Read Pochuri Naga EZEKIEL 40 Bible Online

EZEKIEL 40 - Pochuri Naga bible

EZEKIEL 40

¹Hiri kürhoküsi küsa mahvi mükeke nü münga vü, amahvi pokhu vü, asa rülo tü arawa vü, anyujiwa rüteküm mahvi türamzü wa vü, jüma rülo khem ta küsa vü, VÜWA ke tü hi vü peh nü ma nüh hi jüla sieru.

²Ma nüh hi tü Saküüwuowa kümohtsari vünüh Israel zhih vü sieru nü aküzhi kümsie sheh küsü vü sa, jüma rügi vü anyuji küsü kümjie eh küwiejie vü pe.

³Ma nüh hi sie jüla küru vü nyi küsü jüla pehla, ma tso thuoüji amrü kürüwuowa kümjie, ma ke vü mürikuli küsü thi küüte müshüh küsü ti vi; thi ma tü kherileh vü tsie veh.

⁴Anyiwa nüh hi vü, “Anyi tsawa, shenyisheh nü noluo thi küna küjike luo, thi noh luoveh vi hi nüh noh vü kütsana sa küveh aveh vü thse luo, küpakenühnyunü hi nüh jüma noh kütsa nti sieküru wie kenüh; noh nüh küngu aveh vi Israel zhehlowa vü phrahzhuhtsü kheh luo,” ti küza.

⁵ Thinü kükhurüzheh alievü aveh vü samkiele. Anyiwa kevü küüte amüshüh aküsuo thuoüji apienyo türo suo, jümari küsüsü wie nga apienyo küsüsü thi amüza küji rike suo; jüti sanü ma nüh azie aküsawa küte vü amüshüh küsü; thi kümsie amüshüh küsü.

⁶Jüsevü ma tü kherileh vü zhieshu küüprü wuovü tsewa nü akheri kheji küte, thinü amüshüh küsü sheh.

⁷Thi anato ateri tü amüshüh küsü suo thi amüshüh müza; thi anato ateri azhievü pie nyo münga; thi akheriwa kükhake pe tü amüshüh küsü müsie.

⁸Jüsevü ma nüh akheri alowa küütevü pienyo tüze.

⁹Thi ma nüh atela küte ünü apienyo tüze; thi ma tohvüh tü pienyo künyi; thi akheri kütuo atelawa tü alowa pote vü peh.

¹⁰Zhieshu kheri awuowuovü ate küche peh; jümari tü aküji zarike; thi atohvüh awuowuo tü aküji zarike.

¹¹Jüsevü ma nüh akheri saküsawa kümza küte ünü apienyo türake; thi akheri leh wa kümza apienyo türaküche.

¹²Anato ateri atüvü kütote küsü peh, jüma tü awuowuovü pienyo küsüsü; thi ateri tü awuowuo vü pienyo türo.

¹³Jüsevü ma nüh ate küpawa asevü akheriwa asevü nüh ma nüh khite, jüma tü azie vünüh azievü küja pienyo mükeke nü münga müza.

¹⁴Ma nüh atela nga küte nü jüma tü pienyo mükeke; thi anyula küwale atelawa thuoüji ashi küsape.

¹⁵Atsatü vü akheri lehpie apote akheri wa apienyo tünyieke.

¹⁶Azhelo aveh tü mürhülehpie peh khe, thi alo vü aveh mürhülepie pehkhe; thi azie rügivü aluophi arhu rheke sakhe.

¹⁷Jüsevü ma nüh hi sie anyula alievü ru; jüla tü awiepa pehkhe veh, thi küshieke küsü ti peh, anyula aveh vü; küshieke rügi vü awiepa cherake nüh apovü peh.

¹⁸Küshiekewa tü akhoriri natovü wa kheh, akheriri achu wa ju; hamatü aküshie sajiwa.

¹⁹Thi nüh ma nüh akheri sajiwa alowa atüvü nüh kületsuo vünüh anyula alowa alievü tsatü vü küüte pienyo müzake.

²⁰Jüsevü ma nüh zhietü vü küüprü anyula alievü akheriwa küte, ma küsheh thi mari wa küte, ma küsheh thi ma kümza.

²¹Ma teri, awuowuo küche, akheri pokhuwa kümjie thi ma atela aveh küüte zarike sanü shothuo khe. Akheri maküsuo pienyo tünyieke thi maveh thuoüji mükeke.

²²Ma mürhülehpie, ma tohvüh thi ma aluophi rhuri tü zhieshu vü küüprü wa kheri kümjie aküji zarike kheh. Ape ti lekha türü tü jümawa vü khru; thi ma tohvüh tü alowa rügivü peh.

²³Zhieshuvü üta, zhietü kheri küwiejiewa tü anyula alovü akheriwa wie thuoh; ma nüh akheri küsü vünüh akheri küsü vü küju küte, thi jüma tü pienyo müzake.

²⁴Jüsevü ma nüh hi sie zhiese wuo vü küjowa, thinü zhiese vü tü akheri küsü pehla; jüti küsa vü ma nüh jüma tohvüh thi tela küte; thi jümasü tü küpari üta küüte zarike wie.

²⁵Küpara mürhülehpie kümjie jümawa vü thi ma tela aveh vü mürhülehpie pehkhe; ma kümsie thuoüji pienyo tünyieke, thi ma kümza thuoüji pienyo mükeke nü münga.

