Read Pochuri Naga EZEKIEL 7 Bible Online

EZEKIEL 7 - Pochuri Naga bible

EZEKIEL 7

¹VÜWA zhü tü hi vü ru tajinü: noh tü, O anyi atsawa, VÜWA

²Saküüwuowa nüh Israel azhihwa vü hakümjie küza veh: Sehkhe küsü! Asehkhewa tü azhih jüma jühke müzü vü teru pehvehthuoh.

³Khinyi asehkhewa tü noh vü pehvehthuoh, hi nüh eh rüküshuwa noh vü leküze na thuoh; hi nüh noh lehkhuji müzhe nü noh shih sanaveh, noh kükre aveh kenüh hi nüh noh vü kümnomnatsü naveh.

⁴Eh notha tü noh küsshiewa nyu, hi tü norüthaküna küpehwa nyu. Noh lehkhujiri kenüh hi nüh noh vü kümnomnatsü naveh, nohri kükre nohri azhievü pehküveh vü. Jüta thuoüji nohri tü hi VÜWA ta küsa thsüra naveh.

⁵VÜWA Saküüwuowa nüh hakümjie küza veh: Asheküsü sevü nga asheküsü! Noluo, jüma tü tsethuoh.

⁶Asehkhe küsü tü tsethuoh, asehkhewa tü tsethuoh. Jümatü noh saküsüramthuoh; noluo, jüma tsethuoh!

⁷Nohri alokürü tü nohri vü rupehveh thuoh! O azhih jüla arhieri. Tsothowa tü rupehvehthuoh, arülowa tü shehnyi vehthuoh, küüzhükürü, aküzhi vü alokürawa nyuthuoh.

⁸Khinyi kümto hi nüh eh rükümthowa noh rügivü küshoketü nathuoh; hi nüh eh rüküshuwa noh vünüh küüshu nathuoh. Hi nüh noh lehküji müzhe nü noh shih sanaveh, thi noh kükre aveh kenüh noh vü kümnomnatsü naveh.

⁹Eh notha tü küüsawa nyuthuoh; hi nüh norüthaküna küpehwa nyuthuoh. Noh lehkhujiri müzhe nü hi nüh noh vü kümnomnatsü naveh, akükre noh zhieri vü pehküveh vü. Jüta thuoüji nohri tü hi VÜWA nüh jüma kürhie ta küsa thsüra naveh.

¹⁰Noluo, arülowa! Noluo, jüma tü tsethuoh ünüh! Nohri alokürü tü kuoshuwa thuoh. Azhietsüh tü wuveh thuo, kürhiezarhiechi tü shitsethouh.

¹¹Küvürietü kümsüküsa azhietsüh vünüh jiwathuoh. Mari küsü nga küpehwa nyu, mari küüsheküsha nga thi mari künyirhie nga küpehwa nyu; mari azhie vü kütholah küpehwa nyuthuoh.

¹²Tsothowa tü rupehvehthuoh, arülo shenyiru pehvehthuoh; aküsüri tü nyieramkhruo tümluo, nyutü aküzhuri tü müküülu tümluo, küpakenühnyunü arükümthowa tü mari ashiejiwa aveh rügi vü pehkümthuoh kenüh,

¹³küpakenühnyunü aküzhuri rhoküpeh küju nü mari nüh mowa zhuthuoh ünüh shele müküüruthuoh kenüh. Kümohtsa tü mari shiejiwa aveh kenüh küsa kenüh; jüma tü müvishelera wiethuoh. Mari künakhie kenüh mari kürho tü mürhora wiethuoh.

¹⁴Mari tü mari rütsü khu nü, zanyo aveh nga küchejum thuoh; thitü nyi küsü nga arie vü müwa, küpakenühnyunü eh rükümtho tü mashiejiwa aveh rügivü pehkümthuoh kenüh.

¹⁵Anyuchuwa tü anyula vü pehveh, sahnakükho thi kümkhuoji thuoüji azhehlo vü pehveh; ato vü küpehri thuoüji anyuchuwa vünüh sü naveh; anyujiwa vü küpehri thuoüji kümkhuoji thi sahnakükho nüh sariem naveh.

¹⁶Mükütüzü kürhora wuori mürietewa thuoüji mari tü aküzhiri vünüh ngura naveh anyuo mükhrietü kümjie, mari aveh nga mari künakhie kenüh lüchi taji.

¹⁷Ake aveh nga thachum nathuoh, akho aveh nga ajuh jem nathuoh.

¹⁸Mari atsahkie vi küzhu naveh, kümzhoh nüh mari tiehtem naveh. Küzükrü tü anyieh aveh vü peh naveh, mari aveh alü mütham naveh.

¹⁹Mari tü mari rakasa vi alerari vü theja naveh, mari suna tü mükümtse kümjie sam nathuoh. VÜWA rükümtho rülo vü mari rakasa thi mari suna nüh mari mükülolera nüh sam naveh. Mari tü mari kürüma aloküra müsara nüh sam naveh, nyutü jüma vi mari avo samküprora nüh sam naveh. Küpakenühnyunü jüma tü mari künakhie kümshü sa kümthuoh kenüh.

²⁰Mari nüh vi rhiezarhiechi küveh süriesüvo aküzü jümari vi nü mari nüh mari akükre atsori, mari nüh akümatsatsa zanyori samthuoh; jükenüh hi nüh jüma vünüh mükümtse zanyo küsü mari vü satsüm na thuoh.

²¹Hi nüh jüma tü müzhüküvü kümjie anyitheri akevü thsem na thuoh, prüküvi kümjie kümsüküsari ake vü thsem na thuoh; mari nüh jüma sakümnem na thuoh.

²²Hi nüh mari vünüh eh nyieh kürele tewa nathuoh, jüta küsa vünüh mari nüh eh künyirhie azhie sakümnem nathuoh; kürühuri nüh jüma lovü tu na thuoh, mari nüh jüma sakümnem nathuoh.

²³Akieveh küsü saluo! küpakenühnyunü azhih jüma tü khonyoküphrürieri azüh küüthü proküm kenüh; anyujiwa tü küvürie nüh prom.

²⁴Hi nüh mari azheh atsokrüri küüvi na küsa kenüh akuoküji kümsütsatsari viru naveh. Hi nüh kükuotikuoshira kümzho hi nüh sakümiemtü naveh, thi mari kümtse azhieri tü sakümnem naveh.

²⁵Amüsheküna küru vü mari tü luovehkürüzi phah naveh, thitü küpehlawa nyu.

²⁶Asheküsü rügivü nüh asheküsü ru, küzhühnyuo nüh küzhühnyuo asezhe mari tü setsaküthsüwa vünüh kümohtsa phah naveh; anavüwa vünüh küsüphie kütsü pokahm naveh. Thi kükhruori vünüh zhühphiekütsü pokahm naveh.

²⁷Kajiwa tü külu naveh, kajiwa tü kümshe raküm nüh küzhutem nathuoh, thi azhieh jüla anyira ke tü khekheta küshüm nathuoh. Mari lehkhuji müzhe nü hi nüh mari vü sanaveh; mari ashihwa müzhe wie taji hi nüh ashih sa wie naveh. Jüti sanü mari tü hi VÜWA ta küsa thsü naveh.