Read Pochuri Naga DANIEL 11 Bible Online

DANIEL 11 - Pochuri Naga bible

DANIEL 11

¹Thi hi thuoüji, Darius Medewa mahvi apokhuwa vü sakütohthi ma sakükhra nti tsie peh.

²Khinyi hi nüh noh vü küzhütsawa küthsü naveh. Persia vü kajiri küche shuru hü naveh. Amüzüawa thuoüji mari aveh nyiehvü nyirhie naveh, thi ma tü ma künyirhie vünüh müzho teru thuoüji Greekri kajipe aveh küke nü siesaluo naveh.

³Jüsevü kaji arie küsari küsü shuru naveh, thi ma nüh ma kümngu kümjie vünüh kükete jusheh taji takrü nü ma kümshe sanaveh.

⁴Thi khra nü tsie küveh vünüh ma kajipe tü kuom nü atülü mürhü müzüri wuovü küsuo küzem naveh, thitü ma küshuküturi vü kütsüwa nyu, nyutü ma nüh takrü nü kete küveh kümzhewa nyu, küpakenühnyunü ma kajipe tü luzhum nü hamari mükünyu küpari vü tewana küveh kenüh.

⁵Jüsevü zhiese kajiwa nüh ji müzho tewa naveh, thitü ma küjiri küsü nüh ma nyiehvü nüh ji müzho tewa nü ma kajipe nyiehvü nüh aküji kajipe küsü sanü takrü naveh.

⁶Mahvi pike sevü masü tü tsarü naveh, thi azhühka wa sakütoh na küsa kenüh zhiese kajiwa tsavühwa tü zhietü kajiwa vü ru naveh. Thitü ma tü ma kükhra tü küsarawa nyu, thi matsatori wa tü müpehra nüh sam naveh. Ma, thi ma künori, ma tsa thi ma kürohzawa tü jaküzem naveh,

⁷jüma tsotho vü ma rüzohri vünüh atsuona küsü ma müthoh vünüh shuru naveh. Ma tü ru nü thopahiri sie saluo nü zhietü kajiwa ashiehku kümzhowa lovü tu naveh, thi ma nüh mari siesaluo nü chara naveh.

⁸Mari nyiazari wie nga, mari nguori, mari rakasa thi suna amekürhe küfüküjuri tü arie vünüh müzhühküvi üta Egypt vü tewa naveh. Mahvi pike kenüh ma tü zhietü kajiwa küprüwa nyu;

⁹jüsevü nüh zhiese kajiwa kükaji zhevi naveh, thitü ma mpa mazhih vü sheleteru naveh.

¹⁰“Ma tsari nüh arie sanü arienyiri ashieji küji küsü sazhuh naveh, jüma nüh anyuoküza kümjie küütü tsezhu nü vehthuo wanaveh, thi ariewa tü ma shiehku küju sawa naveh.

¹¹Zhiese kajiwa tü aheküüte ti tsezhuwa nü zhietü kajiwa sie arie sanaveh, ma nüh ashieji küji küsü saküühurüke naveh, tü jüüta wie ketünga jüma tü ma mükünongüwa nüh cham naveh.

¹²Ashiejiwa sieteküwa vü ma luoveh tü sakükhakem nathuoh, thi ma nüh anyienyie ta küsa türaküüluo khajam naveh, thitü ma tü kücharawanyu,

¹³küpakenühnyunü zhietü kajiwa nüh ashieji küsü atükhuwa nyiehvünüh aküji küsü vizhu le na küveh kenüh, thi mahvi pike sevü ma nüh thopahiri küji küsü thi zanyo hozake vi nü sheleru naveh.

¹⁴“Jüma tsothovü anyi hozake shuru nü zhiese kajiwa sie saluo naveh. Noh nyiri azavü akhonyo müküviri tü kümohtsawa saju na küsakenüh mari mpa mari khake naveh, thitü kriem naveh.

¹⁵Jüti küsa vü zhietü kajiwa tü ru nü aküwu küüroh sanü anyuji shiehku kümkie küsü vi naveh. Thi zhiese thopahiri tü kütsierawa nyu, ma riekhuo küshozhuri wie nga kütsierawa nyu, küpakenühnyunü tsiete na küsa kükhra münyie nüh samna küveh kenüh.

