Read Pochuri Naga DANIEL 7 Bible Online

DANIEL 7 - Pochuri Naga bible

DANIEL 7

¹Babilon kajiwa Belshazzar kükaji mahvi pokhuwa vü Daniel tü ma ze rügivü zehveh ünü amoh küsü moh thi kümohtsa hozake ngu. Thi ma nüh amohwa rhü nü jüma kero zhünyowa küza.

²Daniel nüh, arüza vü hi tü eh kümohtsa ngu ünü halie, atülü mürhü müzüri tü ajuh küjiwa shohküze veh.

³ Thi asa müzü tü juhküji lovü nüh shuru, mari tü küsü nüh küsü vü küpa.

⁴ Apowa thuoüji amiewuo küsü kümjie thi aluomü küsa pe. Hi nüh no pehveh ünü ma küsa künyi tü zoshim nü azhih vünüh jüma tü viketekuo nü anyiri kümjie ajih künyi vünüh tsie; thi anyi küsü amüshewa vi nü jüma tsü.

⁵Thinü halie, asa küpa akünyia wa tü awie kümjie shuru. Jümatü anato wuochuwuo rügivü küütsie; ma po lovü ma ha azhienü münyuorü küche peh; thi jüma wa vü, “Sühra nü asa khieloti tsaluo,” ti küza.

⁶Hama sevü hi nüh nopehveh ünü, halie, küpa küsü amie tü wa kümjie ma seru vü amüwa küsa müzü pe nü shuru; thi asawa tü alü müzü pe; thi kükete vi nü ma tsü.

⁷ Hama sevü arüzavü hi tü kümohtsa ngu ünü halie, asa amüzüawa kükrükükra thi kükrüshehke thi khielota kükhra küsü ngu; thi jüma tü mürü ha aküji pe; jüma nüh shohrie nü asükhri vünüh shohthuo khehm, thi kümnyiewa ma mpha nüh nyite. Jümatü atükhu vü asari aveh nyiehvü nüh küpatsatsa; thi jüma tü arütsü türake pe.

⁸ Hi nüh arütsüri müsheno pehveh ünü halie, mari azhievü arütsü küzah küpa küsü shozhuru, atükhuvü apo rütsü kücheri tü arütsoh vünüh lozhum; thinü halie, arütsü hamawa vü anyira notha kümjie pe, thi apo nüh zanyo aküji phrahte.

⁹ Hi nüh no pehveh ünü Kükajiperi tü sakheh thi alanyiri vünüh küpehwa tü ma pe vü pehtewa; ma thsümnyi tü amüra kümji üta, thi ma lüsheh tü akünehlo kümtsüh kümjie; ma kükajipewa tü anyihzhu küjuphierake, ma satürüjihri tü anyih küju.

¹⁰Anyih kuza küsü vizhu nü ma tüvü nüh shuru; anyienyie ti küsanüh ma kütsü sa, thi anyie türakeri anyie türake nüh ma tüvü tsie; ashihwa tü ashih vü sa; thi lasiphawa tü shahrie.

¹¹Arütsüwa nüh azhü küji küphrahte jikhiwa kenüh hi nüh noküze. Thi hi nüh no pehveh ünü asawa tü rehthem nü ma satsawa tü zoriem taji anyih vünüh tso na küsa kenüh tsüm.

¹²Asa küpari thuoüji mari küketewa tü sietewa, thitü mari kürho tü azale küsü kenüh thi atsotho küsü kenüh saküsuotü.

¹³ Hi tü arüza vü kümohtsa nopehveh ünü, thinü halie, atülü aküluri sie nü anyitsa küsü kümjie ru, thi ma tü Alanyira Rülo vü ru nü ma tüvü siewa sa.

¹⁴ Thi ma vü kükete thi kütholathovü thi kajipe tsü, jüti sanü anyiri aveh, akuoküjiri, thi azhüküpapa küphrari aveh tü ma kütsü sana küsa kenüh; ma kükete tü küsükürho kükete, jüma tü temwara, thi ma kajipe tü küzoriewa nyu.

¹⁵Hi Daniel tü eh sietse eh lovü tüküvehwa tü küraküpre thi eh lü vü kümohtsawa nüh hi saküüzüküla.

¹⁶Hamari aveh kenüh küzhütsawa ma vü küna nti jüla tsieküvehri küsü vü hi nüh wa. Thinü ma nüh hi vü küza thi azanyora kürülewa hi vü saküthsü.

¹⁷“Asaji müzü hamari tü kajiri müzü azhih vünüh shuru na küsari.

¹⁸ Thitü Kümsietsawa nüh kajipewa vi naveh, jüti sanü kajipewa tü küsuokürho sehkhe küju vipehm nathuoh,” ti küza.

¹⁹Jüsevü hi tü asa müzüawa küzhütsa küthsü müngu, jüma tü küpari aveh nyiehvü nüh küpam, khielota kükrüküngo, ma mürü ha thi asahwuo müzeh nüh mürhührie thi shohrie nü kümnyiehwa tü ma mpha nüh nyite;

²⁰ma lü rügivü arütsü türake peh küvehri kenüh, thi arütsü küche müjie tsuotsa teküwa atüvü arütsü küpa shuküruwa, arütsü anotha nga pe thi apo nga pe nü azanyo aküji küphra, thi ma füra nyiehvü nüh küjizahwa.

²¹ Hi nüh no pehveh ünü, arütsü hamatü kümtseri sie nü arie sanü mari cham,

²² Alahnyira Rülori müjie küru küju nü, thi kümsietsawa müjie kütsü küju, thi kümtseri nüh kajipewa müjie küju nü arie sa.

²³“Ma nüh, asa amüzüawa kenüh thuoüji, azhih vü kajipe amüzüawa küsü peh naveh, jüma tü kajipe aveh vünüh küpa naveh, thi jüma nüh azhih ajü sariem naveh, thi jüma tü nyinya nü nyiriejam naveh.

²⁴ Rütsü türakeri kenüh thuoüji, kajipe hama vünüh kajiri türake shuru naveh, thi jümari asevü nüh küpa shuru lenaveh; ma thuoüji atükhuri nyiehvü nüh küpa naveh, thi kajiri küche asaji vü vim naveh.

²⁵ Ma nüh kümsietsawa vü azhühjiri phra wuluo naveh, thi kümsietsawa kümtseri sakümnomna naveh, jüti sanü atsothori thi akhonyowa khaphrü nta müshe naveh; thi atsotho küsükeri tsotho künyi keri, thi küzhila kenüh mari vi nü ma ke vü thsem naveh.

²⁶Thitü ashihwa tü ashihküsa vü peh naveh, thi ma küketewa tü vijam naveh, asehkhe küju sakümiem thi zoriem naveh.

²⁷ Jüti sanü kajipewa, küketewa, thi kajiperi aküji atülü kükhu vü küpeh ajü tü vi nü kümsietsawa kümtse nyiri vü tsüm naveh; mari kajipe tü küsükürho kajipe sanaveh, thi küketeri aveh nüh mari kütsü küna thi mari azhüküna naveh,” ti küza.

²⁸Akero asehkhewa tü hama. Hi, Daniel kenüh thuoüji, eh kümshewa hi khielota saküüzühkülamthuoh, thi eh tsokhie nga khaphrümthuoh; thitü akerowa tü hi nüh eh müshe lovü sa.