Read Pochuri Naga EZEKIEL 46 Bible Online

EZEKIEL 46 - Pochuri Naga bible

EZEKIEL 46

¹VÜWA Saküüwuowa nüh hakümjie küza veh: Küüroh rülo türo aveh vü anyula alowa kheri zhieshu küüprüwa tü khe sa peh huo naveh; thitü kümnyirülo thi asa kürüthe rülo vü thuoüji sasanaveh.

²Kajitsawa tü alievü nüh azhehlowa mükhie kheri vünüh tu naveh, thi akheriwa tovüh kütuoh vü tsie naveh. Navüri nüh ma kütso kükhurü tsü naveh, jüti küsa vü ma tü akheriwa kheji vü küngietsuo naveh. Jüti sanü ma tü alievü shutewa naveh, thitü akheriwa thuoüji münüleh küju khe sanaveh.

³Azhih jüla nyiri tü kümnyirülori vü thi asa kürütheri vü VÜWA tüvü akheri jümawa khepie vü küngie tsuo naveh.

⁴Kajitsawa nüh kümnyirülovü VÜWA vü kütso kükhurüwa tü azhührhü müküpe nyihzhüzah türo thi nyihzhüvo küsü ti khurü naveh;

⁵thi nyihzhüvo kenüh atha kükhurüwa kete türatürü nü küzhila, thi nyihzhüzahwa kenüh atha kükhurü thuoüji ma nüh küzake tsünta müshe veh ünüh jüzake küsaji. Atha kükhurü jükümjie küsü vü vüjuh kete küche.

⁶Asa kürüthe rülovü ma tü mieshüvozah, nyihzhüzah türo thi nyihzhüvo küsü ti azhührhü müküpe,

⁷atha kükhurü kenüh ma nüh atha kete türatürü nü küzhila vü mieshüvozah kete türatürü nü küzhila vü nyihzhüvo, thi nyihzhüzahri kenüh thuoüji ma nüh küzake tsüra naveh ünüh, küsaji atha kükhurü jükümjie küsü vüjuh kete küche.

⁸Kajitsari nüh küturu vü ma tü akheriwa zhehlo mükhie vünüh tu naveh, thi ma tü jü wuovü nüh shutewa le naveh.

⁹Azhih jüla nyiri nüh küte küsa akhuri vü VÜWA tüvü ru thuoüji, kükhurü sa nta thari nüh zhietü kheri vünüh turu naveh ünüh zhiese kheri vünüh shutewa naveh; thi thari nüh zhiese kheri vünüh tu naveh ünüh zhietü kheri vünüh shutewa naveh: mari tü akheri khiemawa vünüh tu nüh jümawa vünüh sheleküshuwa nyu, thitü kümsho tsezhu tewa naveh.

¹⁰Mari küturu vü, kajitsawa nüh mari sieturu naveh; thi mari nüh shuteküwa vü ma nga shutewa naveh.

¹¹Akhuleri thi küteke küsa zaleri vü mieshüvozah küsü vü atha kete türatürü nü küzhila, nyihzhüvo vü kete türatürü nü küzhila, thi nyihzhüzahri vü thuoüji ma mpa nüh küzake tsüra naveh ünüh, küsaji türatürü vü vüjuh kete küche.

¹²Kajitsawa nüh apashe kükhurü, ma mpa nüh kütso kükhurüluo nyutü VÜWA vü apashe küthse üta küsa kütsathuo kükhurü tsü thuoüji akheri zhieshu küüprüwa tü ma kenüh sasa naveh; thi ma nüh kümnyirülo vü küsa üta ma nüh ma kütso kükhurüwa tsü naveh. Jüti sanü ma tü shutewa naveh, thi ma shuteküwa sevü akheriwa tü khetem naveh.

¹³Rülorülo VÜWA vü kütso kükhurü küsüsü tsü na küsa kenüh nyihzhüzah azhührhü müküpe mahvi küsü kükhruo ma nüh tsü naveh, rüne kürüzhu vünüh ma nüh jüma totsü naveh.

¹⁴Thi mükütuo wiethuoh nüh rünerüne vünüh ma nüh atha kükhurü jümawa kürü tsü naveh, küüto künyi nü küzhila, VÜWA vü atha kükhurü üta vünüh ahiewa küjie na küsa kenüh vüjuh kete küsü thse naveh; hamatü tsotho aveh vü azhühkho küsü.

¹⁵Hakümjie vünüh müküütuo kütso kükhurü üta rüne kürüzhu kükhurü kenüh nyihzhü, atha thi vüjuh ti totsü naveh.

¹⁶“VÜWA Saküüwuowa nüh hakümjie küza veh: Mükütüküzü kajitsawa nüh ma tsa nyimpari küsüküsü vü nga ma ka vünüh aküte sa nta thuoüji, jüma tü ma tsara zhi sam nathuoh, jüma tü aka vünüh mari azhezhuh sakümthuoh kenüh.

¹⁷ Thitü ma nüh ma ka vünüh ma sieperi küsü vü aküte sa nta thuoüji tsüleküm mahviwa küju mpa nüh ma zhi sa naveh; jüti sanü jüma tü kajitsawa vü sheleteru naveh; ma tsa nyimpari mpa nüh ma ka vünüh aküte sara naveh.

¹⁸Kajitsawa tü anyira ka, mari zhezhum wie nü mari azhi saküveh vitemwara; ma tü ma mpa ma zhi saküveh vünüh ma tsari vü aka tsü naveh, jüta küsa vünüh eh nyiri tü nyi küsü nga azhezhuh mükünyie küsawa nyu,” ti küza.

¹⁹Jüsevü ma nüh akheri nato vü pehküveh akhepie vünüh hi sie nü zhietü küri kümtse wiepari vü anavüri kenüh ru; thinü hi tü jümara zhietu küpotetsatsa vü azhie küsü ngu.

²⁰Ma nüh hi vü, “Azhie hala nüh anavüri tü künakhie kükhurüwa thi kükhiemuo kükhurüwa ti shu naveh, thi jüla nüh mari tü atha kükhurüwa veh naveh, küpakenühnyunü jümari vi nü anyula aliewa vü shuru taji anyiri vü kümtse zanyori vi mari sie küsü müsanüh sana küsa kenüh,” ti küza.

²¹Jüsevü ma nüh anyula alivü shuteru nü anyula jühke müzüvü hi küjo tsewa; thinü anyula jühke müzü vü tü anyula peh le hü veh,

²²anyulawa jühke müzü vü anyula küzah müzü peh nü ma küsuo thuoüji pienyo zürake thi aküji pienyo cherake, mari müzü aveh achu nga thi aveh nga zarike kheh.

²³Alovü anyula müzü kümkiele vü tü aloh küüroh aküri küsü pehveh, aküri kükhu vü nyitsoperi mükiele veh.

²⁴Jüti küsa vü ma nüh hi vü, “Hamari tü ashie shukütsape, kükhurüzheh vü akütsü küsari tü hamari vünüh anyira küsahthuori shu naveh,” ti küza.