Read Pochuri Naga EZEKIEL 34 Bible Online

EZEKIEL 34 - Pochuri Naga bible

EZEKIEL 34

¹VÜWA zhü tü hi vü ru taji:

²anyi atsawa, Israel kühuori vü setsaküthsüzhü phra luo: setsaküthsüzhü phraluo, mari vü akühuori vü: VÜWA Saküüwuowa nüh hakümjie küza veh: O, Israel kühuori, nohri mpa noh vorisakütseri! Nyihzhükühuori tü anyihzhü avo küsa leh nyu ülo?

³Nohri tü aküthü tsa, athsü küsa vi nohri mpa nohri küzhu, asa küülieri fethe; thitü nohri tü nyihzhü avo müsa.

⁴Nohri tü küthasüri samkükhra, nohri tü küsakünari samkümhie, nohri tü kümsamnari mürie tü, khazih kümri sie shele müru, kümiekümri mphah, thitü küwurie vünüh thi küükhriekürie vünüh mari vü atakrü sa.

⁵ Jükenüh mari tü sariem. Küpakenühnyunü akühuo mükünyie kenüh, mari saküporiem, mari aveh tü samwara shie sakhehm.

⁶Eh nyihzhüri tü voriemthuoh, mari tü aküzhi aveh vü thi küzhiho aveh vü tse tekhe wa thuoh; eh nyihzhüri tü azhih vü azhie aveh vü sarie küze khehmthuoh, nyi küsü nga nüh küphah nyutü kürütsa münyie thuoh nü.

⁷Jükenüh, nohri akühuori, VÜWA zhü künaluo:

⁸Hi nüh rho küveh üta, küpakenühnyunü eh nyihzhüri tü ashie sakümthuoh kenüh, thi eh nyihzhü tü samwa aveh shie samthuoh akühuo mükünyiemthuoh kenüh; küpakenühnyunü eh nyihzhükühuori nüh eh nyihzhü müküphah kenüh, thitü akühuori tü mari mpa nüh mari avo sakümthuoh kenüh, thi eh nyihzhü avo müküsa kenüh;

⁹jükenüh, nohri akühuori, VÜWA zhü künaluo:

¹⁰VÜWA Saküüwuowa nüh hakümjie küza veh, hi tü nyihzhükühuori sie wuluom thuoh; thi hi nüh mari ake vünüh eh nyihzhüri kühuo vishelem naveh, anyihzhüri avo sana küsa kükhete küsü thsemtü naveh; akühuori tü mari mpa nüh mari avo küsalewa nyuthuoh. Hi nüh mari apo vünüh anyihnyihri küloletsü naveh, jüta küsa vünüh mari tü jümara shieküsalewa nyu thuoh.

¹¹küpakenühnyunü VÜWA Saküüwuowa nüh hakümjie küza veh: Hi mpa nüh eh nyihzhü phah naveh, thi küphah zhu sanaveh.

¹²Nyihzhükühuori nüh nyihzhü riekhuowa vorieküm azavü nüh küphahzhu üta hi nüh eh nyihzhü phahzhu naveh. Aküluküshü rülovü thi küzo müthsüthsü vü mari vorieküm azhie aveh vünüh hi nüh mari hile naveh.

¹³Hi nüh mari tü anyiri vünüh vizhu thi khuhjisuori vünüh vizhu naveh, thi mari sie nü mari azhihvü ru naveh; jüti sanü hi nüh Israel küzhiri vünüh, ajuhküshupe vünüh thi rhieküveh azhihazhie aveh vünüh mari avo sanaveh.

¹⁴Hi nüh kümrhuope kümhie vinü mari aveh sanaveh, thi Israel küzhi kümsieri tü mari kümrhuo pe sanaveh; mari tü kümrhuo azhih kümhie vü tsuo zeh naveh, jüti sanü mari tü Israel küzhikümrhuope khielota küpeh vünüh mari aveho sanaveh.

¹⁵Hi nüh hi mpa nüh eh nyihzhüra kühuowa sanaveh, thi hi nüh mari tü tsuo küüzeh naveh, ta VÜWA Saküüwuowa nüh küza veh.

