma kümsie kenüh rhiezatewa,

¹¹hi nüh jüma tü akuoküjira kajiwa ke vü thse naveh; ma nüh jümavü makümlie küünguna. Hi nüh jüma tü vijam.

¹²Akuohji kükrüküngo tsatsa vünüh alienyiri nüh jüma shüchiem nü jam. Aküzhi rügivü thi anyuo aveh vü ma tsuonari tü tsuotsakem thuoh, ma zhiri tü azhihwa ajuhküshuperi aveh vü jizehtewa thuoh; thi azhihvü anyiri aveh tü ma kükhe vünüh tewa nü jüma jamthuoh.

¹³Ma thsoku jiehteküwa rügi vü amürhüvü amüwari aveh nüh pehtewa thuoh, thi ma pruori azhie vü samwa aveh küpeh satewa thuoh.

¹⁴Hamari aveh tü ajuh kütuoh vü athsoh küsü nga kümsietsatsa müküüsho nta nyutü mari azhuju tü akülu aza vü müküüju nta küsa kenüh, thi ajuh küzhu atshoh küsü nga mari kümsie tü jümari müküüju nta küsa kenüh wie; küpakenühnyunü mari aveh nga aküsü ake vü thsekümthuoh kenüh, azhihwa kükhuvü; aveh azh küphieke lovü küturi sie taji.

¹⁵VÜWA Saküüwuowa nüh hakümjie küza veh: Küsürazhie vü tekütsuo vü aküsheh jüma tü hi nüh asewa sakülorümna; hi nüh ma rükuri tü khetemtü; thi ma juh kükhrari tü khetem naveh; Jüma kenüh hi nüh Lebanon tü küzo vünüh küüzhutemna, thi jüma kenüh atovü athsoliri aveh tü süzhotewana.

¹⁶Ma kütsuotsa jikhi nüh hi nüh akuoküjiri tü saküüzhühke, küphieke lovü kuoküturi vü hi nüh ma tü küsürazhi lovü nyi küjiethsem; Eden thsohri aveh, kürüka thi Lebanon thsoh kümhietsari, ajuh azhih ajuküzhuri, küsüra zhie vü hi nüh luoveh sakümtü naveh.

¹⁷Mari nga jüma sie nü küsürazhie vü nyi tetsuothuoh, anyuchuwa nüh zothe kümri vü, jüma anyilieri sie nü, akuoküjiri azhievü ma kükhe nü kürho ri sie taji.

¹⁸Eden thsohri aza vü küpehri tü kütholathovü vü thi aküji vü noh thawa kümjie ülo? Noh tü Eden thsohri nyi nü azhih kükhuvü vitetsuo na thuoh; noh tü ahu mkütsiri azavü, anyuchuwa nüh zothekümri azavü zehm na thuoh. “Hama tü Faroah thi ma nyiri aveh, ta VÜWA Saküüwuowa nüh küza veh.”