Read Pochuri Naga EZEKIEL 47 Bible Online

EZEKIEL 47 - Pochuri Naga bible

EZEKIEL 47

¹ Jüsevü ma nüh hi sie shele nü kükhurüzhehwa khepie vü ru; jüla tü, kükhurüzhehwa kheji kükhu vünüh ajuh li nü zhieshu wuovü wa veh (küpakenühnyunü kükhurüzhehwa tü zhieshu wuovü küprüke küveh kenüh); thi ajuhwa tü li nü kükhurüzheh akhejiwa zhiese kükhu vünüh tsuo veh, kükhurüpe zhiesewa vü.

²Jüti sanü ma nüh zhietü kheri leh vünüh siezhuru nü zhieshu vü küüprü akheri aliewa vü sie küjo mükiele ru; thi ajuhwa tü zhiese wuovü nüh shuru veh.

³Ali küsü ma ke vü küjehke nü zhieshu wuovü wa taji anyiwa nüh küüte vü pienyo anyie küsü kütera, jüsevü ma nüh hi küjo sie ajuhwa gawa, thinü jüma tü akürü vü kuru.

⁴Jüsevü nga ma nüh küte nü pienyo anyie küsü, thi hi küjo sie ajuhwa vü wa ünü jüma tü akho vü kuru. Ma nüh küte le ünü pienyo anyie küsü, thi hi küjo sie ajuhwa vü tu; thinü jüma tü aküshih vü küru.

⁵Ma nüh küte le nü pienyo anyie küsü, thinü jüma tü arühgu sakümthuoh kenüh hi tü mügara nüh sam, Küpakenühnyunü ajuhwa tü sheh kümthuoh kenüh; jüma tü sheh nü ma lovü kümshura kümhie sa, arühgu mükügara küsü sam.

⁶Ma nüh hi vü, “Anyi atsawa, noh tü hama nguthuoh ünü nyu lo?” ti küna. Jüsevü ma nüh hi sie shele arühguwa sapo vü ru.

⁷Hi sheleküru vü arühguwa sapo wuovü athsoh küji hozake pehveh.

⁸Ma nüh hi vü, Ajuh hamatü zhieshu asuo wuovü liwa nü Arab vü tsuo veh; thi jüma tü juhküjiwa lovü tu thuoüji, juhküji küüjo juhwa tü ajutha sateru naveh.

⁹Arühguwa nüh khievü liwa naveh ünüh zhüzhüta rhoküveh ajurü aveh tü rho naveh, thi jüla tü anga khielota tü naveh, küsükeri ajuh hamari tü jüla ju. Jümatü ajutha sanaveh; thi arühguwa khievü wa naveh ünüh azanyo aveh tü rho naveh.

¹⁰Anyiri tü ajuhküji sapovü tsie nü Engedi vünüh Eneglaim küju anga tie naveh; jüma tü aneh küjake azhie küsü sanaveh; ma nga tü juhküji Aküji vü anga kümjie anga khielota küpapa küsa aküji sanaveh.

¹¹Thitü ma juh küüjori thi asüpriri tü kümtsewa nyu, jümari thuoüji amütsü kenüh jasanaveh.

¹²Arühguwa sapo awuowuo thuoüji, ashie sana küsa kenüh athsoh küzümküzü sho naveh. Ma nyawari tü küwazhüwa nyu nyutü ma viri tü kükrewa nyu, thitü asa kürüzhu mari tü avi kürüthe pe peh huo naveh, küpakenühnyunü mari kenüh ajuh tü kümtsezheh vünüh liru küveh kenüh. Ma viri tü vi ashie sanaveh, thi ma nyawari tü vi saküümhie sanaveh, ta küza.

¹³VÜWA Saküüwuowa nüh hakümjie küza veh: Israel akuoh türakünyi azhievü aka kenüh nohri tü azhihwa arüh hakümjie vünüh küsuo naveh. Josef thuoüji suope künyi vi naveh.

¹⁴Nohri thuoüji zarike vünüh küsuo naveh; noh nyiri vü tsü nti hi nüh küshiemthuoh, thi azhih hamatü nohri aka vünüh turu naveh.

¹⁵Hama nüh arüh sanaveh: zhietü vü thuoüji Juhküji Aküjiwa vünüh Hetlon leh vünüh Lebohamat küju, thi Zedad küju,

¹⁶Berotha, Sibraim (jüma tü Damaska rüshu thi Hamath rüshu azhievü pehveh, Hazer-hatikon küju, jüma tü Hauran vü pehveh).

¹⁷Jüti sanü arühwa tü juhküjiwa vünüh Hazarenon küju wa, jüma tü Damaska rüshu zhietü vü, Hamath rüshu nüh zhietü sa. Hama nüh zhietü wuovü.

¹⁸“Zhieshu wuovü thuoüji Hauran thi Damaska masü azhievü; Jordan mürhü taji Gilid thi Israel azhih masü azhie vü; juhküji zhieshu vünüh thi Tamar küju. Hama nüh zhieshu wuovü sanaveh.

¹⁹“Zhiese wuovü thuoüji, Tamar vünüh thsokewa nü Meribat kadesh ajuhri küju, jüla nüh Egypt Wadi vünüh mürhüwa nü Juhküji Aküjiwa küju. Hama nüh zhiese wuovü sanaveh.

²⁰“Zhietu wuovü thuoüji, Juhküji Aküjiwa nüh arüh sanü Lebohamat küwiejie nüh athsopo küsü sa naveh. Hama nüh zhietu sanaveh.

²¹“Jüti sanü nohri tü azhih hama tü Israel kuoh müzhe nü noh zhierivü küsuo naveh.

²²Nohri tü nohri mpa nohkeri nüh aka küsü kümjie vünüh to naveh, thi noh zhieri vü rhoküveh anyilieri nga thi noh zhieri vünüh atsa ngukümri nga ti to naveh. Mari tü nohkeri nüh Israel kuoh nyi sanaveh; mari tü nohri sie nü Israelri akuoh azavü aka nyito naveh.

²³Anyilieri tü akuoh thawa vü nyi rho veh ünüh jüla nüh nohri tü mari aka satsü naveh, ta VÜWA Saküüwuowa nüh küza.