¹⁶Thitü thari nüh ru ma sie saluo naveh ünüh ma kümshe sam naveh, thi nyi küsü nga ma tüvü mütsiera nüh sam naveh. Ma nüh azhih aküzü küsü vünüh kütsiepe sanü jümari aveh tü ma kükhra vü pehm naveh.

¹⁷Ma tü ma kajipe ajü akükhra vi nü küru ma müshe thse naveh, thi kürükümhie rülehwa viru nü jümari sanaveh. Kajipewa zoriem na küsa kenüh ma nüh nyimzari küsü ma tsü nü küüza naveh; thitü jüma tü müsara nyutü ma nyiehvü küwarawa nyu.

¹⁸Asevü thuoüji ma tü anyuonyuri vü sühlewa nü hozake revitera naveh. Thitü akhazhu küsütü ma müküzike vünüh asehkhe samtü naveh; jüti sanü ma müküzikewa tü ma vü küreleru naveh.

¹⁹Jüsevü thuoüji ma tü ma mpa ma zhih shiehku wuovü kürele teru naveh, thitü ma tü müshü nü külu naveh, thi mphahra nüh sam naveh.

²⁰Jüsevü thuoüji ma müthoh vünüh kajipe kütholathovüwa kenüh küjiri küsü küze naveh; thitü ma tü rülo pike azhievü nüh ma mpa nüh arüküshu vünüh nyutü arie küsa vünüh nyu wieketünga kuom naveh.

²¹Ma müthoh vünüh momakütalo küsü ma vü kürhietsie kütholaküsü shuru naveh; ma tü jütihati nga müsanüh müküleh vünüh kajipewa vi naveh.

²²Athopahiri tü ma tüvü nüh chijakümtsem naveh, thi zokhuom naveh, thi kütsathuozhü kajitsawa wie nga, ti.

²³Thi ma sie küwuluo küsü saküm sevü ma tü kürieriekhri müke sanü arefü kütazü küsü sie nü müzhoru naveh.

²⁴Jülohalo nga müsanüh ma tü nyuji künyirhietsari vü ru nü manyiri nyi küsü nga nüh müküsasa sanaveh, zanyo reküviri, prüküvi künyirhie mari vü kütseke naveh. Ma nüh shiehkukümzhori prü nta rüzhe naveh, thitü tsotho pike kenüh mpa wie.

²⁵Ma nüh ma thopahiri khielota küsa sie nü akükhra vi küke taji zhiese kajiwa sie küsaluo kütuohke naveh, thi zhiese kajiwa nüh khielota aküzhi thi kükhra küsü sie nü arie sanaveh. Thitü ma tü kücharawa nyu, küpakenühnyunü ma vü aro thse na küveh kenüh.

²⁶Kajira kütsaküzhu kütsari mpa nüh ma zothem naveh. Mari nüh ma zoriem nü ma thopahiri tü chiriejam naveh, thi hozake sühthe küzehm naveh.

²⁷Kaji künyi, masü amüshe tü zanyo kümsü vü kütsarüluo künyi tü toküsape küsü vü shupeh nü akürie tsüluo naveh. Thitü jüma tü küsarawa nyu, küpakenühnyunü tsotho küteke küsa vü jumnaküveh thuoh kenüh.

²⁸Ma tü künyirhie khielota vü nü ma zhih vü shele ru naveh, thitü ma müshe tü kümtse kütsathuohzhüwa vü küsaluo pehm wie naveh. Ma tü ma müshe sanü azanyo sa wie naveh, thi ma mpa ma zhihvü shele ru naveh.

²⁹“Atsotho küteke küsa vü ma tü shele nü zhiese vü ru naveh, thitü tsotho hamatü atükhuwa üta küsawanyu,

³⁰küpakenühnyunü Kittim juhieri tü ru nü ma siesaluo na küveh kenüh, thi ma tü luoveh sü nü sühle teru naveh. Ma tü arükümtho nü kütsathuozhü kümtsewa vü ma küsangü sa naveh. Ma tü sheleru nü kütsathuozhü kümtsewa kürü kümri vü amüshe thsenaveh.

