Read Pochuri Naga HOSEA 10 Bible Online

HOSEA 10 - Pochuri Naga bible

HOSEA 10

¹Israel tü mavi pe nü khielota alokürü rhelivi zhuh küsü. Küzake ma vi zhi naveh ünüh Jüzake kükhurüpe ma nüh sa; ma nyuji küüzhake üta, ma nüh ma lokhuori saküzhake.

²Mari luoveh tü riem; khinyi thuoüji mari tü mari kükhieh müvü üji mümhiethuoh. VÜWA nüh mari kükhurüperi zoriemtü naveh, thi jümara alokhuo zoriemtü naveh,

³küpakenühnyunü khinyi thuoüji mari nüh: “Hiri thuoüji kaji münyiethuoh, hiri nüh VÜWA mükükrü kenüh, thi kaji küsü nüh hiri kenüh mowa sara na lo?” ta küza na küveh kenüh

⁴Mari tü kümliemla azhü mpa nüh phrahtezhu küveh wie; küüshiekütsa kürütso nüh mari tü kütsathuozhü sa; jükenüh kümzhithera mawuh kümjie azhuh khahuküsari vünüh shozhuru naveh.

⁵Samaria vü arhieri tü Bethaven mieshüzahwa kenüh khekheta küshüh. Ma nyiri tü jüma kenüh külu naveh, thi ma nguokükhurü navüri tü jüma rügivü rera naveh, ma vünüh teküwa ma kütholathovü rügivü rera naveh.

⁶Azanyowa mpa nüh Assiria vü Kaji aküjiwa vü alekhrü vüteküwa üta vü tewa naveh. Efraim tü küzükrü vü thsem naveh, thi Israel tü ma nguo kenüh zükrüm naveh.

⁷Samaria kajiwa tü ajuhri nyiehvü athsoshi küsü kümjie pokahm naveh.

⁸Aven zhie kümsieri thi Israel kükhiemuo tü zoriem naveh. Arüzhü thi atükriri tü mari kükhurüpe rügivü shozhu naveh. Mari nüh aküzhiri vü, hiri hiete luo ta, thi küzhihori vü, hiri rügivü nehru luo, ta küza naveh.

⁹ Gibeah rülo vünüh noh tü khiemuo kümthuoh kenüh, O Israel; jüla nüh mari tü müshukem wiethuoh. Gibeah vü arie tü mari nyiehvü teküwawa nyu ülo?

¹⁰Hi nüh anyira lehkhuji wuovü nüh ru nü mari vü kümnomnatsü naveh; mari künakhie küüluoh kenüh mari vü kümnomna kütsü vü akuoküjiri tü mari vü sezhuh naveh.

¹¹Efraim tü amütha kürütse ngü amieshü awie sosie küüthsüra küsü, hi nüh ma ku küzü müshiem; thitü hi nüh Efraim tü azhih küüfekhuo naveh; Judah thuoüji mükhahu üji mümhie; Jacob thuoüji ma mpa ma kenüh mü kühakhuo üji mümhie.

¹² Noh mpa noh kenüh künyitsa zhuh luo; mükükhaphrükhale küümze wie vi luo; noh nüh müküürotsa azhih fekhuo luo; küpakenühnyunü VÜWA küphah tsotho küsathuoh kenüh, noh rügivü künyitsa atsoh kürüke na küsa kenüh,

¹³Noh nüh kümsüküsa khahu savehthuoh, noh tü mükümsho wievimthuoh, noh nüh akürie avi tsamthuoh, küpakenühnyunü noh nüh noh kükhra thi noh rieküsari ashiejiri alehno kümthuoh kenüh,

¹⁴jükenüh arie jikhi tü noh nyiri rügivü ru naveh, thi noh nyujikümzho aveh tü zoriem naveh, azahri nüh atsari sie nü külu taji küüchethuo üta, thi arie rülo vü Shalman nüh Betharbel küzorie kümjie sanaveh.

¹⁵Jükümjie noh vü sanaveh, O Bethel, noh kümsüküsa aküjiwa kenüh. Atholehvü Israel kajiwa tü rehthuojam nathuoh.