Read Pochuri Naga DANIEL 10 Bible Online

DANIEL 10 - Pochuri Naga bible

DANIEL 10

¹Persia kajiwa Sairas mahvi kücheawa vü anyo Belteshazar ta küsa Daniel vü azhü küsü kütsa küngu tsü. Thi azhüwa tü zhütsa, thi jüma tü müküthsüra aküji küsü. Ma nüh azhüwa tü thsüra thi amohwa tü thsümshi ra.

²Jüma rülovü hi, Daniel tü zhia küche rümuo pehveh.

³Zhia küche khemti hi ashierhie mütsa, asa nyutü akhah küsü nga ehpo lovü mükünyike, nyutü avüjuh pike wienga vi nü müthse.

⁴Asa pokhuwa rülo mükeke nü müzüawa vü hi tü arühgu aküjiwa, jüma tü Tigris sapo vü tsie pehküveh vü,

⁵hi nüh eh notha toke nü noküze ünü, halie, nyi küsü mürilothsü küzhu, ma küshih tü Ufas suna vi ma küshih tseke.

⁶Ma satsa tü künyievü kümjie, ma nyieh tü atsohrie kümjie, manotha tü anyihzhu küjuphierake kümjie, ma pie thi ma jih tü asahwuo shoküüzih kümjie, thi ma zhü küphra jikhi tü anyishieji jikhi kümjie.

⁷Thi hi, Daniel mpa nüh kümohtsawa küngu wie, anyi hi siepehküvehri thuoüji kümohtsawa müngu, thitü khekheta küüshüh marivü teru taji mari tü zhütewa nü küthi.

⁸Jükenüh hi mpa jaküüpehm nü kümohtsa aküji hama ngu, thi hi vü akükhra küsü nga münyie nüh satewa; eh nyieh tü azüh nge tewanü akükhra küsü nga münyie nüh satewa.

⁹Thinü hi tü ma zhü ajikhi künara, thi hi nüh küünara vü ehnyie vü tsuo azhihvü zeh nü zehmophoketewa.

¹⁰Jüti küsa vü halie, ake küsü tü hi pa nü eh ke thi eh kho tü saküüsühra.

¹¹Thinü ma nüh hi vü, “O Daniel, küümze küjisheh nyiwa, hi nüh noh vü azhü küüzawa vü kükhe nü tsie toke luo, küpakenühnyunü hi nüh khinyi noh vü küze küveh kenüh,” ti küza. Ma nüh azhü hama hi vü küza küveh vü hi tü khekheta küshüh nü tsiepe.

¹²Jüti küsa vü ma nüh hi vü, “Mükrütüm luo, Daniel, küpakenühnyunü noh nüh a müshe thse nü thsümshi nta thi VÜWA tüvü saküürünyierülo apokhu vünüh noh zhüwa tü künarathuoh, thi noh zhüri kenüh hi tü tsethuoh.

¹³ Persia kajipe vü kajitsawa nüh rülo mükeke nü küsü hi khe; thitü Maikhael, kajitsari vü lehvü küsü nüh hi kükra nta ru, jükenüh hi nüh Persia kajipewa kajitsawa jüla jam.

¹⁴Thi arülo sehkhevü mowa noh nyiri vü ru nta sa veh ünüh jüma saküthsü nti tse veh. Küpakenühnyunü kümohtsawa tü kürulevü azhi saküm kenüh,” ti küza.

¹⁵Azhü hamari müzhe nü ma nüh hi vü küza küm sevü, hi tü eh nyieh azhih vü küprüke nü azhümphrara nüh satewa.

¹⁶Thi halie, anyira tsaküthse küsü nüh eh pomie patsü; thinü hi tü eh po ga nü azhü phra. Hi nüh eh tüvü tsieküvehwavü, “O eh VÜWA, kümohtsawa zhünyo kenüh aküna hi vü ruthuoh, thi hi tü eh kükhra küsü nga münyiethuoh.

¹⁷Mokümjie vünüh eh VÜWA siepewa tü eh VÜWA sie jülera nathuoh lo? küpakenühnyunü khinyi thuoüji akükhra küsü nga hi vü pehmküvehthuoh kenüh, thi arütho küsü nga hi vü tümvehthuoh nü,” ti küza.

¹⁸Thinü anyira tsoküpe küsü nüh hi pale nü hi sakükhratsü.

¹⁹Thi ma nüh hi vü, “O küümze küji shehke anyiwa, mükrü tümluo, luoveh rüzi luo; müzho luo thi luoveh mhie luo,” ti küza. Ma nüh hi vü küüza vü hi tü sakükhra taji nü, “Eh VÜWA phrahte luo, noh nüh hi sakükhra kümthuoh kenüh,” ti küza.

²⁰Jüsevü ma nüh, hi tü mokenüh noh vü tse nüh noh tü thsüveh ünü nyu lo? Thitü khinyi thuoüji hi tü Persia kajitsawa siesaluo nti sühle tse veh; thi hi tü ma vünüh tewathuoh üji, halie, Greekri kajitsawa tü teru nathuoh.

²¹Thitü küzhütsawa lasipha lovü mowa rhü sa veh ünüh hi nüh noh vü küza naveh: Nohri kajitsawa Maikhael küchie nüh hi kükra na küsa münyie luo.