Read Pochuri Naga EZEKIEL 43 Bible Online

EZEKIEL 43 - Pochuri Naga bible

EZEKIEL 43

¹Jüsevü ma nüh hi sie akheri vü ru, zhieshu kheri küüprü wuovü.

² Thi jüla tü, Israel Saküüwuowa kütholathovü tü zhieshu vünüh tse veh; ma khi tü ajuh khielota küli khi kümjie; thi azhihwa tü ma kütholathovü nüh wieraketewa.

³Hi nüh kümohtsa küngu tü ma nüh anyujiwa zorie nta kütse küngu kümjie, thi hi nüh Khebar rühku vünüh kümohtsa künguwa kümjie; jüti küsa vü hi tü eh nyieh fephohketewa.

⁴VÜWA kütholathovüwa tü zhieshu küüprü akheriwa vünüh kükhurüzheh lovü tekütu üta,

⁵Sietsewa nüh hi viketewa nü hi sie anyula alowa vü tetu; thinü VÜWA kütholathvüwa tü kükhurüzhehwa protewa.

⁶Anyiwa nüh eh mato vü tsieküveh vü kükhurüzheh lovü nüh wuori nüh hi ji küveh künara.

⁷Ma nüh hi vü, anyi tsawa, azhie hamatü hi nüh küsuokürho Israel nyiri azavü pena küsa eh kükajipe thi eh mpha khu kenüh azhiewa. Israel zhehlowa tü eh nyo kümtsewa saküümne lewa nyuthuoh, nyutü mari nga thi ma kajiri nga mari kükhiemuo vünüh, nyutü mari kajiri küsü kümo vünüh saküümnewa nyuthuoh.

⁸Mari nüh mari kheji vi mari kheji vü küthsevü thi mari mükhie to vüh tü eh mükhietovüh nato vü küthse vü, mari thi eh zhie vü azie küsü müpa nüh küpeh vü, mari nüh küsa akükre nüh eh nyokümtsewa sakümne; jükenüh hi nüh eh rükümtho vünüh mari müzhum.

⁹Khinyi thuoüji mari anguori thi mari kajira kümo kületsuovü viwa jam luo, jüta thuoüji hi nüh küsuokürho mari azhie vü pe naveh.

¹⁰Noh thuoüji, anyi tsawa, Israel zhehlori vü kükhurüzhehwa küzatsüluo, thi mari kümshewa wa küüte luo; jüti sanü mari tü mari künakhie vünüh küüzükrü luo.

¹¹Mari tü mari nüh saküm aveh vünüh zükrü veh thuoüji, kükhurüzhehwa kürüzhe, ma küsa, ma lehpieri thi akheriri, thi ma tso ajü, ma zhühkhori aveh thi ma kürüzhe aveh thi ma khonyori aveh mari saküthsü luo; jüti sanüh mari nüh küngu vünüh jümari rhü luo, jüta thuoüji mari nüh müzhera thi kürüzhe aveh thi ma azhühkhori aveh müzhera naveh.

¹²Hamatü kükhurüzhehwa khonyo: aküzhi rügivü natonahuori ajü kümkiele aveh thuoüji kümtse tsatsa sanaveh. Halie, hamatü kükhurüzheh khonyo.

¹³ Hamari tü apienyo vünüh kükhurüpewa küüte ri (pienyowa tü pienyo küsü nü amüza küji rike): ma kütopewa tü ma kümsie pienyo küsü thi kümza pienyo küsü, ma naro kümkiele vü pote vü küüte küsü. Kükhurüpe wa kümsie tü hama sanaveh:

¹⁴Azhih vü akhujiwa vünüh sajiwa küju pienyo künyi, ma kümza pienyo küsü; thi ajekie küzahzawa vü ajekie küjizahwa küju pienyo müzü, ma kümza pienyo küsü;

¹⁵thi kükhurüpewa nyithü tü pienyo müzü; thi kükhurüpewa nyithü arügivü küsake arütsü müzü.

¹⁶Kükhurüpewa nyithü tü vehju naveh, aküsuo pienyo türakünyi kümza pienyo türakünyi.

¹⁷Ajekie nga küvehjie naveh, aküsuo pienyo türamzü kümza apienyo türamzü, küsü kümkiele ma kümza pienyo küzhila, thi ma poteposhu kütope pienyo küsü, kükhurüpe patiri tü zhieshu vü küprükenaveh, ti küza.

¹⁸ Jüsevü ma nüh hi vü: anyi tsawa, VÜWA Saküüwuowa nüh hakümjie küza veh: Hamari tü kükhurüpewa zhühkhori: kütso kükhurü ri jüma rügivü nüh kütsü kenüh jüma küshie rülo vünüh thi jüma wa vü azüh küürhü jake kenüh,

¹⁹kükhiemuo küsü kükhurü kenüh nohri tü Zadok tharuo vü levira navüri, hi vü anasa satsü nta hi shehnyi küruri vü shüvotsazah küsü tsü naveh ta VÜWA Saküüwuowa nüh küza.

²⁰Thi noh nüh jüma azhüh pike vi nü kükhurüpewa rütsü müzü vü, jekie müzü jühke vü, thi pote kümkiele aveh vü ti thse naveh; hakümjie vünüh noh tü jüma sakümtse thi jüma kütsathuo sanaveh.

²¹Noh tü kükhiemuo kükhurü kenüh shüvotsazah wa nga vi naveh, thi jümawa tü alievü kümtse azhie kükhurüzheh azhie kütuohke küsa vü nüh tso naveh.

²²Rülo künyiawa noh tü kükhiemuo kükhurü kenüh nyisüvo mükünyiehna küsü vi khurü naveh; jüti sanü shüvotsazah vi saküümtse üta kükhurüpewa tü sakümtse naveh.

²³Noh nüh jüma sakümtse jum thuoüji shüvotsazah azhürhü müküpe na küsü thi nyihnyihriekhuo vünüh nyihzhüvo azhürhü müküpe vi nü khurü naveh.

²⁴Jümasü tü noh nüh VÜWA tüvü thse naveh, thi navüri nüh jümasü anyiehvü amütsü hujake nü VÜWA vü kütsokükhurüküsü sanü jümasü vi khurü naveh.

²⁵Rülo türü kenüh noh tü kükhiemuo küsü kenüh arülo kürüzhu nyi sü küsü kütuohtsü naveh; jüsevü nga ma riehkhuo vünüh azhürhü müküpe mieshüvozah küsü thi nyihzhüvo küsü tikütuoke tsü naveh.

²⁶Rülo türü mari tü kükhurüpewa kenüh kütsathuo sanü jüma sakümtse naveh, jüüta vünüh jüma tü sakümtse naveh.

²⁷Rülo hamari jumthuo üji rülo tüze vünüh tuvü anavüri nüh kükhurüri thi nohri kükathuo kükhurüri tsü naveh; thi hi nüh nohri vi naveh, ta VÜWA Saküüwuowa nüh küza.