Read Pochuri Naga DANIEL 9 Bible Online

DANIEL 9 - Pochuri Naga bible

DANIEL 9

¹Ahasuerus atsa Darius, aküwuo vünüh Mederi küsü, amahvi pokhuwa vü Khaldeari kajipe vü kaji sa,

²ma kükaji mahvi apokhuwa vü, hi Daniel, nüh Jerusalem feriem naküsa mahvi rürakewa müshe nü kümtse lasiphari VÜWA zhü Jeremia setsaküthsüwa vü kütsü müzhe nü hi tü chie.

³Jüsevü hi tü assa sanü atsahkie vi hi küzhu thi aweji vi hi thseti sanü akükhuo vünüh ma phah nü VÜWA Saküüwuowa vü eh nyiehküprüke.

⁴Hi nüh VÜWA eh Saküüwuowa vü kükhuo sanü küphrazhu sa taji, OVÜWA, ji, thi kükrüküngo Saküüwuowa, ma küümzeri vü kütsathuozhü thi mükükhaphrükhale küsawa,

⁵hiri tü khiemuo nü müküleh samthuoh thi khusükhurü nü ruohluo mthuoh, noh nüh azhükütsüri thi azhükhori vünüh anato vü küreleke tewathuoh;

⁶hiri tü noh sieperi setsaküthsüri nüh noh nyo vünüh hiri kajiri vü, hiri kajitsari vü, eh pari vü, thi azhihwa nyiri aveh vü küüza müküna nüh samthuoh.

⁷O VÜWA, künyitsa tü noh zhi, thitü nosü üta hiri tü hiri anyiehvü nü Judah nyiri vüluo, Jerusalem vü arhieri vüluo, Israel aveh vüluo, küshenyiri vüluo thi kületsuori vüluo, noh nüh zhejaküm azhih aveh vü küzükrü pemthuoh, küpakenühnyunü mari nüh noh vü aroküshi sakümwa kenüh.

⁸O VÜWA, hiri anyiehvü hiri kajiri vüluo, hiri kajitsari vüluo, thi eh pari vüluo küzükrü pehmthuoh, küpakenühnyunü hiri nüh nohvü khiemuo kümthuoh kenüh.

⁹Külona thi noküja tü VÜWA hiri Saküüwuowa zhi; küpakenühnyunü hiri nüh ma sie ruoluo mthuoh,

¹⁰thi ma nüh ma siepe setsaküthsüri vünüh hiri atüvü ma khonyori mümzhe nüh sanü VÜWA hiri Saküüwuowa jikhi müküna nüh samthuoh.

¹¹Israel aveh nüh noh jikhi müküna nta noh khonyowa khazih nü anatovü kürelete wathuoh. Thi Saküüwuowa siepe Mosa Khonyo vü rhüküsa kümzü thi küüshiekütsawa hiri vü küshokemthuoh, küpakenühnyunü hiri nüh ma vü khiemuo küm kenüh.

¹²Ma nüh kümsü hiri vü vi küru vünüh hiri vü thi atakrüri, hiri vü atakrü küsari vü phrahtekütsü ma zhüwa sakütohmthuoh; küpakenühnyunü atülü aveh kükhu vü küsü nga Jerusalem vü küsa kümjie müküsa kenüh.

¹³Mosa khonyo lovü rhü küsa üta kümsü hamari aveh hiri vü teruthuoh. Hiri tü VÜWA hiri Saküüwuowa küütso mükhuo nüh sam, thi hiri künakhie vünüh sühle nü ma küzhütsa mphah nüh sam.

¹⁴Jükenüh VÜWA nüh kümsüwa tü küche sanü hiri vü virumthuoh; küpakenühnyunü VÜWA hiri Saküüwuowa nüh küüroh küsa aveh vü ma thuoüji künyitsa kenüh, thitü hiri thuoüji ma jikhi müküna nüh sam.

¹⁵Thi halie, O VÜWA hiri Saküüwuowa, thawa nüh ake akükhra vünüh Egypt zhih vünüh noh nyiri vizhu nü nosü küju noh nyo tü tholah veh lo. Hiri tü khiemuomthuoh, thi hiri tü khusükhurüshehmthuoh.

