Read Pochuri Naga DANIEL 4 Bible Online

DANIEL 4 - Pochuri Naga bible

DANIEL 4

¹Kajiwa Nebukhadnezzar nüh anyiri aveh vü, akuoküjiri vü, azhü küpapa küphra azhih aveh vü kürhori vü zhühle küüze: Nohri vü kürükümhiewa saküzhikütsüwa saluo!

²Kümsietsa Saküüwuowa nüh hi vü athsoshi thi aküngo küsari küütsa eh kenüh mhie na tünyie.

³Ma thsoshiri tü küzakele nga ji nüh, ma küngori tü küzakele nga khra nüh! Ma kajipe tü küsuokürho kajipe küsü, thi ma kükete tü awuleh küsü vünüh awuleh küsü küju.

⁴Hi, Nebukhadnezzar tü eh zheh vünüh rüzih thi eh kajizheh vünüh tsarhie pehveh.

⁵Hi tü amoh küsü sanü jüma nüh hi sakükrü; hi nüh aze rügivü zehküveh vü eh kümsheri thi eh lü nüh kümohtsari nüh hi saküüfükülo.

⁶Jükenüh hi nüh Babilon vü zanyoküthsüri aveh eh tüvü sieru üti küphrahzhu küsü sa, jüti sanü mari nüh hi vü amohwa kürüle saküthsü nti sa.

⁷Thinü kümahtsari, amünguküüzari, Khaldeari, thi sarünyiküchieritü turu; thi hi nüh mari vü amohwa küzathuoh, thitü mari tü hivü ma kürülewa hi vü samküthsüra nüh sam.

⁸Asevü nüh Daniel tü eh tüvü turu, ma nyo tü eh nyiaza anyo vünüh Belteshazar ti jitsü, thi ma vü tü nyiaza kümtsera sietse peh, thi hi nüh amohwa ma vü küza taji,

⁹O Belteshazar, kümahtsara lehvüwa, kümtsera nyiaza sietse tünoh lovü pehveh ta küsa hi nüh küthsü kenüh thi noh kenüh müküthsüra zhühnyowa tü akükho münyie luo; hi nüh amoh künguwatü hala pehveh; tinü jüma kürülewa vi hi vü küza luo.

¹⁰Hi nüh zehküveh vü eh lü nüh kümohtsari tü hamari: Hi nüh ngu, thi halie, azhih azhila vü athsorhu küsü peh; ma kümsie tü müküüte khera.

¹¹Athsorhuwa tü ji nü müzho tewa, ma zhu tü atülü ju, jüma tü azhih küpote aveh vü ngu kheh.

¹²Ma wari tü nozü thi ma viri tü müsehkhrüke, thi jümawa vü aveh kenüh ashie peh. Ato vü asari tü ma kükhu vünüh akükhe sa, thi amürhü vü prükütse amüwari tü ma tsuonari vü kürho sa, thi akürho aveh tü jümawa vünüh avo sa.

¹³Hi nüh aze vü zeh nü eh lü kümohtsari vünüh hi nüh küngutü halie, künoteri küsü, kümtse küsü atülü vünüh turu.

¹⁴Hakümjie ma nüh zie kümsie taji; “Athsoh rhuwa shüchiem nü ma tsuonari rehjam luo, ma nyawari kürhiejam luo thi ma viri sariejam luo; asari tü jüma kükhu vünüh joküütem luo thi amüwari tü ma tsuonari vünüh prürie küüzem luo.

¹⁵Thitü arüzoh vünüh ma totsawa thuoüji azhihvü küpeh saluo, amürü thi asahwuo nüh phehte nü atovü are kürünyi azavü sa luo. Ma tü atülü küzo nüh küüjie saluo; ma thsongu rehthuo küsawa tü azhihwa are vü samwari sie küüpehm luo;

¹⁶ma müshe tü anyira müshe vünüh küükhaphrü luo, thi samwa müshe vi ma vü küütsüm luo; thi ma vü jüüta türü keri küükari luo.

¹⁷Azhühviwa tü künotera küphrahke, kümtsewa nüh küzhühthuo azhü, asehkhe küju akürhori tü kümsietsawa nüh anyira kajipe takrüveh ta küsa thsü na küsa kenüh, thi jümawa vi nü ma nüh kümshewa vü tsü nü anyiri küsajitsawa rügivü sake naveh,” ti küza.

¹⁸Amoh hamatü hi, Kajiwa Nebukhadnezzar nüh künguwathuoh. Thi noh, O Belteshazar nüh kürülewa phrazhu luo, küpakenühnyunü eh kajipevü kümtsari aveh tü kürülewa hi vü sa müküthsüra nüh samthuoh, thitü noh thuoüji sara naveh, küpakenühnyunü nyiaza kümtsesietse tü noh vü küpeh kenüh, ti küza.

¹⁹Jüti küsa vü Daniel, ma nyo Belteshazar ti küsawa tü tsotho pike luovehzahtewa, thi ma kümshe nüh ma saküüzühküla. Kajiwa nüh, “Belteshazar, amoh nyutü kürülewa nüh noh sa müküüzühküla tümluo,” ti küza. Thinü Belteshazar nüh, “Eh vüwa, amohwa tünoh kümrhüri kenüh thi kürülewa tü noh mükünongüri kenüh küüsam luo!

