Read Pochuri Naga EZEKIEL 32 Bible Online

EZEKIEL 32 - Pochuri Naga bible

EZEKIEL 32

¹Mahvi türakünyiawa, asa türakünyiawa, rülo pokhuwa vü, VÜWA zhü hi vü ru taji:

²anyi atsawa, Egypt kajiwa Faroah nyieh vü kürümuo küsü zie nü ma vü: Akuohjiri azhievü amiewuo wa ti noh mpa nüh noh müshe nono tüluo, thitü noh tü juhküji müre küsü kümjie; noh tü noh kuzari vü khakürhie kheh, noh mpha nüh ajuh sakümngu, thi noh kuzari sakümngeh.

³VÜWA Saküüwuowa nüh hakümjie küza veh: Anyi hozake sezhuh küveh vünüh hi nüh rügivü eh neh jake naveh; thi eh neh küne vünüh noh nezhu naveh.

⁴Hi nüh noh tü azhih vü veja naveh, hi nüh noh tü arezavü muomuo theja naveh, thi amürhü vü prükütse müwari aveh tü noh rügivü küükanaveh, thi azhih ajü samwari tü hi nüh noh sie chikümnyieke naveh.

⁵Aküzhi rügivü hi nüh noh sazhü sariem naveh, thi noh küsü asanüh anyuo küüpro naveh.

⁶Hi nüh noh züh liküveh vi aküzhiri küju azhihwa saküüjie naveh, thi ajuhshuküvehri tü noh sie nü prom nathuoh.

⁷ Hi nüh noh lozhu küm vü, hi nüh atülüri satem naveh, thi mari wutsi saküzom naveh; Hi nüh akülu vi arünyi sotem naveh, thi asa tü ma küwie kütsüwa nyu thuoh.

⁸Atülüri vü aküwieri aveh tü noh nyiehvü nüh hi nüh saküzomtü naveh, thi noh zhih vü aküzo thsemtü naveh, ta VÜWA Saküüwuowa nüh küza veh.

⁹Hi nüh anyiri hozake luoveh saküsürotsü naveh, hi nüh noh sie akuoküjiri azavü reküwa vü, noh nüh müjie küthsü nyujiri vü.

¹⁰Hi nüh anyiri hozake noh vü saküngothse naveh; noh kenüh mari kajiri tü kükhe naveh. Hi nüh mari atüvü nüh eh nyuchuwa küüroh vü, atsotho aveh vü mari kürho kenüh, mari küsüküsü nga khekheta küshüh naveh, noh tsuotsa küwa rülo vü,

¹¹küpakenühnyunü VÜWA Saküüwuowa nüh hakümjie küza veh: Babilon kajiwa nyuchuwa tü noh vü ru naveh.

¹²Hi nüh noh nyiri tü akükhra nyuchuwa vünüh küülu satsü naveh, akuoküjiri azhievü mari aveh nga kükrüküngotsawa vünüh. “Egypt kürhiezarhiechiwa tü küferie vü viru naveh, thi ma nyiri aveh tü pokahm naveh.

¹³Hi nüh ajuh küwale kütuoh vünüh ma seshuh aveh zorie khehmtü naveh; thi anyikürho ampha küsü nga nüh mari saküüsürolewa nyuthuoh, nyutü mieshümiesa tüwuoh küsü nga nüh mari saküüsürolewa nyuthuoh.

¹⁴Jüti sanü hi nüh mari ajuh sakümtsetsü naveh, thi mari kuzari tü avüjuh kümjie küüli naveh, ta VÜWASaküüwuowa nüh küza veh.

¹⁵Hi nüh Egypt zhih tü saküüzoküm vü thi azhihwa tü ma proküveh aveh vünüh rhojaküm vü, thi hi nüh jüla rhoküvehri aveh kürhie küükreküm vü, mari nüh hi tü VÜWA ta küsa thsü naveh.

¹⁶Hamatü kürümuo küsü; jüma tü krie naveh; akuoküji atsa nyimzavühri nüh jüma krie naveh; Egypt thi ma nyiri aveh vü mari nüh jüma phrate nü krie naveh, ta VÜWA Saküüwuowa nüh küza veh,” ta küza.

¹⁷Mahvi türakünyiawa, asa pokhuwa, rülo türamüngaawa vü VÜWA zhühi vü ru taji:

¹⁸Anyi atsawa, Egypt nyiri rügivü krieluo, thi jümari saküütsuom luo, Egypt sie nü akuoküji tsavühri aveh, azhih kükhuvü, küphieke lovü kuoküturi sie taji.

