Read Pochuri Naga DANIEL 8 Bible Online

DANIEL 8 - Pochuri Naga bible

DANIEL 8

¹Kajiwa Belshazzar nüh kükaji mahvi kücheawa vü kümohtsa küsüapokhuwa hi vü küütsa üta hi, Daniel vü kütsa.

²Thi hi tü kümohtsa vünüh ngu, hi nüh küngu vü hi tü Susa suorezü vü pehveh, jüma tü Elam nyuji vü pehveh; thi hi nüh kümohtsa küngu vü hi tü Ulai rühgu vü pehveh.

³Hi nüh eh notha toke nü noküze ünü halie, nyihzhüvo küsü tü arühgu nato vü tsie pehveh. Jüma tü arütsü künyi pe; thi arütsükünyikhürü tü suom, thitü küsü thuoüji küpawa nyiehvü nüh khajü, thi kükhajüwa nüh asehkhe sashuru.

⁴Hi nüh künguvü nyihzhüvowa tü zhietu wuovü thi zhietü wuovü thi zhieseh wuovü khrü pehveh; asa küsü nga ma tüvü mütsiera nüh sanü nyi küsü nga nüh ma kükhra vü müküloletsüra nüh sam; ma tü makümshe sanü ma mpa nüh ma saküji.

⁵Hi nüh müshepehveh ünü halie, nyihsüvo küsü tü zhietu vünüh azhih müjoke nüh azhih aveh vü wa; thi nyihsüvowa tü ma nothakünyi azhievü arütsü küsü kümhieta ngu.

⁶Ma tü arütsü künyi vü nü arühgu sapovü tsieküveh hi nüh küngu nyihzhüvowa vü ru, ma tü khielota ma rükümtho vünüh zhüru.

⁷Ma tü nyihzhüvowa vü shenyiru nü ma vü arüshusheh taji nyihzhüvowa vehjaküzehm nü ma rütsü künyi khürü zoshim; thi nyihzhüvowa tü akükhra münyie nüh sanü ma tüvü mütsiera nüh sa taji azhihvü veh küzeh nü ma tüwuoh nüh ma rügivü nyite; thi nyiküsü nga nüh ma kükhrawa vünüh nyihsüvowa müküloletsüra nüh sam.

⁸Jüti küsa vü nyihsüvowa tü ma mpa nüh khieloti ma saküji; thitü ma tü akükhra pehra ünü arütsü küjiwa tü jitewa, thi jüma müthoh vünüh atülü müzü wuovü arütsü müzü ngumtse nü shuru.

⁹Mari müzü azhievü arütsü kütazü küsü shuru nü zhiesehwuovü, zhieshu wuovü thi kütholathovü azhih wuovü khieloti aküjishizhuru.

¹⁰Jümatü shi jisheh teru nü atülüwa ashiejiri vü nga, thi awutsishieji wuori nga ti azhihvü küzhühjam nü ma nyiehri vü nyite.

¹¹Jümatü ashiejira kajiwa, thi mükütuo nüh kütso kükhurü wa tü ma vünüh vitewa, thi ma kümtsezheh azhiewa tü khajamtü.

¹²Jüti sanü ashieji watü kütso kükhurü tsüküpeh huo nga ti kükhazih vünüh jümawa vü tsüm; thi küzhütsawa nü azhihvü vijaküzem nü arütsüwa tü sataji tsarhiera.

¹³Jüsevü kümtse küsü nüh phrahte küveh künara; thinü kümtse küpa küsü nüh phrahte küvehwa vü, “Kütso kükhurü müküütuowa, jaküüzoküm kükhazihwa, kümtsezheh jam nü ampha nüh ashiejiwa nyinya küveh kümohtsawa kenüh tü küthake na lo?” ti küza.

¹⁴Thi nüh ma nüh ma vü, “Münüleh thi arüne anyie künyi nü müza küche thuoüji kümtsezhehwa tü ma pe kükato vü sasalera naveh,” ti küza.

¹⁵Hi, Daniel nüh kümohtsawa künguvü, jüma thsü nti phah; thinü halie, anyira tso küvü anyiri küsü eh tüvü tsie pehveh.

¹⁶ Thi Ulal sapo azhievü nüh anyi küsü jikhi künakera, thinü jüma nüh, “Gabriel, kümohtsawa tü anyi hama saküüthsütsüluo,” tiji.

¹⁷Jüti küji vü ma tü hi nüh kütsiepe vü ru; thi ma nüh küru vü hi tü saküükhrih nü hi tü anyieh fephohke nü zehtewa. Thitü ma nüh, “Thsüluo, O anyi atsawa, kümohtsawa tü asehkhe tsotho vü kenüh ti küsa,” ti küza.

¹⁸Ma nüh hi jüle pehwieküveh vü hi tü eh nyieh vü azhih vü fephohke nü zehmophoketewa; thitü ma nüh hi pa nü hi saküütsie.

¹⁹Ma nüh, halie, arükümtho sehkhe vü mowa sanaveh ünüh hi nüh noh vü saküthsü naveh; küpakenühnyunü jüma tü asehkhe tsothowa vü küsaleh küchieke wa saküm kenüh.

²⁰Noh nüh nyihzhüvo arütsü künyi pe nü künguwa thuoüji jüma rütsü künyi tü Media thi Persia kaji künyi.

²¹Thi nyihsüvowa thuoüji Greekri kajiwa; thi ma notha künyi azhievü arütsü küjiwa tü kaji pokhuwa.

²²Arütsü apokhuwa jiküm müthoh vünüh küpa müzü shiküruwa thuoüji ma kuohji vünüh kajipe müzü shuru naveh, thitü makükhra vünüh shuküruwa nyu.

²³Thi mari nüh takrü küsa sehkhe vü kükhazi kharieri mari nüh küsajuwa sam thuoüji ma nyieh kümzho kaji küsü kümshira küthsüwa shuru naveh.

²⁴Ma kükhra tü jisheh naveh, thi ma nüh akükrü küzorie sazhu nü ma nüh mowa sanaveh ünüh küsara sanaveh, thi anyi kümzhori thi kümtseri zoriem naveh.

²⁵Ma aro kümsü vi nü ma ke kükhu vünüh akürieriekhri kütsarhie sanaveh, thi ma mpa ma müshe lovü nüh ma saküji naveh. Hamna müsa wiethuoh nüh ma tü anyi hozake zoriem naveh; thi ma tü kajitsara kajitsawa vü wie nga sühra siesaluo wie naveh; thitü anyira ke küsü nga nüh ma tü küzokhuowa nyu.

²⁶Münüleh thi arüne kümohtsa vi küüzawa tü azhütsa; thitü kümohtsawa tü fete sam luo, Küpakenühnyunü jüma tü arülo hozakevü küsaleh küsa kenüh.

²⁷Jüsevü hi, Daniel tü tephakeküm kenüh rülo pike natewa; jüsevü hi tü sühra nü kajiwa küüroh vü tewa; thitü hi tü kümohtsa vünüh azüh nge nü jüma müthsü mümshira nüh sa.