³¹ Ma nüh küüze arienyiri nüh kükhurüzhehwa thi ashiehku vü pehtewanü sakümnem naveh. Mari nüh tsoküpeh huo kükhurüwa khem nü küüzoküm akükre khakemtü naveh.

³²Ma nüh kütsathuozhü küvürieri sie nü müküleh vünüh mükünyu vü sietewa naveh; thitü Saküüwuowa vü küzhütsa nyitsari thuoüji tsie müzho nü saluo naveh.

³³Anyiri azhievü zanyoküthsüri nüh anyi hozake vü küthsükümshi tsü naveh; jüüta wie ketünga rülo pike kenüh mari tü anyuchuwa thi anyihzhu vünüh külum naveh, thi aküsiküsa thi prüviteküwa vünüh münomna naveh.

³⁴Mari chaküm vü mari tü küükra pike küngu sanaveh, thitü anyi hozake wie nga mükünyitsa vünüh mari vü nyi küperü naveh.

³⁵Zanyoküthsü wuori thuoüji külum naveh, jüti sanü atsothowa asehkhe müjie küju nü mari tü zü nü saküsütha thi sakümtse naveh, küpakenühnyunü atsotho küütekewa müjie küjuküju nü azhievü atsotho küpie küsü pehküveh kenüh.

³⁶“Kajiwa nüh ma küsangü sa naveh. Ma tü ma mpa saküji nü nyiaza küpa nyievü nga nüh küji müshe naveh, thi nyiazara Saküüwuowa vü kükrüshike zanyori phrahte naveh. Ma tü arükümtho sütsuowa müjie küjuküju nü tsarhie naveh, küpakenühnyunü mowa müshethuokemthuoh ünüh sa wie na küveh kenüh.

³⁷Ma tü ma lanyira nyiazari vü, nyutü nyimzari nüh küümzetsawavü küsiakekütsüwa nyu; ma tü küpara nyiaza vü küsiakewa nyu, küpakenühnyunü ma tü aveh nyiehvü nüh ji veh ta ma mpa müshe naküveh kenüh.

³⁸Hamari müthoh vünüh ma tü zethuo kütota nyiaza küchiekürhe sanaveh; ma lanyiri nüh müküthsü küsü suna thi rakasa, ame kürheri thi ame kükho aküteri vi nü küchiekürhe sanaveh.

³⁹Ma tü aliera nyiaza küükra vi nü ashiehku kükhratsari künyuote sanaveh. Ma phraküüjiri thuoüji ma nüh sakünyirhie tsü, thi hozake nyieh vü atakrü mari chieke, thi kajitsa küsü vü azhih küsuotsü naveh.

⁴⁰“Atsotho sehkhe vü zhiese kajiwa nüh ma prü naveh. Thitü zhietü kajiwa nüh nyiazamrhü küsü kümjie rawuhkheka, rawuhnyiri thi ajuhie hozake sie nü ma rügivü joke naveh. Ma nüh nyujiri vü tsezhuru nü saluo taji anyuoküza küsü kümjie kariwa naveh.

⁴¹Ma tü azhih küzüwa vü ru nü anyienyie türa cha naveh, thi Edomri thi Moabri thi Amonri tü ma kükhra vünüh mürietewa naveh.

⁴²Ma nüh ma ke nyujiri rügivü thsuoke naveh, thi Egypt zhih tü kümriewa nyu.

⁴³Ma nüh suna thi rakasa thi Egyptra künyirhie aveh vü takrü sanaveh; thi Libyanri thi Ethiopiari tü ma sevü nyi müzhe naveh.

⁴⁴Thitü zhieshu thi zhietü vünüh azhükeri ru nü ma saküüzüküla naveh, thi ma tü ahe zesheh nü wa küferie viru thi küzoriezosa anyi hozake vü viru naveh.

⁴⁵Ma nüh juhküji thi aküzü kümtse aküzhi azhievü ma kaji juhthsüzhehri khake naveh. Tü nyi küsü nga nüh ma küükra münyienüh sanü ma tü asehkhe vü teru naveh.