¹⁶Hi nüh kümiekümri phah nü khaziteküwari sie shehleru naveh, thi kümsamna thsopori hi nüh rietü naveh, hi nüh küthachuri sakükhratsü naveh, thitü aküthüri thi kümzhori thuoüji hi nüh zoriem naveh. Hi nüh kümsho vünüh mari avo sanaveh.

¹⁷Nohri kenüh thuoüji, eh nyihnyihri, VÜWA Saküüwuowa nüh hakümjieküza veh: Hi nüh anyihzhüri anyihzhü azhievü, thi nyihzhüvori thi nyisüri azhievü hi nüh ashih sanaveh:

¹⁸Nohri tü nohkeri nüh kümrhuope kümhie vünüh kümrhuope kümhie vünüh kümrhuo tü müwale ülo, thitü nohri nüh küpari thuoüji nohri mpha nüh nyinya tü nüh? Nohri nüh ajutha küzhu vü küpari thuoüji nohri ampha nüh nyi kümngu sala na tünüh?

¹⁹Eh nyihzhüri tü noh mphari nüh nyinyaküm mütsa üji mümhieülo, thi mphari nüh sakümnyu küm müzhu üji mümhie ülo?

²⁰Jükenüh, VÜWA Saküüwuowa nüh mari vü hakümjie küza veh: Hi mpa nüh anyihzhü küülie thi akütsi masü azhie vü ashih sanaveh,

²¹küpakenühnyunü nohri nüh amünyuo thi asafü nüh chi, thi mari tü müjie vorie küji küsuosheh küja nü noh rütsüri nüh asamwaküthachuri aveh thuoüji khrü,

²²hi nüh eh nyihnyihri külole naveh, thi mari tü müvitsalerathuoh, jüti sanü hi nüh anyihzhü thi anyihzhü masü azhievü ashih sanaveh.

²³ Hi nüh mari anyiehvü akühuo küsü, eh siepewa David sanü ma nüh mari avo küüsanaveh: ma nüh mari avo sa naveh thi mari kühuowa sanaveh.

²⁴ Thi hi, VÜWA nüh mari Saküüwuowa sanaveh, thi eh siepewa David nüh mari azhievü kajitsawa sanaveh; hi, VÜWA nüh küzamthuo.

²⁵“Hi nüh mari sie aküka kütsathuozhü küsü sanü azhihwa vünüh samwari kümsüri tü zoriem naveh, jüta thuoüji mari tü areza vü rho thi aküze vü luoveh ji nü zehra na thuoh.

²⁶Hi nüh mari thi eh ho kümkiele asuo aveh tsiatsü naveh; thi azale kheta küsa vü hi nüh atsorhü küze naveh; thi jümari tü akütsia tsorhü küüsanaveh.

²⁷Ato vü athsohri tü ma viri pe naveh, thi azhihwa tü ma küzhiwa vizhu tsü naveh. Mari tü mari mazhihri vü luoveh ji naveh; hi nüh mari khuonyih thsohwa zoshim, thi mari vi tükha saküvehra ke vünüh küvizhu vü mari tü hi VÜWA ta küsa thsü naveh.

²⁸Mari tü akuoküjiri kenüh prüküvi lewa nyuthuoh, nyutü azhih jüma asari nüh mari küshohriewa nyuthuoh; mari tü tote nü rho nathuo, thi nyi küsü nga nüh mari sa kükrüwa nyuthuoh.

²⁹Hi nüh mari vü wirüzah külole totsü naveh thi mari tü kürüma nüh mari sarieküjawa nyuthuoh, thi akuoküjira müküchie vünüh kümnomna wa nyu thuoh.

³⁰Mari tü hi, VÜWA mari Saküüwuowa nüh mari sietse ta küsa thsü naveh, thi mari, Israel zhehlowa tü eh nyiri, ta VÜWA Saküüwuowa nüh küza veh.

³¹Nohri tü eh nyihzhü, eh küümrhuope vü nyihzhü thi hi tü nohri Saküüwuowa, ta VÜWA Saküüwuowa nüh küza veh,” ti küza.