Read Pochuri Naga EZEKIEL 42 Bible Online

EZEKIEL 42 - Pochuri Naga bible

EZEKIEL 42

¹Jüsevü ma nüh hi sie anyula alie vü zhietü wuovü shuwa, thi ma nüh kükhurüzheh anyula küwiejie awiepa thi zhietü küüpa nyula küwiejie vü hi sie ru.

²Azhe wa achu zhietü wuovü pienyo müzake, thi ma kümza pienyo tünyieke.

³Anyula alowa tü pienyo mükeke, thi anyu; a alie vü shieke küsa küüprü wuovü tü awiepawa kürieke küche vü küroke roke vünüh sake.

⁴Awiepawa tsatü vü alovü lekhuji küsü peh, thi jüma tü ma kümza pienyo türake, thi küsuo pienyo müzake, thi ma khepieri tü zhietü wuovü.

⁵Awiepa wiehwa thuoüji kümünyie, Küpakenühnyunü kürokeri vünüh azhie ri tü jümari anyiehvü nüh awiepa asajiwa thi aphalawa vünüh küüji viketeküwa kenüh,

⁶küpakenühnyunü jümari tü kürieke küche vü küpeh kenüh, thi jümari tü anyula aliewa kümjie alokhuo münyie luo; hama kenüh arügi vü awiepari tü azhiwa vünüh asaji thi aphalari vünüh ase vü sakem.

⁷Anyula alie wuovü awiepa küüprü awiepa sie kütsuo pienyo tünyiehke,

⁸küpakenühnyunü anyula alie wa rügivü awiepawa tü ma küsuo pienyo tünyieke, kükhurüzheh küwiejie jümari tü ma küsuo pienyo müzake.

⁹Jülovü anyula vü nüh tu na küsa kenüh awiepa hamari ajih vünüh zhieshu vünüh lekhuji küsü tu.

¹⁰Azie aküsa nüh saküsa, azhiese vü, azhe küwiejie vü nga küshothuo küsüpeh,

¹¹jümari tü zhietü vü awiepari sie thse luo, achu nga thi kümzanga zarike wie, alehpie nga thi zanyo aveh thi amükhieri aveh nga zarike kheh.

¹²Jükenüh zhiese vü awiepawa khepie tü alehküpie küsa alüvü nüh akhepie wa tü tu veh, azie küzarike küsa zhieshu wuovü nüh tu naveh.

¹³Jüsevü ma nüh hi vü, “Küwiejie zhietü wiepawa thi zhiese wiepawa tü kümtse wiepa kheh, anavüri nüh VÜWA vü sieküjüle vü kümtse zanyokütsüri tsanaveh; mari nüh jüla zanyokütsü kümtse tsatsari thse naveh, atsuo kütsü, kükhiemuo kenüh kütsü, thi künakhie kenüh kütsü ti, küpakenühnyunü azhiewa tü mütha küm kenüh.

¹⁴Anavüri nüh kümtse azhiewa lovü kütu vü, mari nüh vü nü anasa küsa athsüri fo müsanüh anyula alievü shu müwara, küpakenühnyunü hamari tü mütha küm kenüh. Mari tü anyiri küpeh azhie müjie küwa atüvü nüh thsümnyi küpa vi vü naveh,” ti küza.

¹⁵Ma nüh kükhurüzheh azhie alo vü küteju kümü sevü ma nüh hi sie nü zhie shu küüprü akheri vü siezhu wa nü kükhurüzhehwa kümkiele aveh küüte kheh.

¹⁶Ma nüh zhieshu wuovü amüshüh nüh küte, thinü jüma tü pienyo müza münga.

¹⁷Jüsevü ma tü kürele wa zhietü küüte ünü jüma tü amüshüh nüh küüte pienyo müza münga.

¹⁸Jüsevü ma nüh kürelewa zhiese wuovü küte, thinü amüshüh nüh küüte pienyo müza münga.

¹⁹Jüti sanü ma nüh wa nü zhietu wuovü küte ünü amüshüh nüh pienyo müza münga.

²⁰Ma nüh awuowuo müzü küte. Jümatü azie nüh sho mükiele, thi ma küsuo pienyo müza münga, thi ma kümza pienyo müza münga, kümtse thi küsaji masü azhie vü athuo sana küsa kenüh.