²⁶Jüla tü lekha türü jümawa vü khru veh; ma tela nüh anato vü. Ma tohvüh ri vü azhiluophi rhu peh, anato küsü vü arhu küsüsü.

²⁷Jüla anyula alowa zhiesa vü akheri küsü peh; thi ma nüh akheri küsü vünüh akheri küsü küju zhiese wuovü küte, thinü pienyo müzake.

²⁸Jüsevü ma nüh zhiese kheri vünüh hi sie anyula alowa vü ru; thi ma nüh zhiese kheriwa küte; thinü küpari üta zarike wie.

²⁹Ma nato telari ma tohvühri, thi mazhehlori tü küpari üta aküjiküsuo zarike; thi jümawa lovü aveh vü mürhülehpie peh khe; ma kümsie tü pienyo tünyieke, thi ma kümza thuoüji pienyo mükeke nü münga.

³⁰Jüma aveh vü atela peh khe, ma kümsie tü pienyo mükeke nü münga thi kümza thuoüji pienyo münga.

³¹Ma tela tü anyula vü küprüke, thi azhiluophi rhuri tü ma tahvüh rügivü peh, thi ma pati leh tü lekha tüze peh.

³²Jüsevü ma nüh hi sie zhieshu wuovü anyula alowa vü ru, thi ma nüh akheri wa küte; jüma tü küpari kümjie küjiküsuo zarike.

³³Ma nato telari, ma tohvüh, thi ma zhelo, tü küpari üta zarike; thi jümawa lovü thi ma lo vü aveh tü mürhü lehpie peh khe; ma kümsie tü pie nyo tünyieke, thi ma kümza thuoüji pienyo mükeke nü münga.

³⁴Ma tela tü anyula aliewa vü küprüke, thi jüma awuowuo vü ma tohvüh ri vü azhiluophi arhu peh; thi ma pati leh tü lekha tüze peh.

³⁵Jüsevü ma nüh hi zhietü kheri vü ru, thi ma nüh jüma küte; jüma tü küpari üta ma veh zarike.

³⁶Ma nato tela ri, ma tohvühri, thi ma zhelovü tü küpari üta aküjiküsuo zarike; thi jüma tü aveh vü mürhülehpie peh khe. Ma kümsie tü pienyo tünyieke, thi ma kümza thuoüji pienyo mükeke nü münga.

³⁷Ma tela tü anyula alievü küprüke, thi jüma awuowuovü ma tohvühri rügivü azhiluophi rhu peh khe; thi ma pati leh tü alekha tüze peh.

³⁸Akheri lo vü awiepa küsü amükhie küpeh küsü peh, jüla nüh akütso kükhurü tü phrüh veh.

³⁹Thi akheri wa zhehlo vü awuowuo vü toküsape künyi peh, jüma rügivü nüh akütso kükhurü, kükhiemuo kükhurü thi künakhie kükhurü ti tehthetheti.

⁴⁰Zhietü kheri lehpie pote vü, alievü toküsape künyipe; thi akheriwa pote anato küpa wuovü toküsape künyi peh.

⁴¹Anato wuovü toküsape müzü, thi akheri nato alievü toküsape müzü, toküsape tüze, jümari rügivü nüh küsahthuoh samwari tü rehthe.

⁴²Akütso kükhurü kenüh aloh küjikhuo toküsape müzü nga peh, ma küsuo pienyo küsü nü küzhila thi ma kürüpuo pienyo küsü nü küzhila, thi ma küsa pienyo küsü, jüma rügivü kütso kükhurüri thi küsahthuori kenüh samwa kürehthe anyukürari sa.

⁴³Jüla tü ake rüka küji aküsuo athuosü peh khe, alovü aveh huke kheh. Thi toküsaperi rügivü kükhurü asa tü jümari rügivü sa.

⁴⁴Akheriwa aleh alovü aliewa rügivü anyula alowa vü azah küsari kenüh awiepa peh khe, küsü thuoüji zhie tü kheri nato zhie se küprü wuovü, küpawa thuoüji zhieshu kheri nato zhietü küüprü wuovü.

⁴⁵Ma nüh hi vü, “Awiepa zhiese vü küüprüke wa thuoüji kükhurüzhe vü ashu küsa navüra kenüh,

⁴⁶thi awiepa zhietü vü küüprükewa thuoüji kükhurüpewa vü küsa anavüra kenüh; hamari tü Zadok küshukürari, Levi küshukürari azhievü mari mpa nüh VÜWA vü shenyiru nü ma nasa sara naveh,” ta küza.

⁴⁷Ma nüh anyulawa küte, thi ma kümsie pienyo müzake, thi pienyo müzake müzam, küvehjie küsü; thi kükhurüpewa tü kükhurüzhe ashütüvü peh.

⁴⁸Jüsevü ma nüh hi sie kükhurüzhehwa tela vü ru nü atela wa tohvüh küte, awuowuo pienyo münga; thi akheri wa kümza tü pienyo türamzü; thi akheriwa natozieri tü awuowuo pienyo kücheche.

⁴⁹Atela kümsie tü pienyo mükeke, thi kümza thuoüji pienyo türakünyi; jümawa vü lekha türake tsekhru; thi atohvüh awuowuo vü peh khe.