¹⁶O VÜWA, noh künyitsa müke aveh müzhe nü noh rüküshu thi noh rükümtho tü Jerusalem nyujiwa, noh kümtse küzhihowa vünüh küreleküzem luo, hiri kükhiemuori kenüh, thi eh para künakhieri kenüh Jerusalem thi noh nyiri tü hiri mükieshe nü pehküveh aveh azavü phranyuohm thuoh.

¹⁷Jükenüh khinyi thuoüji, O hiri Saküüwuowa, noh siepewa kükhuo vü thi ma nüh zhiekekükhuo künatüluo, thi noh mpa noh rieh nüh, O VÜWA, küüzojaküm noh kümtsezheh rügivü noh nyieh küwieke luo.

¹⁸O! eh Saküüwuowa, noh khüna kümrheke nü künaluo; noh notha ko nü hiri küüzojaküm thi noh nyo vünüh küthoh anyujiwa noküze luo; küpakenühnyunü hiri tü künyitsa rügivü nüh noh tüvü hiri zhieke kükhuo tsü müküveh kenüh, tü noh noküümze aküji rügi vünüh thseveh.

¹⁹O VÜWA, künaluo; O VÜWA, nojatsüluo; O VÜWA, künatü nü satsüluo; mümnütüm luo, noh mpa noh rieh kenüh; O! eh Saküüwuowa, küpakenühnyunü noh nyujiwa thi noh nyiri tü noh nyo vünüh küthohkenüh, ti küza.

²⁰Hi nüh eh kükhiemuo thi eh nyi Israel kükhiemuo phrahzhu nü küza thi kükhuo sanü VÜWA eh Saküüwuowa tüvü eh Saküüwuowa kümtse küzhiho wa kenüh eh küzhieke kükhuo tsü küveh vü;

²¹akükhuo vünüh hi tü azhü phrahte pehveh ünü, Gabriel anyiwa, apokhu vü hi nüh kümohtsa vünüh künguwa tü münüleh küsahthuo tsotho vü prü the wie taji hi vü ru.

²²Ma nüh hi vü ru taji, O Daniel, hi tü noh vü kümtsa thi küthsükümshi noh tsü nti tsethuoh.

²³Noh nüh zhiekekükhuo tevü nüh azhü küsü shuwa wiethuoh, thi hi nüh jüma noh vü küza nti tse, küpakenühnyunü noh tü loshekümthuoh kenüh, jükenüh azhüwa müshe nono nü kümohtsa wathsüluo.

²⁴Noh nyiri thi noh kümtse nyujiwa kenüh, kükhazikharie saju nta, kükhiemuo vü asehkhe samü nta, thi künakhie kenüh kütsathuoh, küsuokürho künyitsa viru nta kümohtsa thi setsaküthsü masü fete nta, thi kümtse atsa azhiewa thse nta amahviwa zhia rürake phrahzhumthuoh.

²⁵Jükenüh Jerusalem sale thi khake üta azhüwa shuküru vünüh thsekümwa, kajitsawa küru küju zhi türü naveh ti küsa thsü, thi müshi saluo. Jüsevü zhia rorake nü künyi thuoüji lehkhujiri thi akhithuori sa naveh, thitü hama küsa kümnomna tsotho vü sanaveh.

²⁶Thi zhia rorake nü künyi sevü thse kümwa tü zothem nü zanyoküsü nga küpehwa nyuthuoh; thi anyira kajitsa, ru na küsawa nüh anyujiwa thi kümtsezhehwa tü zoriem naveh. Jüma sehkhe vü thuoüji anyuo küza ru naveh, thi asehkhe vü thuoüji arie ru naveh; küüzojakümri tü phrahzhumthuoh.

²⁷ Thi ma nüh anyi hozake sie nü zhia küsü kenüh kütsathuozhü kümzho küsü sa naveh; thi küzhila thuoüji küsahthuo thi kükhurü ma nüh khem naveh; thi saküüzowa rügivü küphrahzhu sehkhewa müjie küüshoke küjunü akükreri küsa rügivü sakü