²⁰Noh nüh athsorhu künguwa, jüma tü shiwa nü müzho thi ma zhu tü atülü kuoju nü azhih vü anyiri aveh nüh küngura sa;

²¹ma nyawa tü nozü thi ma vi tü müsehveh nü pe, thi jüma nüh aveh vü kütsaküzhu tsü, ma kükhu vü atovü asari rho, thi prükütse amüwari nüh matsuona vü kürho sa,

²²jüma tü noh, O kajiwa, noh tü jimthuoh thi mümzhothuoh. Noh küjitü ji nü atülü waju vehthuoh, thi noh kükete tü azhih küpote küjuwaju vehthuoh.

²³Thi kajiwa nüh künoteri, kümtseri küsü atüvü nüh küturungu taji,” Athsorhuwa shüchie nü zoriem luo, thitü ma rütsohwa thuoüji ma rüzoh vünüh azhih vü küpehm luo, amürü thi asahwuoli nüh atovü are kürünyi vü huke saluo; thi jüma tü atülüvü aküzo nüh turu züküüjie luo; thi ma thsongu tü türü keri ma müjie küükari küju nü atovü asari vü nyi küüpehm luo, ti küza;

²⁴hamatü kürülethuoh, O kajiwa: Jümatü kümsietsawa nüh küphrahke, eh vüwa kajiwa vü küruwa,

²⁵noh tü anyiri azavü nüh zhejam nü noh kürhope tü atovü samwari vü nyirhom naveh; noh tü shüvotsa kümjie are mürhuo nü nohtü atülü vü aküzo nüh noh jie naveh, thi kümsietsawa nüh anyira kajipe takrü veh ta küsa thi ma nüh jüma vi nü makümshewa vü kütsü noh nüh müjie küthsü küju nü türü keri noh kariwa naveh.

²⁶Thi athsorhuwa rüzoh arütsohwa anyawa vü azhükütsü üta. Atülü nüh takrü veh ta küsa noh kenüh noh kajipewa tü kütohmnaveh.

²⁷Jükenüh, O kajiwa, eh küzhühphiewa noh kenüh küvira küsaluo; künyitsa saphie nü noh kükhiemuori zoriem luo, thi kümrüri vü noküümze kütsanü noh künakhieri zoriem luo, jüta küsa vünüh noh luoveh rüzih nü kürho tü saküsuora mhie veh, ti küza.

²⁸Hamari aveh tü kajiwa Nebukhadnezzar vü ru kheh.

²⁹Asa türakünyi sehkhe vü ma tü Babilon kürhietsie kajizheh rügivütsetse,

³⁰thinü kajiwa nüh, “Babilon aküji hamatü, hi nüh eh kükhrakümzho vünüh kürhietsie kürhope thi eh kükhrakümzho kütholathovü kenüh samsa ülo?” ti küza.

³¹Kajiwa apo vünüh azhü phra peh wie küveh vü atülü vünüh ajikhi küsü turu taji, “O kajiwa Nebukhadnezzar, jüma tü noh vü küzavehthuoh: Kajipewa tü noh vünüh tewathuoh,

³²thi noh tü anyira zavü nüh zhejam nathuoh, jüti sanü noh kürhope tü atovü sie kürho samnathuoh; thi noh tü shüvotsa üta, apra kümrhuom nathuoh; thi kümsietsawa nüh anyira kajipe takrü veh ta küsa noh nüh müjie küthsü küju nü, thi jüma vinü ma nüh kümshewa vü müjie kütsü küju nü türü keri tü noh kariwa naveh,” ti küza.

³³Müküzhike wiethuoh nüh azhüwa tü Nebukhadnezzar rügivü saju. Ma tü anyira zavü nüh zhejam nü shüvotsa küsü kümjie are mrhuo, thi ma sheh tü aluomü küneh thatha, müjie küsuo küjunüh thi ma müzehri tü amüwara müzeh thatha, müjie küsuo küju nü matü atülü küzo nüh jieke peh.

³⁴Arülo sehkhe vü hi, Nebukhadnezzar nüh eh notha atülü vü tokenü noküze ünü eh zhühnyowa tü hi vü shele turu nü hi nüh kümsietsawa tsiatsü, thi küsuokürho kürhowa siake thi maküchiekürhe sa; küpakenühnyunü ma kükete tü küsükürho kükete kenüh, thi ma kajipe tü awuhle küsü vünüh awuhle küsü küju küpeh kenüh,

³⁵azhih vü arhieri aveh tü momaküsa üta kürühkem thuoh; thi ma nüh atülü vü thopahiri vünüh thi azhihvü arhiera azavü nüh ma müshe müzhe nü sasati; thi nyi küsü nga ma ke müshohtera nyutü ma vü, “Noh tü mowa salo?” ta müküza ra.

³⁶Jüti küsa tsotho vü eh zhühnyowa tü hi vü sheleru; thi kütholathovü eh kajipe, eh kükhrakümzho thi aküwie tü hi vü teru le. Eh küzhühphieri thi eh vüwari tü hi phah, thi hi tü eh kajipe vü vike sa le nü khana nyiehvü nüh eh küji hi vü thsetsü.

³⁷Khinyi hi, Nebukhadnezzar tü atülü vü kajiwa siake thi saküjithi küchiekürhe savehthuoh, küpakenühnyunü ma küürohri aveh tü kato thi ma lehkhujiri tü kümsho kenüh; thi kürhiezarhiechi vünüh kütseri tü ma nüh sakütsuora naveh.