Read Pochuri Naga DANIEL 5 Bible Online

DANIEL 5 - Pochuri Naga bible

DANIEL 5

¹Kajiwa Belshazzar tü ma vüwari anyie küsü kenüh kütsazhu aküji küsü sa, thi anyiri anyie küsü atüvü nüh akhah zhu.

²Belshazzar nüh akhahwa kümpo vü, ma pa Nebukhadnezzar nüh Jerusalem kükhurüzheh vünüh vizhu teküwa suna thi rakasa ahuo-khuri viru üti azhütsü, jüti sanü kajiwa thi ma vüwari, ma vüvühri, thi ma müsüvühri tü jümari vünüh zhu na küsa kenüh.

³Thinü Jerusalem vü Saküüwuowa zheh vünüh vizhu teküwa suna thi rakasa ahuo-khuri tü mari nüh viru; thi kajiwa thi ma vüwari, mavüvühri, thi ma müsüvühri tü jümari vünüh zhu kheh.

⁴Mari tü akhah zhu nü suna thi rakasa, asahwuo, amürü, athsoh thi aloh nyiazari siake.

⁵Jüti saküveh vü müküzhike wiethuoh nüh anyira tüjü tü küüngu nü alati küwiejie vü kajiwa kajizheh azie küneküsa rügivü rhü, thi jüma rhüküveh vü akewa tü kajiwa nüh ngu.

⁶Thinü kajiwa tso tü khaphrütewa, thi ma kümshewa tü ma saküjakünyatewa; ma jih akeri tü küzhikülatewa thi ma kho künyitü küchirütewa.

⁷Kajiwa nüh zie kümsie nü amünguküüzari, Khaldeari thi sarünyiküchieri sieru üti sa. Kajiwa nüh Babilon vü zanyoküthsürivü, “Thathari nüh akürhü hama chie nü ma kürülewa hi vü kütsanaveh ünüh ma thuoüji küsümothsü nüh vi küzhutsü, thi suna kieveh vi nü ma ku vü kümzho naveh, thi kajipewa vü atakrükücheawa küsanaveh,” ti küza.

⁸Jüti küüza vü kajiwa nyiri aveh tü ru kheh, thitü mari tü akürhüwa müchiera nüh sa, nyutü kajiwa vü kürülewasamküthsü ra nüh sam.

⁹Thinü kajiwa Belteshazar tü küraküpre sheh tewa nü ma tso tü khaphrütewa; thi ma vüwari tü mütsamngotewa.

¹⁰Kajivühwa tü kajiwa thi ma Vüwa ra zhü kenüh kütsazhu vü ru nü kajivühwa nüh, “O kajiwa, küsuokürhowa saluo! Noh kümshe tü müküraküpre tüm, luo nyutü noh tso tü atsothe satemwa tümluo.

¹¹Noh kajipe vü anyi küsü kümtse nyiazara sietse ma vü kütüpehveh. Noh pa kükaji rülo vü, küthsükümshi thi kümtsa, nyiazara kümtsa kümjie küsa ma vünüh ngu, thi kajiwa Nebukhadnezzar, noh pa nüh ma vi nü kümahtsari, amünguküüzari, Khaldeari thi sarünyiküchiera lehvüwa küsa,

¹²küpakenühnyunü Daniel hama, kajiwa nüh Belteshazar ta küjiwa vünüh sietse kümhietsatsa zanyoküthsü, thi amoh kürüleküthsükümshi, küümshiri rületsü thi küsürori zhühthuokütsü ti ngura küveh kenüh. Khinyi Daniel küüji luo, ma nüh kürülewa küütsanaveh ünüh,” ti küza.

¹³Jüti küsa vü Daniel tü kajiwa tüvü sieru. Kajiwa nüh Daniel vü, “Noh tü Daniel jüma, Judahri aküsi sateküwawa, kajiwa eh pa nüh Judah vünüh sieküruwa thuohla?

¹⁴Hi nüh noh küünara kümtse nyiazara sietse tü noh vü pehveh ta, thi aküwie thi küthsükümshi thi kümhietsatsa kümtsa ti noh vü pehveh ta.

¹⁵Zanyoküthsüri, amünguküüzari tü akürhü hama küüchie nü makürülewa hi vü saküüthsü nti eh tüvü sieturuthuoh; thitü mari tü ma kerowa kürülewa mükütsara nüh sam.

