Read Pochuri Naga EZEKIEL 41 Bible Online

EZEKIEL 41 - Pochuri Naga bible

EZEKIEL 41

¹Jüsevü ma nüh hi sie nüh azhe zhila lo vü ru nü atohvüh ri küte; atohvüh ri küji tü awuowuo nga pienyo türo.

²Akhepie kümza tü pienyo türake; thi akhepie natozieri tü awuowuo pienyo münganga. Ma nüh zhila tela wa achu küte, thi jüma tü pienyozürake, thi ma kümza pienyo mükeke.

³Jüti sanü ma tü ate alowa vü tu nü akhepie tohvühri küte, thinü jüma tü pienyo künyi, thi akhepiewa kümza thuoüji pienyo türo; thi akhepie wa natozieri tü pienyo türü.

⁴Ma nüh atewa kümsie küte, thi nüh pienyo mükeke, thi ma kümza pienyo mükeke, zhelozhila tela wa tuwuo vü. Jüti küsa vü ma nüh hi vü, “Hamatü kümtse tsatsa azhiewa,” ta küza.

⁵Jüsevü ma nüh Kükhurüzhehwa zie küüte vü pienyo türo sa; thi awiepari nato kükhurüzheh aveh kümkiele ma kümza pienyo müzü.

⁶Anato wiepari tü kürieke küche peh, küsü nüh küsü anyiehvü sake nü, thi kürieke küsü vü cherara. Jüla tü anato wiepari küroze sana küsa kenüh kükhurüzheh azie kümkiele aveh vü kütsüteri peh, jüta thuoüji jümari tü kükhurüzhehwa azie nüh mürozete nüh sanaveh.

⁷Awiepa nato azhievü alehwa tü kürieke küsü vünüh kürieke küsü nyiehvü müza; küpakenühnyunü kükhurüzhehwa tü aveh kümkiele te ta khe. Hama kenüh arügiri nazizheh kürieke aveh tü müzatewa. Kürieke azhiehwa vünüh kümsietsawa küju aphalawa vünüh müri küwa sa.

⁸Kükhurüzhehwa tü aveh vü kütsiepe küsüsü sake; anato ajuperi tü pienyo türo küsuo amüshüh ajü küsü nüh küte.

⁹Anatowa wiepa azie ma küsa tü pienyo münga; thi kükhurüzheh nato wiepari azhievü küüpie,

¹⁰thi anyulawa wiepari tü kükhurüzhehwa anato aveh vü kümkiele aveh pienyo mükeke müza.

¹¹Anato wiepari tü azhie rütso küveh wuovü nüh küsara sa, amükhie küsü zhietü wuovü, thi küpawa thuoüji zhiese wuovü ti, thi aveh vü azhie kümza vü thuoüji kürütso sa.

¹²Azhe zhietu nato kükhurüzheh küüprüwa tü pienyo rürake müza; thi azhe mazie tü aveh vü pienyo münga sa, thi ma kümsie thuoüji pienyo guhrake.

¹³Jüsevü ma nüh Kükhurüzhehwa küte nü jüma tü pienyo müzake müsie thi alievü, azhe wa thi ma zieri tü pienyo müzake müsie;

¹⁴jüsevü nga kükhurüzheh atsatü vü zhieshuwa kümza thuoüji pienyo müzake.

¹⁵Jüsevü ma nüh zhietu anyula vü küüprü kürieke kümsie wa thi azhe awuowuo saji nü küüte vü apienyo müzake. Kükhurüzhehwa alo vü thi alie vü atela,

¹⁶thi kümkiele aveh, kürieke küche aveh, mürhülehpie akhuji vü nüh aveh athso nüh aziesakhe (khenyi thuoüji mürhülehpieri tü samthuoh),

¹⁷amükhiewa nyiehvü azhievü küpiewa, ate alowa nga, thi alievü nga ti. Thi kümkiele aveh azieri alo alie aveh küüte pekhe.

¹⁸Jümatü cherubim thi aluophi rhu sa, aluophi rhieküsü tü cherub thi cherub masü azhie vü peh. Cherub masü khurü nga anyieh künyihnyih pe:

¹⁹anyiwa nyieh thuoüji wuochuwuovü aluophi rhuwa vü küprüke, thi amiewuowa atsawa nyieh thuoüji anato küpawa luophi rhuvü küprüke. Jümasü tü kükhurüzhehwa kümkiele aveh atsorhe sakekheh.

²⁰Azhih vünüh amükhie anyieh wuovü tü cherubim thi aluophi rhu nüh azievü rheke kheh.

²¹Nazizheh mükhie tovüri tü vehjie. Kümtse azhiewa tsatü vü tü athsoh nüh küsa kükhurüpe

²²küsü kümjie kümsie pienyo küche, pienyo künyi suo, thi pienyo künyi müza; ma jühkheh, ma kütokepe, thi ma zieri tü athsoh khe. Ma nüh hivü, “Toküsape hamatü VÜWA tüvü tokeküsawa,” ti küza.

²³Kükhurüpe thi kümtse zhie tü amükhie künyihnyih peh.

²⁴Amükhie ri tü kükuo künyihnyih, amükhie küsü vü lalata küüthuo awa künyi.

²⁵Nazipe mükhieri tü azieri vü rheke küsa üta cherubim thi aluophi rhu rheke; thi atela alie atsatü vü athsoh renyawa küsü peh.

²⁶Thi awuowuo vü kümnyie mürhülehpie thi aluophi rhu peh, atela nato lekütsepe vü, nazizheh nato vü, thi athsorhu rügi vü.