¹⁹“Aküzü vü noh tü thawa sie müjieh veh lo? Tetsuo luo! Ahu mkütsiri sie nü münyie zehtewaluo,”

²⁰Mari tü anyuchuwa nüh zothekümri azavü külum nathuoh. Egypt tü anyuchuwa ke vü thsemthuoh; ma nga thi ma nyiri nga sietewakhe thuoh.

²¹Alehvü kükhrari tü mari zhüku phrate naveh, mari küükrari sie nü, küsürazhie azhie vü nüh: “Mari turu pehvehthuoh, mari tü zota zehveh thuoh, ahu mkütsiri, anyuchuwa nüh zothekümri,” ti sa.

²²Assiria thi ma refüri aveh tü jüla pehveh, mari rüku tü jüla pehveh, mari aveh tü jüla pro veh, mari aveh tü zothem, anyuchuwa vünüh tsuotsa khehm.

²³Mari rüku küphieke tü küpotetsatsa vü pehveh. Ma refüri aveh tü ma rüku mükiele veh, mari aveh tü zothemthuoh, anyuchuwa nüh saküütsuotsam thuoh, rhoküveh azhih wa vü kümzhoh nyuoh küüzeri.

²⁴Elam tü jüla pehveh, thi ma nyiri tü ma rüku mükiele veh, mari aveh tü zothemthuoh, anyuchuwa vünüh külumthuoh, mari tü ahu mtsi thuoh nüh azhih kükhu vü tetsuothuoh, mari nüh rhoküveh azhihwa vü kümzhoh nyuoh küze. Mari tü küphieke lovü kuoküturi vü küzükrü nyi vü.

²⁵Mari nüh Elam aze küsü sanü ma nyiri ti rehthekümri azavü samthuoh, mari rüku tü jüma mükiele veh, mari aveh nga ahu mtsi, anyuchuwa nüh zothekhehm; küpakenühnyunü mari kümzhoh nüh azhih jüla aveh nyuohmthuoh, thi mari tü küphieke lovü kuoküturi sie küzükrü vü mthuoh; mari tü rehthekümri azavü samthuoh.

²⁶Meshek thi Tubal masü tü jüla pehveh, thi masü ariekhuo aveh mari rüku tü mari mükiele veh, mari aveh nga ahu mtsi, anyuchuwa nüh zothe khehm; küpakenühnyunü mari nüh kümzhohwa tü rhoküveh azhih aveh nyuoküüze kenüh.

²⁷Thi mari tü khanavü arieküsa tsuotsaküm mari wie senyusevi vi nü küsürazhievü tekütsuori vü nyi zeh müveh, jümara nyuchuri tü mari alü kükhuvü sa veh, thi mari johuo tü ma rüri rügivü sa veh; küpakenühnyunü arieküsara kümzhoh tü rhoküveh azhihwa vü küpeh kenüh.

²⁸Jükenüh noh tü zoshim naveh thi ahu mkütsiri azavü zeh nathuoh, anyuchuwa nüh zothekümri vü.

²⁹Edom tü jüla pehveh, ma kajiri thi ma kajitsari aveh, mari tü mari kükhra aveh kenüh mari tü anyuchuwa nüh küzotheri sie zehtewa thuoh; mari tü ahu mkütsiri sie zehtewa thuoh, küphiekevü kuoküturi sie nü.

³⁰Zhietü vü kajitsari tü mari aveh jüla pehveh, thi Sidonri aveh, rehthekümri sie nü mari küzükrü vü taji tetsuothuoh, mari nüh mari kükhravünüh kümzhoh küvizhu kenüh; mari tü ahu mtsi nüh anyuchuwa nüh zothekümri vü zehtewathuoh, thi küphieke lovü kuoküturi sie nü mari küzükrü vü taji tetuthuoh.

³¹Faroah nüh mari küngu vü, ma nüh ma nyiri kenüh ma mpa luoveh saküürzi na, Faroah thi ma thopahiri aveh, anyuchuwa nüh zothekümri, ta VÜWA Saküüwuowa nüh küza veh.

³²Küpakenühnyunü ma nüh kümzhoh tü rhoküveh azhihwa vü nyuohküüze kenüh; kükenüh ma tü ahu mkütsiri azavü münyie zehmna thuoh, anyuchuwa nüh rehthekümri sie taji, Faroah thi ma shiejiwa sie nü, ta VÜWA Saküüwuowa nüh küza veh.