¹⁶Thitü noh nüh rüle tsüra na ta, thi küsürori sathuotsüra nata. Tinü mükütüküzü rhüküsawa noh nüh khinyi chiera nü hivü makürülewa hi vü saküthsüra ti thuoüji athsü küsümo vinü noh kümphie naveh, thi noh ku vü suna zho küümzho naveh, jüti sanü kükajipe vü atakrü kücheawa küsanaveh,” ti küza.

¹⁷Jüti küüza vü Daniel nüh kajiwa tüvü, “Noh kütewa tü vi noh mpa noh zhi saluo, thi noh nüh ajisuo tsü na küsawa tü vi nü küpari tsüm luo; jütawie ketünga rhüküsawa tü hi nüh kajiwa vü chietsü naveh thi kürülewa noh vü saküthsü naveh.

¹⁸O kajiwa, Saküüwuowa kümsietsawa nüh noh pa Nebukhadnezzar vü kajiküsa, aküji, kütholathovü thi akükhraküvi tsümthuoh;

¹⁹thi ma nüh aküji vi ma kütsü kenüh anyiri aveh, akuoküjiri aveh, thi azhü küpapa küphrari aveh tü ma krü thi ma tüvü khekhetaküshüh; ma nüh rehthe nta küsari rehthem, kürho sa nta küsarikürho sa; ma nüh khake nta küsari khake, thi sakütsuo nta küsarisakütsuom.

²⁰Thitü ma luoveh tü khaketewa thi ma sietse tü sakükhom nü rhiezatewa ünü ma kaji kükajipe vünüh ma tü sakürünyiem, thi makütholathovü tü ma vünüh vitewa;

²¹ma tü anyiri azavü nüh zhejam, ma müshe tü samwa küsü amüshekümjie sam tü, thi ma kürhope tü areza vü rawuhküzahwa sie rho; ma tü shüvotsa küsü kümjie are mürhuo, thi ma tü Saküüwuowa kümsietsawa nüh anyira kajipewa atakrü sa veh thi ma nüh külowavi nü jümawa rügivü küsa müjie küthsü küju nü atülüwaküzo nüh ma satsa jie peh.

²²Thi noh, ma tsa, Belshazzar tü hama aveh thsü wie ketünga noh luoveh samkürünyiethuoh,

²³tü noh tü noh mpa nüh atülü vü VÜWA nyiehvü toketewathuoh; jüti sanü ma zheh vü ahuo-khuri noh tüvü viturumthuoh, thi noh thi avüri, noh vüvühri, thi noh müsüvühri tü jümari vünüh akhah zhumshemthuoh; thi rakasa thi suna, sahwuo, amürü, athsoh, thi aloh, müküngurari, nyutü müküünarari nyutü müküthsürari nyiaza siakemthuoh, thitü noh rütho ma kevü pehküveh Saküüwuowa, thi noh lehkhuji aveh ma vü pehküvehwa thuoüji müchiemrhe nüh samthuoh.

²⁴“Jüsevü ma tsatü vü nüh akewa tü küze nü akürhü hamatü rhümthuoh.

²⁵Thi rhü nü rhükeküsawa tü hama: MENE, MENE, TEKEL, thi PARSIN.

²⁶Akero kürülewa tü hama: MENE zhühnyo thuoüji Saküüwuowa nüh noh kajipe rülori kürühm nü jümawa asehkhe vü viru samthuoh;

²⁷TEKE zhünyo thuoüji noh tü küütekhuri vünüh küte nü müphieh kümngumthuoh;

²⁸PERES zhühnyo thuoüji noh kajipe tü küsuom nü vi Mederi thi Persiari tsümthuoh,” ti küza.

²⁹Jüti küsa sevü Belshazzar nüh azhütsü nü Daniel tü küsümokruzhu vi ma küüzhu, suna kievehzho vi ma ku vü thsetsü nü ma nüh kajipe vü takrü kücheawa müküsaji mümhie ti küsa ma kenüh küzhüchüh sa.

³⁰Jüma rüzavü nüh Khaldeari kajiwa Belshazzar tü rehthem.

³¹Thi Medewa Darius tü amahvi rorake nü künyi kümthuoh üta kajipewa vike.