Read Pochuri Naga EZEKIEL 45 Bible Online

EZEKIEL 45 - Pochuri Naga bible

EZEKIEL 45

¹Jüsevü, nohri nüh azhihwa aka kümjie vünüh küüto vü azhihwa tü VÜWA müthoh kenüh kümtse suofo kümjie vünüh pienyo anyie mükeke nü münga küsuo thi aveh pienyo mükeke küpa sa naveh; jüma tü poteposhu aveh vü kümtse sanaveh.

²Hamawa vünüh azhefo küvehjie pienyo müza münga, thi achu pienyo müza münga, thi azhievü azhie jaküümkiele pienyo tünyieke ti sanaveh.

³Kümtse suofowa vünüh nohri tü kümkhuo küsü aküsuo pienyo anyie mükeke nü münga thi aküji pienyo anyie türake ti küte sanaveh, jümawa vünüh kümtsezheh, azhie kümtse tsatsa wa tü sanaveh.

⁴Jümatü azhie kümtse suope küsü sa naveh; jüma tü anavüra kenüh, VÜWA nasa sa nta ma vü küwari kenüh; jüma tü mari azheh kenüh thi kümtsezhehwa kenüh ti azhie küsü sanaveh.

⁵Kümkhuo küpawa, aküsuo pienyo anyie mükeke nü münga thi aveh apienyo anyie türake thuoüji kükhurüzheh vü anasa küsa Leviri kenüh mari nüh küüvi nü küürho na küsa anyujiri kenüh.

⁶Kümtse suofo saküpa küsa asuope nato vü thuoüji noh tü anyuji kenüh küüvi pienyo anyie münga ma küji thi ma küsuo pienyo anyie mükeke nü münga; hama thuoüji Israel zhehlo aveh azhi sanaveh.

⁷Thi azhih kajitsari kenüh thuoüji kümtse suofo awuowuo thi anyujiwa nüh kümkatevü, kümtse suofo mürhüküwa thi anyujiwa kümkate vü, zhietu thi zhie shu wuovü, achuwa tü akuoh küsü ajisuo vünüh sake nü zhietu vünüh zhieshu azhih arüh küjie sake luo.

⁸Hamatü Israel vü ma zhehzhuh. Jüta thuoüji eh kajitsari tü eh nyiri kümrü lewa nyu thuoh; tü mari nüh Israel zhehlowa tü mari akuoh müzhe nü azhih küüvi naveh.

⁹VÜWA Saküüwuowa nüh hakümjie küza veh: Walethuoh, O Israel kajitsari! Küvürie thi kümrü vijam luo, thi kümsho thi kükatowa nü mowa nüh saluo. Nohri nüh eh nyiri zheküja lem luo, ta VÜWA Saküüwuowa nüh küza.

¹⁰ Nohri tü künyitsa küüto sanaveh, künyitsa vünüh aloh küütevüh tsokrü naveh.

¹¹Ephah thi bath masü tü küüte zarike sanaveh, bath küsü vü homer küüsou türake pehveh, thi ephah küsü vü homer türake pehveh, homer nüh küüte ketewa sana.

¹²Shekel küsü vü gera mükeke sanaveh; shekel mükeke thi mükeke nü münga thi türamnga tü nohri mina küsü sanaveh.

¹³Nohri nüh kütsü vü ha kümjie sana; hiemtha homer küsü vü küüsou türo sanü ephah küsü, khuozhikürümie homer küsü vü küüsou türo sanü nüh ehpohah küsü,

¹⁴thi vüjuh suope kütekeküm, bath vü nüh, cor küsü vü ephah küüsou türake sanü küsü (cor nga homer kümjie bath türake tüveh)

¹⁵thi Israelra kümrhuope vünüh anyihzhü riehkhuo aveh vünüh nyihzhü küsü. Hamatü atha kükhurüri, akütso kükhurü, thi kürükümhie kükhurü, makeri’a nüh kütsathuoh küsa kenüh, ta VÜWA Saküüwuowa nüh küza.

¹⁶Azhih hala nyiri aveh tü Israel vü kajitsari vü nyi nü kükhurü hama sanaveh.

¹⁷Thitü hama tü kaji atsawa nüh Israel zhehlowa kenüh akhu tsotho vü akhuleri küteke küsa aveh vü: kütso kükhurü, atha kükhurü, thi aküzhu kükhurü, asa kürüthe vü thi kümnyirülo ri vü küüro hamari ma nüh sa kheh naveh: kükhiemuo kükhurü, atha kükhurü, akütso kükhurü, thi kürükümhie kükhurü ti ma nüh Israel zhehlowa kenüh kütsathuoh satsü naveh.

¹⁸VÜWA Saküüwuowa nüh hakümjie küza veh: Asa pokhuwa, arülo pokhu vü, azhührhü müküpe shüvotsazah küsü noh nüh vi nü kümtsezhehwa sakümtse naveh.

¹⁹Anavüwa nüh kükhurüzhehwa mükhietovühri vü, kükhurüpewa ajühke naro müzü vü, thi anyula alowa kheri tohvühri vü ti thse naveh.

²⁰Sazih nü nyutü müküthsü vünüh hakümjie khemta asa rülo türüawa vü noh sanaveh; jüti sanü noh nüh kükhurüzhehwa kütsathuo sanaveh.

²¹ Asa pokhuwa vü, rülo türamzü vü nohri tü tsekükari akhu kükhu naveh, thi rülo türü ahzhi müküthse lohse tsanaveh.

²²Jüma rülo vü kajitsawa tü ma mpa ma kenüh thi azhih jüla nyiri aveh kenüh ti kükhiemuo kükhurü kenüh shüvotsazah küsü tsü naveh.

²³Thi akhu rülo türü tsotho vü ma nüh VÜWA vü kütso kükhurü kenüh azhührhü müküpe shüvotsazah türü thi nyihzhüvo türü ti tsü naveh, rülo türü vü küsüsü; thi kükhiemuo küsü kükhurü kenüh arülo kürüzhu nyihsüvo küsüsü ti tsü naveh.

²⁴Atha kükhurü kenüh ma nüh shüvotsazah thi nyihzhüvo küsüsü vü atha küüto türü nü küzhila thi vüjuh kete küche ti tsü naveh.

²⁵ Asa türüawa rülo türatürü vü akhu rülo türü kenüh ma nüh jükümjie khemta kükhiemuo kükhurü kenüh, kütso kükhurü kenüh, atha kükhurü kenüh, thi avüjuh kenüh ti tsü naveh.